လါမးရှး(၂၈)သီ, ၂၀၂၄နံၣ်
ကီၫ်ကၠီၣ်တဲၣ်ပဒိၣ် ဟ့ၣ်လီၤတၫ်မၤစၢၤဆူ ပယီၤဂာ်တဲာ်ဂီၤကရၢ(မြန်မာကြက်ခြေနီအသင်း)တဆီ ဒ်သိးကနီၤဟ့ၣ်လီၤတၫ်မၤစၢၤတဖၣ်အဖီခိၣ်န့ၣ် မ့ၫ်ဒၣ်တၫ်ကွၫ်ကပာ်ကွံာ်ထံဖိကီၫ်ဖိ အသးတၫ်တူၫ်ဘၣ်တဖၣ်လီၤအဂ့ၫ် KNU ဘိးဘၣ်ပာ်ဖျါ၀ဲလီၤ.
ကီၫ်ပယီၤပူၤတၫ်ဒိသူၣ်ဒိသးပှၤဟီၣ်ခိၣ်ဖိအတၫ်ဃံးတၫ်စ့ၤန့ၣ် မ့ၫ်တၫ်ဃံးတၫ်စ့ၤလၢ ပှၤကူပှၤကညီ ဒုးအိၣ်ထီၣ်၀ဲဒီး မ့ၫ်ပယီၤသုးပာ်ပနီၣ်ပညိၣ်၀ဲဒၣ် ထံဖိကီၫ်ဖိကမျၢၫ်တဖၣ် ဒ်တၫ်ခးပနီၣ်(ရည်ရွယ်ချက်ရှိရှိ ပစ်မှတ်ထား)ဒီး ဒုးယၤ၀ဲအဃိ အိၣ်ထီၣ်၀ဲဒၣ်န့ၣ်လီၤ.
တၫ်ဒိသူၣ်ဒိသးပှၤဟီၣ်ခိၣ်ဖိတၫ်မၤစၢၤအဖီခိၣ် ပယီၤသုးဃုထံၣ်၀ဲကျဲလၢ ကမၤန့ၫ်၀ဲ ထံရူၫ်ကီၫ်သဲး တၫ်ဘၣ်ဘျုးဘၣ်ဖှိၣ်အဂီၫ်ထီဘိဒီး ပယီၤဂာ်တဲာ်ဂီၤကရၢအံၤ မ့ၫ်ဒၣ်ပယီၤသုး အသုးပာ်ကီၤဂံၫ်ဘါဒီး မ့ၫ်တၫ်ကရၢကရိတခါလၢ မၤစၢၤဆီၣ်ထွဲ၀ဲပယီၤသုးန့ၣ်လီၤ.
တၫ်ကရၢကရိတဖုလၢ မၤဘျုးသုးတဖု လၢပာ်ထံဖိကီၫ်ဖိဒ်တၫ်ခးပနီၣ်တဖၣ်ဒီး တၫ်မ့ၫ်စူးကါအီၤဒ်ခၢၣ်စးအသိး လၢတၫ်နီၤဟ့ၣ်လီၤ တၫ်ဒိသူၣ်ဒိသးပှၤဟီၣ်ခိၣ်ဖိတၫ်မၤစၢၤန့ၣ် မ့ၫ်တၫ်ကွၫ်ကပာ်ကွံာ် ထံဖိကီၫ်ဖိကမျၢၫ်တဖၣ်လၢ ဘၣ်ကွၫ်ဆၢၣ်မဲာ်တၫ်ကီတၫ်ခဲဒီးတၫ်သူၣ်ကၫ်သးလီၤတဖၣ်န့ၣ်လီၤ.
ခီဖျိလၢသုးကီၣ်ကးခးလီၤတၫ်လၢကဘီယူၤ, ခးလီၤတၫ်လၢကျိဖးဒိၣ်တဖၣ်, နုာ်လီၤဂုာ်န့ၫ်ဆူၣ်တၫ်လၢဟံၣ်ပူၤဃီပူၤဒီး ဒွဲၣ်အူမၤဟးဂီၤကွံာ်တၫ်တဖၣ်အဃိ ပှၤလၢဘၣ်ဃ့ၫ်အိၣ်သဒၢတၫ်ဒုးတၫ်ယၤ, ကီၫ်ပူၤပှၤလီၫ်အိၣ်ကမှံ(IDPs) ဟဲဃ့ၫ်အိၣ်ကဒု၀ဲဆူ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ကီၫ်ရ့ၣ်ဖၣ်အၣ်(ဘားအံခရိုင်)ဟီၣ်က၀ီၤပူၤ, ကီၫ်ဆၣ်တန့ခၠါ, ကီၫ်ဆၣ်တၫ်ကြဲၫ်ဒီးကီၫ်ဆၣ်ဒူယီၫ်တဖၣ် လၢစံး၀ဲပှၤနီၫ်ဂံၫ်(၂၀၀၀၀)ဂၤအဂီၫ်န့ၣ် ဒ်ကီၫ်ကၠီၣ်တဲၣ် စီၤပၤကီၫ်ပဒိၣ် အတၫ်ရဲၣ်တၫ်ကျဲၤအသိး ဖဲ၂၀၂၄နံၣ်, လါမးရှး(၂၅)သီနံၤန့ၣ် ဆှၢဃီၤ၀ဲခီဖျိ ကၠီၣ်တဲၣ်အဂာ်တဲာ်ဂီၤ(ထိုင်းကြက်ခြေနီအသင်း)တဆီဒီး ဆူပယီၤအဂာ်တဲာ်ဂီၤ(မြန်မာကြက်ခြေနီအသင်း)အအိၣ် ဖဲမဲဆီး-ရၤမတံ(မဲဆောက်-မြဝတီ ) တၫ်ရ့လိာ်တိၤနီၫ်ဂံၫ်(၂), ကီၫ်ကၠီၣ်တဲၣ်, ၀့ၫ်မဲဆီးန့ၣ်လီၤ.
