သုးဒီးဒူသ၀ီပၢပြးကရၢတဖၣ် ထၢကျိာ်ထၢစ့ဒီးဃ့ကျိာ်ဃ့စ့လၢ ကမျၢၫ်တၫ်ဘၣ်ကဲသုးတၫ်ဘျၢအဖီခိၣ်

လါမးရှး(၁၈)သီ, ၂၀၂၄နံၣ်

လၢကီၫ်ပယီၤပူၤ သုးဒီးဒူသ၀ီပၢပြးကရၢ(စစ်တပ်နှင့် ရပ်ကွက်/ကျေးရွာအုပ်ချုပ်ရေး)တဖၣ် ထၢကျိာ်ထၢစ့ဒီး ဃ့ကျိာ်ဃ့စ့လၢ ကမျၢၫ်တၫ်ဘၣ်ကဲသုးတၫ်ဘျၢအဖီခိၣ် အိၣ်၀ဲအဂ့ၫ်တၫ်သ့ၣ်ညါဘၣ်န့ၣ်လီၤ.

လၢ၀့ၫ်တကူၣ်ကီၫ်ခီ, ၀့ၫ်တဲးကၠံ(တိုက်ကြီးမြို့), သနးခၠီ(သနပ်ချောင်း)သ၀ီအပူၤန့ၣ် သ၀ီသးပှၫ်မ့လွ့ၣ်(မင်းလွင်)ဒီး အပှၤတဖၣ် တဲ၀ဲလၢ ကမျၢၫ်တၫ်ဘၣ်ကဲသုးတၫ်ဘျၢအဖီခိၣ် သးစၫ်လၢကဘၣ်လီၤမူဒါတဖၣ်အဂီၫ် တဟံၣ်(၅)ကလးကၠးစုာ်စုာ်အဖီခိၣ် တၫ်ကဘၣ်ထၢန့ၫ်အီၤစ့အကလီၫ်(၅၀)ကၠးအဂီၫ်, ဟံၣ်လၢပှၤတနုာ်ဘၣ်ဒံးသုးတဖၣ် တလါတၫ်ကဘၣ်ဟ့ၣ်စ့(၃)ကလးကၠးစုာ်စုာ်အဂ့ၫ် တၫ်သ့ၣ်ညါဘၣ်လီၤ.

သ၀ီသးပှၫ် မ့လွ့ၣ်(မင်းလွင်)န့ၣ် မၢသးစၫ်တဖၣ်ဖီၣ်တၫ်ဖး(မဲနှိုက်)လီၤ. တၫ်ဖး(မဲ)မ့ၫ်ဘၣ်အလီၫ်ခံ သးစၫ်လၢကကဲသုးတဖၣ်အဂီၫ် တဂၤကဟ့ၣ်၀ဲအကလီၫ်(၅၀)ကၠးဒီးဃ့စ့န့ၣ်လီၤ. တဟံၣ်ဃ့၀ဲစ့(၅)ကလးကၠးလီၤ. တၫ်အံၤမ့ၫ်လၢကဟ့ၣ်၀ဲသးစၫ်လၢနုာ်လီၤသုးတဖၣ် တဂၤအကလီၫ်(၅၀)ကၠးအဂီၫ်လီၤဒီး ဃ့စ့န့ၣ်လီၤ. လၢခံတခါ တဟံၣ်တလါစုာ်စုာ်မၢတၫ်ဖၢနုာ်စ့(၃)ကလးကၠးလီၤ. တၫ်အံၤမ့ၫ်လၢကဆီၣ်ထွဲမၤစၢၤ သးစၫ်လၢကဲသုးတဖၣ်အဂီၫ်အဂ့ၫ် လီၫ်က၀ီၤကမျၢၫ်တဂၤ တဲ၀ဲန့ၣ်လီၤ.

