လါမ့ၤ(၆)သီ, ၂၀၂၄နံၣ်
ဟီၣ်က၀ီၤပူၤ တရူး(တရုတ်) သုးဂ့ၫ်၀ီတၫ်ဟူးတၫ်ဂဲၤတဖၣ် တၫ်ခီၣ်ဆၢအီၤကန့ၫ်အဂီၫ် တၫ်ပာ်ဖှိၣ်မၤသကိးတၫ် ကဆူၣ်ထီၣ်အဂ့ၫ် ကီၫ်အမဲရကၤ(အမေရိကန်)ပာ်ဃုာ် ထံကီၫ်(၄)ဘ့ၣ် တၫ်ဒီသဒၢကိတိာ်တဖၣ် အၢၣ်လီၤတူၫ်လိာ်၀ဲလီၤ.
အမဲရကၤတၫ်ဒီသဒၢကိတိာ်(အမေရိကန်ကာကွယ်ရေးဝန်ကြီး) လွဲးအီၣ်စတ့ၣ်(လွိုက်အော်စတင်), ယပၣ်တၫ်ဒီသဒၢကိတိာ်(ဂျပန်ကာကွယ်ရေးဝန်ကြီး) ကံၣ်ယၣ်ဟၣ်မံၣ်နိၣ်ရူ (ကီရာဟာမီနိုရူ), အီစတြ့လယါ တၫ်ဒီသဒၢကိတိာ် (သြစတြေးလျ ကာကွယ်ရေးဝန်ကြီး) ယံးခၠဲးမၣ်လဲး (ရစ်ချက်မာလက်စ်), ဖံလံးပံးတၫ်ဒီသဒၢကိတိာ် (ဖိလစ်ပိုင် ကာကွယ်ရေးဝန်ကြီး) ကံၣ်ဘၣ်တိၣ် သံၣ်အိၣ်ဒိၣ်ရိၣ်(ဂီလ်ဘာတိုသီအိုဒိုရို)တဖၣ် ဖဲလါမ့ၤ(၃)သီနံၤ ထံၣ်လိာ်တၢၣ်ပီၣ်တဲသကိးတၫ် ဖဲဟၣ်၀ၣ်ယံၣ်(ဟာဝိုင်ယီ)၀ံၤ အၢၣ်လီၤတူၫ်လိာ်၀ဲဒ်သိးအံၤန့ၣ်လီၤ.
ထံဂုၤကီၫ်ဂၤ ထံတၫ်ပၢအပူၤ ဖံလံးပံး(ဖိလစ်ပိုင်)ကဘီတဖၣ် ကလဲၤဘၣ်တၫ်လၢတၫ်သဘျ့ပူၤအဂီၫ် တရူး(တရုတ်) တကပၤ မၤတံာ်တၫ် အဘျီတဖၣ်အဘျီအဃိ မုၫ်ထီၣ်ဒီးကလံၤထံးတရူးပီၣ်လဲၣ်ပူၤ(အရှေ့နဲ့တောင်တရုတ်ပင်လယ်) တၫ်ကဲထီၣ်သးတဖၣ် မ့ၫ်တၫ်လီၤဘၣ်ယိၣ်ဒိၣ်မးအဂ့ၫ် ထံကီၫ်(၄)ဘ့ၣ် တၫ်ဒီသဒၢကိတိာ် (ကာကွယ်ရေးဝန်ကြီး)တဖၣ်တဲ၀ဲလီၤ. လၢအခီၣ်ထံးန့ၣ် ယပၣ်(ဂျပန်), အမဲရကၤ(အမေရိကန်)ဒီး အီးစတြ့လယါ (သြစတြေးလျ) ကပာ်ဖှိၣ်ဂဲၤလိသုးလၢ အမဲရကၤ အ F-35ကဘီယူၤဒုးသုးတဖၣ်အဂီၫ် အၢၣ်လီၤသကိး၀ဲလီၤ.
အ့ၣ်ဒိၣ်-ပစံးဖ့းဟီၣ်က၀ီၤ တၫ်ကပၢၤဃာ် တၫ်မုာ်တၫ်ခုၣ်ဒီး တၫ်ဘံၣ်တၫ်ဘၢအဂီၫ် သိၣ်မှံၤတဖၣ်အတၫ်ပာ်ဖှိၣ် မၤသကိးန့ၣ် မ့ၫ်တၫ်အရ့ဒိၣ်အဂ့ၫ် ယပၣ်တၫ်ဒီသဒၢကိတိာ် တဲ၀ဲလီၤ. ကီၫ်ယပၣ်တကပၤ ဘၣ်ထွဲဒီးဟီၣ်က၀ီၤ တၫ်ဘံၣ်တၫ်ဘၢန့ၣ် ကပာ်ဖှိၣ်မၤသကိးတၫ်ဘူးဘူးတံၫ်တံၫ်ဒီး အမဲရကၤ, အီစတြ့လယါ, ဖံးလံးပံးတဖၣ်အဂ့ၫ် ယပၣ်တၫ်ဒီသဒၢကိတိာ် တဲစ့ၫ်ကီး၀ဲလီၤ.
#vom