ဖဲ၂၀၂၄နံၣ်, လါမးရှး(၂၆)သီနံၤ တၫ်နီၤဟ့ၣ်လီၤ ပှၤဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤအကတီၫ် ဖဲ ၁၂ နၣ်ရံၣ် ၁၅ မံးနံး အဆၢကတီၫ် ပယီၤကလံၤသုး အကဘီယူၤဒုးသုးတဘ့ၣ် ဟဲပာ်ဖျါထီၣ်အဂံၫ်အဘါ ခီဂာ်၀ဲဒၣ် ၀့ၫ်တၫ်ကြဲၫ် အဖီခိၣ် ထံဖိကီၫ်ဖိကမျၢၫ်တဖၣ် ဘၣ်ဃ့ၫ်၀ဲဒၣ်လၢတၫ်ပျံၤတၫ်ဖုးအပူၤအိၣ်၀ဲအဂ့ၫ် ပာ်ဖျါ၀ဲလီၤ.
တၫ်ဂ့ၫ်ဘၣ်ထွဲဒီး ကီၫ်ပယီၤတၫ်ဒိသူၣ်ဒိသးပှၤဟီၣ်ခိၣ်ဖိ တၫ်မၤစၢၤတၫ်ဃံးတၫ်စ့ၤ အတၫ်တိစၢၤမၤစၢၤအကျိၤအကျဲ လၢအဂ့ၤအဘၣ်တဖၣ်န့ၣ် KNU ပာ်ဖျါဒီး ဆှၢထီၣ်တ့ၫ်လံ ဂံၫ်ခီၣ်ထံးတၫ်ဆိကမိၣ်ဆိကမးဆူ ASEAN အထံအကီၫ်ဒီး ဆူကီၫ်ကၠီၣ်တဲၣ် စီၤပၤ ကီၫ်ပဒိၣ်အအိၣ်လံန့ၣ်လီၤ.
ဖဲလၢထံကီၫ်ဒီတဘ့ၣ်ဃၣ်ဃၣ် လိာ်ဘၣ်၀ဲဂ့ၫ်ဂီၫ်အူ တၫ်ဒိသူၣ်ဒိသးပှၤဟီၣ်ခိၣ်ဖိတၫ်တိစၢၤမၤစၢၤ ဒ်သိးအံၤအဆၢကတီၫ်န့ၣ် အလီၫ်အိၣ်လၢ ပှၤလၢဘၣ်ထွဲဘၣ်ဃးတဖၣ်အဘၢၣ်စၢၤ ကကူၣ်လိာ်ထိၣ်ဃူလိာ်သးလၢဂ့ၫ်၀ီကိးကပၤဒဲးလၢအိၣ်ဒီးတၫ်အိၣ်ဖျိအိၣ်ဖျါ(ပွင့်လင်းမြင်သာမှု), တၫ်ဟံးန့ၫ်မူဟံးန့ၫ်ဒါ(တာဝန်ယူမှု), တၫ်တူၫ်မူတူၫ်ဒါဒီး တၫ်ဟ့ၣ်ခီဟ့ၣ်နီၤလိာ်သးတၫ်ကစီၣ်လၢညါမ့ၫ်၀ံၤမး ကဆိကမိၣ်သကိးတၫ်တိစၢၤမၤစၤအဂ့ၫ်ဆူညါန့ၣ် မ့ၫ်တၫ်သကွံာ်ကညးဆူ ထံကီၫ်လၢဟ့ၣ်တၫ်မၤစၢၤတဖၣ်အဂ့ၫ် KNU ပာ်ဖျါ၀ဲန့ၣ်လီၤ.
(Photo: Ministry of Foreign Affairs, Kingdom of Thailand)