ဒ်န့ၣ်အသိး လၢအ့ၣ်ယၣ်၀တံၣ်ကီၫ်ခီ(ဧရာ၀တီတိုင်း), ကၣ်ကၠံထီးကီၫ်ဆၣ်(ကန်ကြီးထောင့်မြို့နယ်), ညီၣ်ပ့ၣ်သၣ်သ၀ီကရူၫ်(ညောင်ပင်သာကျေးရွာအုပ်စု)တဖၣ်အပူၤစ့ၫ်ကီး တဲ၀ဲလၢကဆီၣ်ထွဲမၤစၢၤသးစၫ်လၢဘၣ်ကဲသုးတဖၣ်အဂီၫ်၀ံၤ တဟံၣ်ထၢ၀ဲစ့ အစှၤကတၢၫ်(၅)ကထိ တုၤ(၁)ကလးကၠးအိၣ်၀ဲအဂ့ၫ် တၫ်သ့ၣ်ညါဘၣ်လီၤ.

လၢမကွ့ကီၫ်ခီ(မကွေးတိုင်း), မကွ့ကီၫ်ဆၣ်(မကွေးမြို့နယ်) တးကိသ၀ီကရူၫ်(တပ်ကုန်းကျေးရွာအုပ်စု)တဖၣ်အပူၤစ့ၫ်ကီး သ၀ီသးပှၫ်မိစီၣ်(မိုးဇော်)တဲ၀ဲလၢ တၫ်မ့ၫ်တအဲၣ်ဒိးကဲသုးဘၣ်န့ၣ် တၫ်ကဘၣ်ဟ့ၣ်စ့အဃိ တဟံၣ်ထၢစ့(၂)ကလးကၠးလၢဟံၣ်အဖျၢၣ်(၂၀၀)ဘျဲၣ်အိၣ်အဂ့ၫ်, ဟံၣ်လၢဟ့ၣ်စ့တန့ၫ်ဘၣ်တဖၣ် အဒူၣ်ဖိထၢဖိအမံၤအသၣ်အဂ့ၫ်အကျိၤ ဘၣ်တၫ်ဆှၢန့ၫ်ဆူ သုးအိၣ်လံအဂ့ၫ်တၫ်သ့ၣ်ညါဘၣ်လီၤ.

လၢမကွ့ကီၫ်ခီ(မကွေးတိုင်း), ပွ့းဖၠူၣ်ကီၫ်ဆၣ်(ပွင့်ဖြူမြို့နယ်), သဲကိသ၀ီ(သဲကုန်းကျေးရွာ)စ့ၫ်ကီး သ၀ီသးပှၫ်ယဲ၀့(ရဲဝင်း)အဖိခွါတဖၣ်, အဘူးအတံၫ်တဖၣ်ဒီးပှၤလၢဟ့ၣ်စ့န့ၫ်အဖိခွါတဖၣ် တၫ်တဖၢနုာ်အမံၤအသၣ်လၢ တၫ်ဘၣ်ကဲသုးစရီပူၤဘၣ်ဒီး ထဲပှၤလၢဟ့ၣ်စ့တန့ၫ်ဘၣ်တဖၣ် ဘၣ်တၫ်ထၢနုာ်အမံၤစရီအဂ့ၫ် တၫ်သ့ၣ်ညါဘၣ်လီၤ. သ၀ီသးပှၫ်ယဲ၀့(ရဲဝင်း)ထၢသးစၫ်လၢဘၣ်ကဲသုးအစရီလီၤ. ဖၢနုာ်၀ဲသးစၫ်(၆)ဂၤအမံၤစရီလီၤ. သ၀ီပူၤဟံၣ်လၢဟ့ၣ်စ့န့ၫ်တဖၣ်, သ၀ီသးပှၫ်ယဲ၀့အဖိခွါတဖၣ်, အဘူးအတံၫ်အဖိခွါတဖၣ်စ့ၫ်ကီးတပာ်ဘၣ်. ဟ့ၣ်ပူၤ၀ဲကိးဂၤလီၤ. ပှၤလၢဟ့ၣ်စ့တန့ၫ်ဘၣ်တခီဘၣ်ကဲသုးအဃိ သးစၫ်(၆)ဂၤအံၤ ကဘၣ်ကဲသုးအဂ့ၫ် လီၫ်က၀ီၤဖိတဂၤတဲ၀ဲလီၤ.

ref:khitthit