လါမးရှး(၂၆)သီ, ၂၀၂၄နံၣ်
ကီၫ်ရၢရှၢၣ်(ရုရှားနိုင်ငံ), ၀့ၫ်မီၣ်စကိၣ်(မော်စကို) တၫ်လဲၤခးတၫ်အပူၤ ပှၤဘၣ်သံ(၁၃၀)ဂၤဘျဲၣ်ကဲထီၣ်၀ံၤအလီၫ်ခံ ကီၫ်ဖြၣ်စ့ၣ်(ပြင်သစ်)ပူၤ ပဒိၣ်တဖၣ်စ့ၫ်ကီး ဟ့ၣ်ပလီၫ်ဃာ်ဘၣ်ထွဲတၫ်စုဆူၣ်ခီၣ်တကးဒီး ရၤလီၤဃာ်သုးအဂ့ၫ် တၫ်သ့ၣ်ညါဘၣ်န့ၣ်လီၤ.
ဖြၣ်စ့ၣ်ကီၫ်ခိၣ်(ပြင်သစ်သမ္မတ) Macron ဒီး တၫ်ဘံၣ်တၫ်ဘၢ(လုံခြုံရေး), ဘၣ်ထွဲတၫ်ဒီသဒၢ(ကာကွယ်ရေး) ပှၤဘၣ်မူဘၣ်ဒါတဖၣ် ထံၣ်လိာ်တဲသကိးတၫ်၀ံၤအလီၫ်ခံ ဟ့ၣ်ပလီၫ်၀ဲဒ်အံၤအဂ့ၫ် ဖြၣ်စ့ၣ်ကိတိာ်ခိၣ်ကျၢၫ် (ပြင်သစ်ဝန်ကြီးချုပ်) ကၣ်ဘရံၣ်ယၢၣ် (ဂါဘရီရယ်) တဲ၀ဲလီၤ.
လၢ၀့ၫ်ဖဲရံး(Paris) တယံာ်လၢၤဘၣ်တချုးတၫ်ကမၤ၀ဲ အိၣ်လဲၣ်ပံးတၫ်ပြၢ(အိုလံပစ်ပြိုင်ပွဲ)ဒံးဘၣ်အဆၢကတီၫ် ဆၢတဲာ်လီၤဃာ်၀ဲဒ်သိးအံၤ၀ံၤ အၣ်အဲးကရၢလၢလဲၤခးတၫ်ဖဲ ၀့ၫ်မီၣ်စကိၣ်အံၤ ဟဲမၤပျံၤမၤဖုးတၫ်လၢ ကီၫ်ဖြၣ်စ့ၣ်သ့၀ဲအဂ့ၫ် ကိတိာ်ခိၣ်ကျၢၫ်တဲ၀ဲလီၤ.
ကီၫ်ဖြၣ်စ့ၣ်(ပြင်သစ်နိုင်ငံ)န့ၣ် လၢတၫ်ဟ့ၣ်ပလီၫ်ဘၣ်ထွဲတၫ်စုဆူၣ်ခီၣ်တကး(အကြမ်းဖက်မှု)အဂီၫ် အိၣ်၀ဲအပတီၫ်(၃)ပတီၫ်၀ံၤ ကီၫ်ဖြၣ်စ့ၣ်, ကီၫ်ဂၤ (မ့တမ့ၫ်) မ့ၫ်တယာ်၀ဲလၢတၫ်တမံၤမံၤ ဟဲမၤပျံၤမၤဖုးအီၤ ဘူးထီၣ်လံန့ၣ်ဒီး ညီနုၫ်ထုးထီၣ်လံာ်တၫ်ဟ့ၣ်ပလီၫ်န့ၣ်လီၤ.
တုၤမ့ၫ်ဟ့ၣ်ပလီၫ်တၫ်ဒ်သိးအံၤ၀ံၤအလီၫ်ခံ လၢလ့ၣ်မ့ၣ်အူသန့(ရထားဘူတာ), ကဘီယူၤသန့(လေဆိပ်)ဒီး တၫ်ဘူၣ်တၫ်ဘါတၫ်လီၫ်တဖၣ်ပူၤ ဆီလီၤဃာ်တၫ်ဘံၣ်တၫ်ဘၢပာ်ဃုာ် တၫ်ဘံၣ်တၫ်ဘၢတၫ်ရဲၣ်တၫ်ကျဲၤ လၢအဂၤတဖၣ်စ့ၫ်ကီး ကမၤထွဲ၀ဲအိၣ်န့ၣ်လီၤ.
Ref : Reuters
Photo : Reuters
