၂၇.၆.၂၀၂၄
လါယူၤ(၂၄)သီဒီး(၂၅)သီအနံၤ, (၂)သီအတီၫ်ပူၤ တၫ်ထီၣ်ဒုးမၤန့ၫ် သုးကီၣ်ကးအသုးကလၢၤ(၂၄)ဖျၢၣ်အဂ့ၫ် တအီဒီကလုာ်တၫ်ထူၣ်ဖျဲးသုးမုၫ်ဒိၣ်(TNLA)ထုးထီၣ်ပာ်ဖျါဃၣ်၀ဲဖဲ လါယူၤ(၂၆)သီအနံၤန့ၣ်လီၤ.
ယိၤဒိၣ်ကီၫ်စဲၣ်ကလံၤစိးတပၤ သုးကီၣ်ကးအသုးကလၢၤလၢအိၣ်ဖဲ နီၣ်ခၠိၣ်, ကၠီးမဲ, မိကိး, မိးမ့းဒီး သံၣ်ပီကီၫ်ဆၣ်အပူၤတဖၣ် တၫ်ထီၣ်ဒုးမၤန့ၫ်ဒ် “၁၀၂၇ဒုးယၤရဲၣ်ကျဲၤ“အသိး၀ံၤ တၫ်မၤန့ၫ်စ့ၫ်ကီး ကျိချံပှာ်သၣ်အါအါဂီၫ်ဂီၫ်အဂ့ၫ် စံး၀ဲန့ၣ်လီၤ.
သုးကီၣ်ကးအပှၤသုးဖိလၢဟဲပာ်လီၤစုက၀ဲၤတဖၣ်တၫ်ပၢဆှၢဃၣ်၀ဲ၀ံၤတၫ်ဒုးတဖၣ်ဆူၣ်ထီၣ်ဒံးအဖၢမုၫ်လီၤအဂ့ၫ် TNLAတၫ်ကစီၣ်ပှၤဘၣ်မူဘၣ်ဒါ လွ့ၣ်ယ့ၣ်အူ တဲ၀ဲန့ၣ်လီၤ.
“ကတီၫ်ခဲအံၤန့ၣ် ပပၢဆှၢပာ်အီၤဒံးလီၤ. လီၫ်ခံတၫ်ရဲၣ်တၫ်ကျဲၤန့ၣ် တသ့ၣ်ညါဒံးဘၣ်. ဖဲကီၫ်ဆၣ်တဖၣ်အပူၤ တၫ်ဒုးတဖၣ်ဆူၣ်ထီၣ်ဒံးလီၤ. သုးကီၣ်ကးတပၤခးစၢၤကျိဖးဒိၣ်တဖၣ်, ဟဲဒုး၀ဲလၢကလံၤကျါတဖၣ်အိၣ်၀ဲန့ၣ်လီၤ.“
တၫ်ဒုးဆူၣ်ထီၣ်လၢ ကၠီးမဲကီၫ်ဆၣ်အပူၤ လါယူၤ(၂၆)သီအနံၤ, (၁)နၣ်ရံၣ်အဆၢကတီၫ် ခးလီၤကျိဖးဒိၣ်လဲၤလီၤတဲာ်ပိာ်ဖးထီၣ်၀ဲအဃိ ဟံၣ်ဖိဃီဖိ(၄)ဂၤသံ၀ဲအဂ့ၫ် လီၫ်က၀ီၤကမျၢၫ်တဖၣ် စံး၀ဲန့ၣ်လီၤ. တကးဒံးဘၣ် လီၫ်က၀ီၤကမျၢၫ်အဂၤ(၂)စ့ၫ်ကီး ဘၣ်ဒိ၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
လါယူၤ(၂၅)သီအနံၤစ့ၫ်ကီး ကၠီးမဲကီၫ်ဆၣ်အပူၤ ကျိဖးဒိၣ်လဲၤလီၤတဲာ်ပိာ်ဖးထီၣ်၀ဲအဃိ လီၫ်က၀ီၤကမျၢၫ်(၂)ဂၤသံ၀ဲ၀ံၤ (၄)ဂၤဘၣ်ဒိ၀ဲန့ၣ်လီၤ.
RFAအတၫ်မၤနီၤထၢဖှိၣ်စရီအဖီခိၣ် စးထီၣ်လၢသုးဟံးန့ၫ်ဆူၣ်ထံကီၫ်တၫ်စိတၫ်ကမီၤဒီးတုၤ(၂၀၂၄)နံၣ်, လါမ့ၤန့ၣ် ခီဖျိလၢကလံၤကျါဒီးကျိဖးဒိၣ်တဖၣ်အဃိ လီၫ်က၀ီၤကမျၢၫ်ခဲလၢာ်ပာ်ဖှိၣ်(၁၉၄၂)ဂၤသံ၀ဲ၀ံၤ (၃၈၆၆)ဂၤစ့ၫ်ကီးဘၣ်ဒိ၀ဲန့ၣ်လီၤ.
