လါမးရှး(၁၈)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်ဘျံး-ဒ၀ဲၫ်, ဒ၀ဲၫ်ကီၫ်ဆၣ်, ၀့ၫ်မတါ(မေတ္တာမြို့)တၫ်ဒုး၀ံၤ တၫ်ပၢၫ်ဆၢသုးတဖၣ် တၫ်မၤၡဲပျီဟီၣ်က၀ီၤအဆၢကတီၫ် တၫ်ထံၣ်န့ၫ်၀ဲ ဖိသၣ်အစိၣ်လၢတၫ်ခးဃာ်အီၤဒီးကျိအဂ့ၫ် ကီၫ်ရ့ၣ်ဘျံး-ဒ၀ဲၫ်နဲၣ်ရွဲၣ် ပဒိၣ်စီၤအဲၣ်နၤတဲ၀ဲန့ၣ်လီၤ.
၀့ၫ်မတါဟီၣ်က၀ီၤပူၤ စးထီၣ်ဖဲလါမးၡး(၁၀)သီအနံၤဒီး တုၤလၢ(၁၅)အနံၤ သုးကီၣ်ကးသုးကျိၤဒီး တၫ်ပၢၫ်ဆၢသုးပာ်ဖှိၣ်တဖၣ် တၫ်ဒုးကဲထီၣ်သး(၆)သီအတီၫ်ပူၤလၢဆူၣ်ဆူၣ်ကလၢၣ်န့ၣ်လီၤ. တၫ်ဒုးတဖၣ်၀ံၤ တၫ်မၤ၀ဲတၫ်ၡဲပျီဟီၣ်က၀ီၤအဆၢကတီၫ် ဖိသၣ်လၢသးနံၣ်အိၣ်(၁၂)နံၣ် အစိာ်လၢတၫ်ခးဃာ်အီၤလၢကျိအံၤ တၫ်ထံၣ်န့ၫ်၀ဲဖဲ သုးကီၣ်ကးအသုးကျိၤတဖၣ် က့ၤဂုၫ်က့ၤအခံအဆၢကတီၫ်အဂ့ၫ် ကီၫ်ရ့ၣ်ဘျံး-ဒ၀ဲၫ်နဲၣ်ရွဲၣ် ပဒိၣ်စီၤအဲၣ်နၤတဲ၀ဲန့ၣ်လီၤ.
“သုးကီၣ်ကးန့ၣ် ဖီၣ်န့ၣ်ဆူၣ်ဖိသၣ်အံၤ၀ံၤ ဟဲကိးဃုာ်၀ဲဒီးအသုးကျိၤလီၤ. ဟဲကိး၀ဲဒ်သိး ပှၤကညီတၫ်ဒီသဒၢအသိးလီၤ. ဖိသၣ်အံၤ အကဲမတၤလဲၣ်ဒီး ဟဲဖီၣ်၀ဲလၢသ၀ီဖဲလဲၣ်တခီ တၫ်တသ့ၣ်ညါဘၣ်အဂ့ၫ်“ ပဒိၣ်စီၤအဲၣ်နၤတဲ၀ဲန့ၣ်လီၤ.
တၫ်ဖိသၣ်အံၤ သုးကီၣ်ကးခးသံ၀ဲအဂ့ၫ် တၫ်ပၢၫ်ဆၢသုးတဖၣ်စံး၀ဲဘၣ်ဆၣ် တၫ်ကဲထီၣ်သးလၢတၫ်ဒုးပူၤအဃိ ဘၣ်ထွဲဒီးဖိသၣ်သံတၫ်ဂ့ၫ်တၫ်ကျိၤတဖၣ် တၫ်မၤလီၤတံၫ်အီၤတန့ၫ်ဒံးဘၣ်အဂ့ၫ် ပဒိၣ်စီၤအဲၣ်နၤတဲကဒီး၀ဲန့ၣ်လီၤ. ဖိသၣ်လၢအသံပာ်ဃုာ်ပိာ်ခွါ(၂)ဂၤ လၢတၫ်ဖီၣ်န့ၫ်ဆူၣ်အီၤစ့ၫ်ကီး တၫ်ထံၣ်န့ၫ်အီၤလၢတၫ်ဘၣ်ဒိဘၣ်ထံးအဃိ တၫ်ပၢၫ်ဆၢသုးတဖၣ် မၤပူၤဖျဲး၀ံၤ တၫ်ကူစါယါဘျါန့ၫ်အီၤအဂ့ၫ် ပဒိၣ်စီၤအဲၣ်နၤတဲ၀ဲအဖီခိၣ်တၫ်သ့ၣ်ညါန့ၣ်လီၤ.
တၫ်ဒုး(၆)သီအတီၫ်ပူၤ သုးကီၣ်ကးတပၤသံ၀ဲတစှၤန့ၣ်(၁၆)ဂၤ၀ံၤ တစှၤန့ၣ်(၂၀)ဂၤဘၣ်ဒိ၀ဲအဂ့ၫ်ဒီး မ့မ့ၫ်လၢတၫ်ပၢၫ်ဆၢသုးပာ်ဖှိၣ်တပၤစ့ၫ်ကီး သံ၀ဲ(၃)ဂၤ၀ံၤ တၫ်ဘၣ်ဒိဘၣ်ထံးအိၣ်၀ဲတနီၤအဂ့ၫ် KNLA သုးရ့ၣ်ခိၣ်သဃဲၤ စီၤမူဂ့ၤတဲ၀ဲန့ၣ်လီၤ.
တကးဘၣ် သုးကီၣ်ကးတပၤ သူ၀ဲကဘီယူၤဒုးသုးတဖၣ်ဒီး ကဘီယူၤတဖၣ်၀ံၤ ဟဲတ့ၫ်လီၤမ့ၣ်ပိၫ် ဖဲ၀့ၫ်မတါလၢတၫ်ဒုးကဲထီၣ်သး(၆)သီကတီၫ်ဟီၣ်က၀ီၤပူၤ တစှၤန့ၣ်(၁၂)ဘျီန့ၣ်လီၤ.
သုးကီၣ်ကး ဟဲတ့ၫ်လီၤမ့ၣ်ပိၫ်အဃိ ၀့ၫ်မတါပူၤ ကမျၢၫ်အိၣ်ဟံၣ်တစှၤန့ၣ်(၆)ဖျၢၣ် ဟးဂီၤကွံာ်၀ဲဒီး ကမျၢၫ်လၢအိၣ်လၢ၀့ၫ်ပူၤတဖၣ်စ့ၫ်ကီး ဃ့ၫ်ဟးထီၣ်ခဲလၢာ်လံအဂ့ၫ် တၫ်သ့ၣ်ညါဘၣ်လၢ တၫ်ပၢၫ်ဆၢသုးတဖၣ်အအိၣ်န့ၣ်လီၤ.
ref:thetanintharyitimes
