လါမးရှး(၁၅)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၆), ကီၫ်ရ့ၣ်ဒူပျာ်ယာ်, ၀့ၫ်ကၠဲးဒိအံၤ ကညီဒီကလုာ်တၫ်ထူၣ်ဖျဲးသုးမုၫ်(KNLA)ဒီး တၫ်ပၢၫ်ဆၢသုးပာ်ဖှိၣ်တဖၣ်ထီၣ်ဒုးမၤန့ၫ်၀ံၤအလီၫ်ခံ သုးကီၣ်ကးဒုးယၤခိၣ်ဒီး အပှၤသုးဖိ(၆၀)ဂၤဘျဲၣ်ဟဲပာ်စုက၀ဲၤအဂ့ၫ် ခ့ၣ်အဲၣ်ယူၣ်-ဒူပျာ်ယာ်တၫ်ကစီၣ်ဒီး တၫ်ဘိးရၤလီၤပှၤဘၣ်မူဘၣ်ဒါ တဲပာ်ဂၢၫ်ပာ်ကျၢၫ်၀ဲန့ၣ်လီၤ.
မ့မ့ၫ်လၢ ဘၣ်ထွဲဒီး တၫ်ထီၣ်ဒုးမၤန့ၫ်၀့ၫ်ကၠဲးဒိ သုးတၫ်တိာ်ကူၣ်ခိၣ်ကျၢၫ်(ကျုံဒိုးဗျူဟာကုန်း) တၫ်ကစီၣ်တၫ်ဂ့ၫ်တၫ်ကျိၤလီၤတံၫ်လီၤဆဲးတခီ တၫ်မၤလီၤတံၫ်မ့ၫ်၀ံၤ ကဘိးဘၣ်ရၤလီၤ၀ဲအဂ့ၫ်တဲ၀ဲန့ၣ်လီၤ. ကီၫ်ရ့ၣ်ဒူပျာ်ယာ်ဟီၣ်က၀ီၤပူၤ တၫ်ထီၣ်ဒုးမၤန့ၫ် သုးကီၣ်ကးအသုးကလၢၤတဖျၢၣ်၀ံၤတဖျၢၣ်လီၤအဂ့ၫ်စ့ၫ်ကီး တဲ၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်ဒူပျာ်ယာ်, ကီၫ်ဆၣ်ကီးတရံး, ၀့ၫ်ရၤမတံအကပၤ သုးကီၣ်ကး ဖလူသုးကလၢၤအံၤ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်ဒီး ကမျၢၫ်တၫ်ဒီသဒၢသုးပာ်ဖှိၣ်တဖၣ် စးထီၣ်ဒုး၀ဲဖဲ ဖဲ၂၀၂၄နံၣ်, လါမးရှး(၁၁)သီအနံၤ, ဟါ(၅း၂၀)မံးနံးအဆၢကတီၫ်၀ံၤ တၫ်မၤန့ၫ်သုးကလၢၤဒီတဖျၢၣ်ဖဲ ဟါ(၅း၂၅)မံးနံး, လၢ(၅)မံးနံးအဆၢကတီၫ်ပူၤအဂ့ၫ် ခ့ၣ်အဲၣ်ယူၣ်-ကီၫ်ရ့ၣ်ဒူပျာ်ယာ်တၫ်ကစီၣ်ဒီး တၫ်ဘိးဘၣ်ရၤလီၤ ဘိးဘၣ်ပာ်ဖျါဃာ်၀ဲဖဲ တဟါညါအံၤန့ၣ်လီၤ.
တၫ်ထီၣ်ဒုးမၤန့ၫ် ဖလူသုးကလၢၤပူၤ တၫ်မၤန့ၫ်ဒုၣ်ဒါစုက၀ဲၤအါအါဂီၫ်ဂီၫ်အသိး သုးကီၣ်ကးအပှၤသုးဖိတဖၣ် လဲၤဃ့ၫ်ဆူကီၫ်ကၠီၣ်တဲၣ်ကီၫ်ဆၢတပၤအဂ့ၫ် ပာ်ဖျါဃာ်၀ဲန့ၣ်လီၤ.
တၫ်ထီၣ်ဒုးမၤန့ၫ်ဖလူသုးကလၢၤအပူၤ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်ဒီး တၫ်ပၢၫ်ဆၢသုးပာ်ဖှိၣ်တပၤတၫ်ဘၣ်ဒိဘၣ်ထံးတအိၣ်၀ဲအဂ့ၫ် တၫ်သ့ၣ်ညါဘၣ်လၢတၫ်ပာ်ဖျါအဖီခိၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၆), ကီၫ်ရ့ၣ်ဒူပျာ်ယာ်ဟီၣ်က၀ီၤပူၤ တၫ်ကထီၣ်ဒုးသုးကီၣ်ကး အသုးကလၢၤတၫ်ဒုးတဖၣ်မ့ၫ်ဂ့ၤ, တၫ်ထီၣ်ဒုး၀့ၫ်ပူၤတၫ်ဒုးတဖၣ်မ့ၫ်ဂ့ၤ တၫ်ရဲၣ်ကျဲၤမၤ၀ဲအဖၢမုၫ်န့ၣ်လီၤ.
photo:socialmedia
