လါမ့ၤ(၁၆)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်မုၫ်တြီၫ်, သုးက့နီၣ်ဂံၫ်(၅)ဟီၣ်က၀ီၤ, သုးကီၣ်ကး အသုးကလၢၤလၢအိၣ်တ့ၫ်ဖဲအဘူးဒီး ၀့ၫ်ဖၣ်ပူၣ်အကပၤတဖၣ် KNLA ဒီး တၫ်ပၢၫ်ဆၢသုးပာ်ဖှိၣ်တဖၣ် ဟ့ၣ်ဆီၣ်သနံးက၀ီၤဒုးအီၤအဃိ သုးကီၣ်ကးတပၤ ဟဲတ့ၫ်လီၤမ့ၣ်ပိၫ် မုၫ်နၤမုၫ်ဆါန့ၣ်လီၤအဂ့ၫ် တၫ်သ့ၣ်ညါဘၣ်လၢ လီၫ်က၀ီၤဂံၫ်ခီၣ်ထံးတၫ်ကစီၣ်တဖၣ် အအိၣ်န့ၣ်လီၤ.
ကတီၫ်ခဲအံၤ ၀့ၫ်ဖၣ်ပူၣ်အကပၤ သုးကီၣ်ကး အသုးကလၢၤ လၢအိၣ်တ့ၫ်တဖၣ်မ့ၫ်၀ဲ ၃၄၀, ၆၄၂ ဒီး သုးတၫ်တိာ်ကူၣ်ခိၣ်သ့ၣ်တၫ်လူၫ်ခိၣ်တဖၣ်အပူၤ သုးကီၣ်ကး အပှၤသုးဖိတဖၣ် ကပာ်တ့ၫ်သုးကလၢၤ ကဟးထီၣ်ကွံာ်အဂီၫ် တၫ်ပၢၫ်ဆၢသိၣ်မှံကရၢတဖၣ် ဂုာ်ကျဲးစၢးဟ့ၣ်ဆီၣ်သနံးက၀ီၤဒုးအီၤအဂ့ၫ် တၫ်သ့ၣ်ညါဘၣ်န့ၣ်လီၤ.
သုးကလၢၤလၢအိၣ်တ့ၫ်တဖၣ် သုတလီၤအဂီၫ် စှၤသီအတီၫ်ပူၤ သုးကီၣ်ကးတပၤသူ၀ဲ ကဘီယူၤဒုးသုး(၄)ခိၣ်ဒီး ကိးမုၫ်နံၤဃၣ်ဃၣ် ဟဲတ့ၫ်လီၤနါစိၤမ့ၣ်ပိၫ်တဖၣ်အသိး ခးစ့ၫ်ကီးကျိဖးဒိၣ်တဖၣ်အိၣ်၀ဲအဂ့ၫ် တၫ်သ့ၣ်ညါဘၣ်န့ၣ်လီၤ. သုးကီၣ်ကးတပၤ ဟဲတ့ၫ်လီၤမ့ၣ်ပိၫ်တဖၣ်ဖဲ သုးရ့ၣ်(၃၄၀)ဒီး (၆၄၂)အကပၤန့ၣ်လီၤ.
သုးကီၣ်ကးအသုးရ့ၣ်လၢအိၣ်ဖဲ၀့ၫ်ဖၣ်ပူၤအကပၤတဖၣ်မ့ၫ်၀ဲ သုးရ့ၣ်(၁၉, ၃၄၀, ၃၄၁, ၆၄၂, ၄၃၄) ဒီး သုးတၫ်တိာ်ကူၣ်ခိၣ်သ့ၣ်တၫ်လူၫ်ခိၣ်တဖၣ်န့ၣ်လီၤ.
မ့မ့ၫ်လၢ သုးရ့ၣ်(၁၉)ဒီး (၄၃၄)တဖၣ်တခီ KNLA ဒီး တၫ်ပၢၫ်ဆၢသိၣ်မှံကရၢသုးပာ်ဖှိၣ်တဖၣ် ထီၣ်ဒုးမၤန့ၫ်ဃာ်၀ဲန့ၣ်လီၤ. သုးကီၣ်ကး အသုးကလၢၤလၢအိၣ်တ့ၫ်ဖဲ အဘူးဒီး၀့ၫ်ဖၣ်ပူၣ်တဖၣ်မ့ၫ်၀ဲ (၃၄၀, ၃၄၁, ၆၄၂) ဒီးသုးတၫ်တိာ်ကူၣ်ခိၣ်သ့ၣ်တၫ်လူၫ်ခိၣ်န့ၣ်လီၤ.
ref:salweenpress
