လါအ့ဖြ့ၣ်(၂၄)သီ, ၂၀၂၄နံၣ်
ရၤမတံဟီၣ်က၀ီၤ သုးကီၣ်ကးဒီး တၫ်ပၢၫ်ဆၢဂံၫ်ဘါကရၢတဖၣ်အဘၢၣ်စၢၤ တၫ်ဒုးလၢကဲထီၣ်တဖၣ် ကဒိးန့ၫ်ဘၣ် တၫ်မုာ်တၫ်ခုၣ်အဂီၫ် ကၠီၣ်တဲၣ်တကပၤတဲ၀ဲလၢ အိၣ်ကတဲာ်ကတီၤပာ်သးလၢ ကနုာ်လီၤဘှါဆှဲန့ၫ်တၫ်လၢ တၫ်ဘၢၣ်စၢၤအဂ့ၫ်န့ၣ်လီၤ.
ကီၫ်ပယီၤတၫ်သဘံၣ်သဘုၣ်အဖီခိၣ် ကၠီၣ်တဲၣ်အတၫ်အိၣ်ဆၢထၢၣ်တခီဒု မ့ၫ်ဒၣ်တၫ်ကဃုအစၢလၢတၫ်မုာ်တၫ်ခုၣ်အဂီၫ် ကမၤစၢၤ၀ဲဒီး ကဟ့ၣ်ဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤတဖၣ်အဂ့ၫ် ကၠီၣ်တဲၣ်ကိတိာ်ခိၣ်ကျၢၫ် အနဲၣ်ရွဲၣ် Prommin Lertsuridej တဲ၀ဲလီၤ. ကၠီၣ်တဲၣ်တကပၤဒု မ့ၫ်ဒ်သိး ထံကီၫ်လၢအိၣ်ဘူးတဖၣ် အတၫ်သဘံၣ်သဘုၣ်တဖၣ် ကဘှါဆှဲန့ၫ်၀ဲအဂီၫ် ဒ်မၤ၀ဲသ့အသိး ကမၤစၢၤဆီၣ်ထွဲ၀ဲန့ၣ်လီၤ. တၫ်အံၤမ့ၫ်ဒ်သိး ထံဂုၤကီၫ်ဂၤတဖၣ် အတၫ်မုၫ်လၫ်အသိးလီၤအဂ့ၫ် Prommin Lertsuridej တဲ၀ဲလီၤ.
ပယီၤသုးကီၣ်ကးမ့ၫ်ဂ့ၤ, ကလုာ်ဒူၣ်ဖီၣ်စုက၀ဲၤမ့ၫ်ဂ့ၤ လၢတၫ်တၢၣ်ပီၣ်တဲသကိးပူၤ ကပာ်ဃုာ်၀ဲအဂီၫ် တဲ၀ဲလံဧါ တၫ်သံကွၫ်တခီဒု တဲဆၢက့ၤ၀ဲလၢ တၫ်ဃ့ထီၣ်တဖၣ်တအိၣ်ဒံးဘၣ်အဂ့ၫ်, ဘၣ်ဆၣ်သနာ်က့ ထံဂုၤကီၫ်ဂၤ၀ဲၤကျိၤတကပၤ မုၫ်လၫ်ဃာ်၀ဲလၢ တၫ်ကဘှါဆှဲသကိးလၢ တၫ်မုာ်တၫ်ခုၣ်ပူၤအဂ့ၫ် တဲ၀ဲလီၤ. ကၠီၣ်တဲၣ်-ပယီၤကီၫ်ဆၢ ကမံးတံာ်လီၤဆီလၢ ကိတိာ်ခိၣ်ကျၢၫ် ကရၢကရိ ဒုးအိၣ်ထီၣ်၀ဲ အပှၤပၢၤလီၫ်ဆ့ၣ်နီၤ ထံဂုၤကီၫ်ဂၤကိတိာ်စ့ၫ်ကီး ကဟဲသမံသမိးကွၫ် ကီၫ်ဆၢတၫ်အိၣ်သးတဖၣ်လီၤ.
ကၠီၣ်တဲၣ်ကမျၢၫ်ဆူၣ်ချ့ကိတိာ် Cholnam Srikaew စ့ၫ်ကီး ဖဲအပူၤကွံာ်စှၤသီအတီၫ်ပူၤ ဟဲဆူ၀့ၫ်မဲဆီးတၫ်ဆါဟံၣ်အသိး , လဲၤစ့ၫ်ကီးဆူ တးကီၫ်ရ့ၣ်တၫ်ဆါဟံၣ်(တက်ခ် ခရိုင်ဆေးရုံ), (၆)ဖျၢၣ်၀ံၤ ကီၫ်ပယီၤတၫ်ဒုး တဖၣ်အဃိ ဂ့ၫ်ဂီၫ်အူတၫ်အိၣ်သးလၢကဲထီၣ်တဖၣ် လဲၤကွၫ်၀ဲလီၤ. ဖဲလါအ့ဖြ့ၣ်အသီ(၂၀)နံၤဟါန့ၣ် ပှၤ(၂၂)ဂၤ ဘၣ်ဒိးကူစါယါဘျါသးလၢဂ့ၫ်ဂီၫ်အူတၫ်အိၣ်သးဒီး ပှၤလၢဘၣ်ဒိဘၣ်ထံးတဖၣ်အကျါ ပှၤ(၄၁)ဂၤ ကဘၣ်ဒိးကွဲးအသး၀ံၤ အ၀ဲသ့ၣ် မ့ၫ်စံာ်လီၤတၫ်ဆါဟံၣ်န့ၣ် တၫ်ကပာ်အီၤလၢ တၫ်ဘံၣ်တၫ်ဘၢကရၢတဖၣ် တၫ်ကွၫ်အီၤ အဖီလာ်န့ၣ်လီၤ.
ကီၫ်ကၠီၣ်တဲၣ်အံၤ ဟ့ၣ်ဆီၣ်ထွဲမၤစၢၤ ပှၤဃ့ၫ်သုးဘၣ်ကီဘၣ်ခဲဖိ ဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤတဖၣ် ခီဖျိလၢထံကီၫ်ခံဘ့ၣ် ဂာ်တဲာ်ဂီၤကရၢ(ကြက်ခြေနီအဖွဲ့) တဆီ၀ံၤ ကီၫ်ပယီၤတၫ်သဘံၣ်သဘုၣ်အဂီၫ် မုၫ်လၫ်၀ဲလၢ ကနုာ်လီၤဘှါဆှဲန့ၫ်တၫ်လၢတၫ်ဘၢၣ်စၢၤန့ၣ်လီၤ.
