လါအ့ဖြ့ၣ်(၄)သီ, ၂၀၂၄နံၣ်
၂၀၂၃ နံၣ် ဒီတနံၣ်အတီၫ်ပူၤ ထံကီၫ်ဒီတဘ့ၣ် မ့ၣ်ပိၫ်ဒီးတၫ်လၢပိၫ်ဖးထီၣ်သ့ သုးတၫ်ပီးတၫ်လီလၢအိၣ်တ့ၫ်တဖၣ်အဃိ ကမျၢၫ်တၫ်ဘၣ်ဒိအိၣ်အါထီၣ်တုၤ(၃)ပူဃၣ်ဃၣ်အဂ့ၫ် ဘီမုၫ်စၢဖှိၫ်ဖိသၣ်စ့ပာ်ကီၤကရၢ (ကုလသမဂ္ဂကလေးများရန်ပုံငွေအဖွဲ့ ) UNICEF ဘိးဘၣ်ပာ်ဖျါ၀ဲဖဲ လါမးရှး (၃)သီနံၤန့ၣ်လီၤ.
၂၀၂၂ နံၣ်အတီၫ်ပူၤ ကမျၢၫ်တၫ်ဘၣ်ဒိဒီးဘၣ်သံ၀ဲ အနီၫ်ဂံၫ်အိၣ်(၃၉၀)ဂၤ၀ံၤ ၂၀၂၃ နံၣ်အတီၫ်ပူၤ အိၣ်၀ဲတုၤ(၁၀၅၂)ဂၤအဃိ အနီၫ်ဂံၫ် ဘူးထီၣ်(၃)ပူ မျးကယၤ (၂၇၀) အါထီၣ်၀ဲန့ၣ်လီၤ.
၂၀၂၃ နံၣ် ဒီတနံၣ်အတီၫ်ပူၤ မ့ၣ်ပိၫ်ဒီး တၫ်လၢပိၫ်ဖးထီၣ်သ့ သုးတၫ်ပီးတၫ်လီလၢအိၣ်တ့ၫ်တဖၣ်အဃိ ကမျၢၫ်ဘၣ်သံ (၁၈၈)ဂၤဒီး ဘၣ်ဒိအိၣ်(၈၆၄)ဂၤ၀ံၤ တၫ်ဘၣ်သံအကျါ ဖိသၣ်ပာ်ဃုာ်(၅၉)ဂၤန့ၣ်လီၤ.
တၫ်ဘၣ်ဒိဘၣ်ထံးအကျါ ဖိသၣ်အနီၫ်ဂံၫ်အိၣ်တုၤ(၁၆၈)ဂၤ၀ံၤ ထံကီၫ်ဒီတဘ့ၣ် မ့ၣ်ပိၫ်ဒီး သုးတၫ်ပီးတၫ်လီ လၢအိၣ်တ့ၫ်တဖၣ်ပိၫ်ဖးထီၣ်အဃိ ပှၤလၢတူၫ်ဘၣ်တၫ်ဘၣ်ဒိဘၣ်ထံး (၂၁)မျးကယၤန့ၣ် မ့ၫ်ဖိသၣ်တဖၣ်အဂ့ၫ် (UNICEF) စံး၀ဲန့ၣ်လီၤ.
စကဲ(စကိုင်း) ကီၫ်ခီအပူၤ ကမျၢၫ်တၫ်ဘၣ်ဒိဘၣ်ထံးအိၣ်အါကတၢၫ်၀ံၤ ကမျၢၫ်ဘၣ်သံ နီၫ်ဂံၫ်ပာ်ဖှိၣ် အိၣ်၀ဲ (၃၅) မျးကယၤအဂ့ၫ် တၫ်ဘိးဘၣ်ရၤလီၤအပူၤပာ်ဖျါဃာ်၀ဲန့ၣ်လီၤ.
ယိၤဒိၣ်ကီၫ်စဲၣ်, ပကိကီၣ်ခီ, အ့ၣ်ယၣ်၀တံၣ်ကီၫ်ခီ, ခၠီကီၫ်စဲၣ်, ကခၠ့ၫ်ကီၫ်စဲၣ်, ကရ့ၣ်နံၣ်ကီၫ်စဲၣ်, ကညီကီၫ်စဲၣ်, မကွ့ကီၫ်ခီ, မါတလ့ကီၫ်ခီ, တလၢၤကီၫ်စဲၣ်, တနီသရံၣ်ကီၫ်ခီ, ၀့ၫ်တကူၣ်ကီၫ်ခီ လီၫ်က၀ီၤသ့ၣ်တဖၣ် တၫ်သံဒီးတၫ်ဘၣ်ဒိဘၣ်ထံးအိၣ်အါကတၢၫ်န့ၣ်လီၤ.
တၫ်ကဲထီၣ်သးတဖၣ်အံၤမ့ၫ်လၢ ထံကီၫ်ဒီတဘ့ၣ် စုက၀ဲၤတၫ်သဘံၣ်သဘုၣ်တဖၣ်ကဲထီၣ်ဆူၣ်ဆူၣ်ကလဲာ်အဃိ ကမျၢၫ်တဖၣ်တူၫ်ဘၣ်၀ဲန့ၣ်လီၤ.
မ့ၣ်ပိၫ်ဒီး တၫ်စုက၀ဲၤလၢပိၫ်ဖးထီၣ်သ့တဖၣ်တၫ်ကွၫ်ထံဒီး တၫ်ဃုထံၣ်သ့ၣ်ညါကရၢ(စောင့်ကြည့်လေ့လာရေးအဖွဲ့) Landmine & Cluster Munition Monitor ဖဲ၂၀၂၃နံၣ် လါဒံၣ်စဲဘၢၣ် လၢခံကတၢၫ်တနွံအတၫ်ဘိးဘၣ်ရၤလီၤလံာ်ပာ်ဖျါအပူၤ ကီၫ်ဆၣ်(၃၃၀) ဘျဲၣ်အကျါ ကီၫ်ဆၣ်(၁၆၈)ဘ့ၣ်န့ၣ် တူၫ်ဘၣ်၀ဲမ့ၣ်ပိၫ်အတၫ်လီၤဘၣ်ယိၤတဖၣ်န့ၣ်လီၤ.
Photo: rfa
