လါမ့ၤ(၂၁)သီ, ၂၀၂၄နံၣ်
ရခၢၣ်ကီၫ်စဲၣ်ကလံၤစိး, ဘူသံတီၣ်, မီၣ်တီဒီး သၣ်တွဲကီၫ်ဆၣ်တဖၣ်အပူၤ တၫ်ဒုးတဖၣ်ဟဲဆူၣ်ထီၣ်သ့အဃိ လီၫ်က၀ီၤကမျၢၫ်တဖၣ်ဒီး ထံရူၫ်ကီၫ်ဂၤတၫ်ကရၢကရိတဖၣ် တၫ်ကသုးလီၫ်သုးကျဲဆူတၫ်လီၫ်လၢအပူၤဖျဲးအလီၫ်တဖၣ်အအိၣ် အဆိအချ့အဂီၫ် ရခၢၣ်ဒီကလုာ်ကရၢခိၣ်ကျၢၫ် ဟ့ၣ်ပလီၫ်ထုးထီၣ်ပာ်ဖျါဃာ်၀ဲလၢ လါမ့ၤ(၂၀)သီမုၫ်နံၤလံာ်ဘိးဘၣ်ရၤလီၤန့ၣ်လီၤ.
သုးကီၣ်ကးတပၤသူ၀ဲကလံၤကျါဒီးထံကျါပာ်ဃုာ် ခးစ့ၫ်ကီးကျိဖးဒိၣ်တဖၣ်ကိးနံၤဒဲးဆူ ရခၢၣ်ကီၫ်စဲၣ်ကလံၤစိးတပၤအဃိ လီၫ်က၀ီၤကမျၢၫ်တဖၣ် တၫ်ကခူၣ်လီၤပာ်တၫ်ဒီသဒၢမ့ၣ်ပိၫ်တၫ်ပူၤတဖၣ်အဂီၫ်ဒီး တၫ်ကသုးလီၫ်သုးကျဲအဆိအချ့လၢ တၫ်လီၫ်လၢအပူၤဖျဲးအလီၫ်အဂီၫ် ဒုးသ့ၣ်ညါဃာ်၀ဲန့ၣ်လီၤ.
ထံဂုၤကီၫ်ဂၤတၫ်ကရၢကရိပှၤဘၣ်မူဘၣ်ဒါတဖၣ်လၢ အိၣ်၀ဲဖဲလီၫ်က၀ီၤအပူၤတဖၣ် တၫ်ကဘံၣ်ဘၢအဂီၫ် တၫ်ကသုးလီၫ်သုးကျဲဆူတၫ်လီၫ်လၢအပူၤဖျဲးအလီၫ်တဖၣ်အဂီၫ်ဒီး မ့ၫ်အိၣ်ကးတံာ်သးလၢတၫ်ဒုးကဲထီၣ်ဟီၣ်က၀ီၤအပူၤန့ၣ် တၫ်ဆဲးကျိးဃ့တၫ်မၤစၢၤသ့လၢ ရခၢၣ်ဒီကလုာ်ကရၢခိၣ်ကျၢၫ်ဒီး ရခၢၣ်သုးမုၫ်ဒိၣ်အအိၣ်အဂ့ၫ် စံး၀ဲန့ၣ်လီၤ.
ရခၢၣ်ကီၫ်စဲၣ်ကလံၤစိးတပၤ တၫ်ဒုးတဖၣ်ဆူၣ်ထီၣ်၀ံၤ သုးကီၣ်ကးတပၤ ပညိၣ်၀ဲလီၫ်က၀ီၤကမျၢၫ်တဖၣ်၀ံၤ တၫ်ဆါဟံၣ်, တၫ်ဆါတၫ်ပှ့ၤကျး, တၫ်မၤလိကၠိတဖၣ်ဒီး တၫ်ဘူၣ်တၫ်ဘါတၫ်သူၣ်ထီၣ်တဖၣ် ဟဲဒုး၀ဲလၢကလံၤကျါတဖၣ်, ခးကျိဖးဒိၣ်တဖၣ်အိၣ်၀ဲအသိး ဒွဲၣ်အူမၤဟးဂီၤကွံာ်တၫ်တဖၣ်စ့ၫ်ကီးအိၣ်၀ဲအဂ့ၫ် ပာ်ဖျါဃာ်၀ဲလၢ အလံာ်ဘိးဘၣ်ပာ်ဖျါအပူၤန့ၣ်လီၤ.
ဖဲလါမ့ၤ(၁၈)သီအနံၤန့ၣ် ရခၢၣ်သုးမုၫ်ဒိၣ်(AA)ထီၣ်ဒုးမၤန့ၫ်ဃာ်၀ဲ သုးကီၣ်ကးအသုးကလၢၤတဖၣ်လၢ အိၣ်ဖဲ ဘူသံတီၣ်ကီၫ်ဆၣ်ပူၤအဂ့ၫ် ဘိးဘၣ်ပာ်ဖျါဃာ်၀ဲန့ၣ်လီၤ.
