လါယူၤ(၃)သီ, ၂၀၂၄နံၣ်
ဖဲအပူၤကွံာ် စးထီၣ်ဖဲလါမးရှးအလၢာ် တၫ်ဒုးဆူၣ်ထီၣ်ကဒါက့ၤအဃိ တနီသရံၣ်ကီၫ်ခီ ပှၤဃ့ၫ်သုးပှၤလီၫ်အိၣ်ကမှံဖိလၢ ဃ့ၫ်အိၣ်ခူသူၣ် လၢကစၢၫ်ကလိပှၫ်ပူၤတဖၣ်အဂီၫ် လိၣ်ဘၣ်တၫ်စူၤအကတီၫ် ဂ့ၫ်ဂီၫ်အူတၫ်မၤစၢၤတဖၣ်လီၤ. တနီသရံၣ်ကီၫ်ခီအပူၤ သုးကီၣ်ကးအသုးဒီး တၫ်ပၢၫ်ဆၢဂံၫ်ဘါကရၢတဖၣ်အဘၢၣ်စၢၤ သုးဂ့ၫ်၀ီတၫ်ဖ့ၣ်ဆၢအိၣ်ထီၣ်တကးဘၣ် တၫ်ဟဲထီၣ်လၢသုးကျိၤတဖၣ်အဃိ ပှၤလီၫ်အိၣ်ကမှံအသီ အါထီၣ်၀ဲလီၤ.
မ့ၫ်လၢတၫ်စူၤလီၤသီအကတီၫ် တုၤဃီၤလံအဃိ ပှၤလီၫ်အိၣ်ကမှံဖိတဖၣ် လိၣ်ဘၣ်တၫ်ပီးတၫ်လီလၢ တၫ်ကဒီသဒၢ မူခိၣ်စူၤထံအဂီၫ်, တၫ်အီၣ်တၫ်အီလီၤစှၤအသိး, ဆူၣ်ချ့တၫ် ကဟုကယာ်အဂီၫ် ကသံၣ်ကသီတၫ်လိၣ်ဘၣ်စ့ၫ်ကီး အိၣ်၀ဲလီၤ.
ဖဲအံၤန့ၣ် ပှၤဃ့ၫ်သုးပှၤလီၫ်အိၣ်ကမှံဒဲက၀ီၤ လီၤတံၫ်လီၤဆဲးတအိၣ်ဘၣ်. ဘၣ်တ့ထီၣ်ဒဲ လၢပှၫ်ပူၤဒီးဘၣ်အိၣ်ဆိး၀ဲလီၤ. ပှၤလီၫ်အိၣ်ကမှံဖိအနီၫ်ဂံၫ် ဟဲအိၣ်အါထီၣ်အဃိ လိၣ်ဘၣ်တၫ်ပီးတၫ်လီလၢ တၫ်ဒီသဒၢမူခိၣ်စူၤထံအဂီၫ်လီၤ. တၫ်မ့ၫ်စူၤန့ၣ်ကဲထီၣ်တၫ်ကီတၫ်ခဲလီၤ. တၫ်အီၣ်တၫ်အီ, ကသံၣ်ကသီ တလၢတပှဲၤဘၣ်. မ့ၫ်လၢတၫ်စူၤအကတီၫ်အဃိ ပှၤလီၫ်အိၣ်ကမှံဖိတဖၣ် ကွၫ်ဆၢၣ်မဲာ်ဘၣ် တလိၤကိၫ်သွံၣ်ယွၤတၫ်ဆါ (ရာသီတုပ်ကွေးရောဂါ), တၫ်ညၣ်ဂိၫ်တၫ်ဆါ(ငှက်ဖျားရောဂါ)ဒီး တၫ်ဟၢဖၢလူတၫ်ဆါ(ဝမ်းပျက်ဝမ်းလျှောရောဂါ) တဖၣ်အဂ့ၫ် ပှၤမၤစၢၤပှၤလီၫ်အိၣ်ကမှံဖဲန့ၣ်တဂၤတဲ၀ဲလီၤ.
တနီသရံၣ်ကီၫ်ခီအပူၤ တၫ်ဒုးတဖၣ်အဃိ တၫ်အီၣ်တၫ်အီဒီး ကသံၣ်ကသီ တၫ်ဆှၢထီၣ်ဆှၢလီၤအီၤဘၣ်တၫ်ပာ်ပနီၣ်ဃာ်အဒူၣ်အဆၢအိၣ်၀ဲ၀ံၤ ပနံာ်အပှ့ၤကလံၤဒိၣ်ထီၣ်ဒီး တၫ်ကးတံာ်ဃာ်တၫ်တဖၣ်အဃိ ပှၤလၢဆီၣ်ထွဲမၤစၢၤတၫ်တဖၣ်စ့ၫ်ကီး ထံၣ်ဘၣ်တၫ်ကီတၫ်ခဲလီၤ.
တနီသရံၣ်ကီၫ်ခီ, ဖဲအပူၤကွံာ် လါမးရှးအပူၤ ခံကပၤတၫ်ဒုးတဖၣ်အဃိ ပှၤဘၣ်ပာ်တ့ၫ်ဟံၣ်ဃီ ဃ့ၫ်ပူၤဖျဲးသးအါထီၣ်၀ဲ ယဲၫ်ကထိလွံၫ်ကလးဂၤဘျဲၣ်အဂ့ၫ် လီၫ်က၀ီၤတၫ်ဃုသ့ၣ်ညါကရၢ လၢအမ့ၫ် FE5 Tanintharyi ဖဲလါအ့ဖြ့ၣ်(၁၃)သီနံၤ တၫ်ဘိးဘၣ်ရၤလီၤပူၤ ပာ်ဖျါဃာ်၀ဲအဖီခိၣ် တၫ်သ့ၣ်ညါဘၣ်လီၤ.
ref:vom
