လါအ့ဖြ့ၣ်(၄)သီ, ၂၀၂၄နံၣ်
ကရ့ၣ်နံၣ်ကီၫ်စဲၣ်(၃)နံၣ်ဘျဲၣ်အတီၫ်ပူၤ တၫ်ပၢၫ်ဆၢသုးဖိဘၣ်လီၤ၀ဲ(၅၁၅)ဂၤအဂ့ၫ် ကရ့ၣ်နံၣ်ထံဖိကီၫ်ဖိဂံၫ်ဘါကရၢ လၢအလဲၤထီၣ်လဲၤထီ PKPF ထုးထီၣ်ပာ်ဖျါ၀ဲန့ၣ်လီၤ. စးထီၣ်လၢသုးဟံးန့ၫ်ဆူၣ်ထံကီၫ်တၫ်စိတၫ်ကမီၤ၀ံၤ, တုၤလါမးၡး(၃၁)သီအနံၤ ကရ့ၣ်နံၣ်ကီၫ်စဲၣ်ပူၤ ဘၣ်ထွဲဒီးသုးဂ့ၫ်၀ီ, ထံရူၫ်ကီၫ်သဲးဒီး တၫ်လုၫ်သ့ၣ်ခါပတာ် ပှၤဂ့ၫ်၀ီခွဲးယာ်န့ၣ် ဖဲလါအ့ဖြ့ၣ်(၁)သီအနံၤတၫ်ပာ်ဖျါအပူၤ ပာ်ဖျါ၀ဲဒ်အံၤန့ၣ်လီၤ.
အပူၤကွံာ်တုၤလါဖ့ၤဘြူၤအါရံၤအလၢာ် တၫ်ဘိးဘၣ်ရၤလီၤစရီအဖီခိၣ် ကရ့ၣ်နံၣ်ဒီကလုာ်တၫ်ဒီသဒၢသုးမုၫ်ဒိၣ် KNDF, PDF, ကရ့ၣ်နံၣ်သုးမုၫ်ဒိၣ် KA ပူၤတၫ်ပၢၫ်ဆၢသုးဖိဘၣ်လီၤ၀ဲ (၄၈၉)ဂၤအဂ့ၫ်တၫ်ပာ်ဖျါထီၣ်၀ံၤ လါမးၡးဒီတလါအတီၫ်ပူၤတၫ်ပၢၫ်ဆၢသုးဖိဘၣ်လီၤ၀ဲ(၂၀)ဂၤဘျဲၣ်အဂ့ၫ် တၫ်သ့ၣ်ညါဘၣ်န့ၣ်လီၤ.
(၃)နံၣ်ဘျဲၣ်အတီၫ်ပူၤ သုးကီၣ်ကးတကပၤ ဘၣ်သံ၀ဲ(၃၂၀၀)ဘျဲၣ်၀ံၤ သုးကီၣ်ကးအသုးအသိလ့ၣ်ကျိၤ ဘၣ်တၫ်ဒုးအီၤအိၣ်၀ဲအဘျီ(၇၀)ဃၣ်ဃၣ်, ဒီးအကဘီယူၤဒုးသုး(၂)ဘ့ၣ်ဘၣ်ဟးဂီၤ၀ဲအဂ့ၫ် PKPF ဘိးဘၣ်ပာ်ဖျါဃာ်၀ဲန့ၣ်လီၤ.
လီၫ်က၀ီၤကမျၢၫ်ထံဖိကီၫ်ဖိ ဘၣ်တၫ်မၤသံအီၤအဂၤ(၄၈၀)ဘျဲၣ်၀ံၤ ဖဲအ၀ဲသ့ၣ်ဃ့ၫ်ပူၤဖျဲးအသး လၢတၫ်ဒုးတၫ်ယၤအဆၢကတီၫ်စ့ၫ်ကီး ဘၣ်သံ၀ဲအဂၤ(၁၅၀)ဘျဲၣ်အိၣ်အဂ့ၫ်တၫ်ပာ်ဖျါ၀ဲန့ၣ်လီၤ. ပှၤလၢဘၣ်တၫ်ဖီၣ်အီၤအိၣ်အဂၤ(၁၅၀)ဘျဲၣ်အဂ့ၫ်တၫ်ပာ်ဖျါဃာ်စ့ၫ်ကီးန့ၣ်လီၤ.
တၫ်ဒုးကဲထီၣ်အဘျီ(၁၀၀၀)ဘျဲၣ်၀ံၤ သုးကီၣ်ကး ဟဲခးလီၤတၫ်ဒီးကဘီယူၤအိၣ်၀ဲအဘျီ(၁၄၀၀)ဘျဲၣ်အဂ့ၫ် တၫ်ဘိးဘၣ်ရၤလီၤအပူၤပာ်ဖျါ၀ဲန့ၣ်လီၤ. ကမျၢၫ်အိၣ်ဟံၣ်အဖျၢၣ်(၂၄၀၀)ဘျဲၣ်, တၫ်ဘူၣ်တၫ်ဘါတၫ်သူၣ်ထီၣ်အဖျၢၣ်(၅၀)ဃၣ်ဃၣ်, တၫ်ဆါဟံၣ်, တၫ်ဟ့ၣ်ကသံၣ်ဒၢး(၁၅)ဖျၢၣ်, တၫ်မၤလိကၠိအဖျၢၣ်(၂၀)ဘျဲၣ်ဘၣ်ဟးဂီၤ၀ဲအဂ့ၫ် PKPF တဲ၀ဲန့ၣ်လီၤ.
တၢလွံၫ်ဖျၢၣ်(၁၁၁၁) ဒုးယၤတၫ်ရဲၣ်တၫ်ကျဲၤအတီၫ်ပူၤ ကရ့ၣ်နံၣ်ကီၫ်စဲၣ်ပူၤ ၀့ၫ်(၇)၀့ၫ်ဒီး သုးကီၣ်ကးအသုးကလၢၤ(၈၀)ဘျဲၣ် ထီၣ်ဒုးမၤန့ၫ်၀ဲအဂ့ၫ် ကရ့ၣ်နံၣ် တၫ်ပၢၫ်ဆၢသုးပာ်ဖှိၣ်တဖၣ် ပာ်ဖျါထီၣ်၀ဲဖဲလါမးၡး(၂၃)သီအနံၤန့ၣ်လီၤ. လီၫ်က၀ီၤလၢသုးကီၣ်ကး ဒိၣ်စိ၀ဲအိၣ်တ့ၫ်ဒၣ်စှၤလီၫ်အဂ့ၫ် တဲ၀ဲစ့ၫ်ကီးန့ၣ်လီၤ.
Source: KNPF
