လါမ့ၤ(၂)သီ, ၂၀၂၄နံၣ်
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ သုးကီၣ်ကး အစုတီၤဖီလာ်အပှၤသုး(၆၀၀)ဘျဲၣ် ဟဲတုၤ၀ဲဒၣ်ဆူ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်ချၢၣ်လွံၫ်ထူၣ်, ၀့ၫ်လၢၫ်ဒိၣ်ပူၤ၀ံၤ သုးကီၣ်ကး အပှၤသုး(၆၀၀)ဘျဲၣ်အံၤ တၫ်ကလဲၤထီၣ်ဆူသုးက့(၅)ဟီၣ်က၀ီၤပူၤအဂ့ၫ် တၫ်သ့ၣ်ညါဘၣ်လၢ လီၫ်က၀ီၤဂံၫ်ခီၣ်ထံးတၫ်ကစီၣ်အအိၣ်န့ၣ်လီၤ.
“သုးကီၣ်ကးအသုးတဖၣ် ဟဲ၀ဲဆူ၀့ၫ်မုၫ်ဃါပျီ(နတ်သံကွင်း)တပၤ တနီဘၣ်အဃိ ဟဲ၀ဲဖဲထံပူၤလူၫ်(ရေတွင်းကုန်း), မာ်ပံးလူၫ်(အုန်သျှစ်ကုန်း)ထးခီလၢ တၫ်ခီကီၤလိာ်ကျိ(ပရဲလိာ်ကျိ)န့ၫ်တပၤ၀ံၤ ဟဲခီ၀ဲန့ၣ်လီၤ. အ၀ဲသ့ၣ်ဟဲ၀ဲစှၤဂၤဒီး ပာ်ဖှိၣ်ထီၣ်သး၀ံၤ အသုးကျိၤတဖၣ် ဂုာ်ကျဲးစၢးကဟဲထီၣ်ဆူ ခ့ၣ်အဲၣ်ယူၣ်-သုးက့နီၣ်ဂံၫ်(၅)ဟီၣ်က၀ီၤပူၤ” အဂ့ၫ် ဂံၫ်ခီၣ်ထံးတၫ်ကစီၣ် စံး၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၣ်ဂံၫ်(၅), ကီၫ်ရ့ၣ်မုၫ်တြီၫ်အပူၤ ၀့ၫ်ဖၣ်ပူၣ်ပာ်ဃုာ် ၀့ၫ်ဖၣ်ပူၣ်အိၣ်သူၣ်လီၤ သုးကီၣ်ကး အသုးရ့ၣ်(၁၉)ဒီး (၄၃၄)သုးကလၢၤတဖၣ်အံၤ တယံၤဒံးဘၣ်ကတီၫ် တၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤန့ၫ်ဃာ်၀ဲန့ၣ်လီၤ.
သုးကီၣ်ကး အသုးကလၢၤတဖၣ်လၢအိၣ်တ့ၫ်ဒံးလၢ ဖၣ်ပူၣ်ဟီၣ်က၀ီၤပူၤတဖၣ် KNLA ဒီး တၫ်ပၢၫ်ဆၢသုးပာ်ဖှိၣ်တဖၣ် က၀ီၤကးတံာ်ဃာ်၀ဲအဂ့ၫ်စ့ၫ်ကီး တၫ်သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၣ်ဂံၫ်(၅), ကီၫ်ရ့ၣ်မုၫ်တြီၫ်အပူၤ ဖၣ်ပူၣ်အိၣ်သူၣ်လီၤ သုးကီၣ်ကး အသုးရ့ၣ်တဖၣ်လၢအမ့ၫ် သုးရ့ၣ်-(၁၉၊ ၃၄၀၊ ၃၄၁၊ ၄၃၄၊ ၆၄၂)ဒီး သုးတၫ်တိာ်ကူၣ်ခိၣ်သ့ၣ်တၫ်လူၫ်ခိၣ်တဖၣ်အိၣ်၀ဲန့ၣ်လီၤ.
ref:salweenpress
