လါမးရှး(၁၅)သီ, ၂၀၂၄နံၣ်
ယိၤဒိၣ်ကီၫ်စဲၣ်ကလံၤထံးတကပၤ(ရှမ်းပြည်နယ်တောင်ပိုင်း) လၢတၫ်ဒုးကဲထီၣ်(၄၉)သီအတီၫ်ပူၤ ဖိသၣ်ဒီးပိာ်မုၣ်ပာ်ဃုာ် ကမျၢၫ်သံ(၄၉)ဂၤ၀ံၤ ဘၣ်တၫ်ဖီၣ်န့ၫ်အီၤအဂၤ(၂၀)အဂ့ၫ် ပအိးသးစၫ်ကရၢ (PYO) ပာ်ဖျါဃာ်၀ဲလီၤ.
ဖဲ၂၀၂၄နံၣ် လါယနူၤအါရံၤ(၂၁)သီတုၤ လါမးရှး(၉)သီအနံၤ (၄၉)သီအတီၫ်ပူၤ ဟိၣ်ပိ(ဟိုပုံး), ပ့ၣ်လီ(ပင်လောင်း), ဆံၣ်ဆဲၣ်(ဆီဆိုင်)ဒီး လွဲၣ်လ့ၣ်ဟီၣ်က၀ီၤ(လွိုင်လင်ဒေသ)တဖၣ်အပူၤ တၫ်ဒုးတဖၣ်အဃိ ကျိဖးဒိၣ်လီၤတဲာ်ဘၣ်၀ံၤ ကမျၢၫ်သံ(၁၄)ဂၤ, ကလံၤကျါတၫ်ခးလီၤတၫ်အဃိ ကမျၢၫ်ဘၣ်တၫ်ဖီၣ်န့ၫ်(၁၄)ဂၤဒီး ပှၤဘၣ်သံ(၁၃)ဂၤအဂ့ၫ် ပာ်ဖျါ၀ဲလီၤ.
ပှၤလၢသံအါတက့ၫ်န့ၣ် မ့ၫ်ပိာ်ခွါတဖၣ်၀ံၤ ပိာ်မုၣ်(၂)ဂၤဒီး ဖိသၣ်(၅)ဂၤ ပာ်ဃုာ်အသိး ပှၤလၢတၫ်မၤလီၤတံၫ်တန့ၫ် ဘၣ်သံအိၣ်လံ(၆)ဂၤအဂ့ၫ် တၫ်သ့ၣ်ညါဘၣ်လီၤ. ဖဲဃ့ၫ်အိၣ်ကဒုအကတီၫ် ဘၣ်တၫ်ခးအီၤ, သုးကီၣ်ကးအသုး ခးကမၣ်အီၤဒီး ပျံၤတၫ်အဃိဖဲဃ့ၫ်ပူၤဖျဲးအသးအကတီၫ် သုးကီၣ်ကးအသုးလူၤခးဒီး ဘၣ်သံအိၣ်လံ(၈)ဂၤလံန့ၣ်လီၤ.
တၫ်ဒုးအဃိ သုးကီၣ်ကး ကလံၤကျါတ့ၫ်လီၤမ့ၣ်ပိၫ်(၄၀၈)ဘျီဆူအဖီခိၣ်၀ံၤ ခးလီၤတၫ်လၢကျိဖးဒိၣ်(၁၅၀၆)ဘျီအဂ့ၫ်ပာ်ဖျါ၀ဲလီၤ. ယိၤဒိၣ်ကီၫ်စဲၣ်ကလံၤထံး တၫ်ဒုးတဖၣ်အပူၤ ကမျၢၫ်လၢဘၣ်စံၣ်သုး အနီၫ်ဂံၫ်အိၣ်လံ(၈)ကလး(၉)ကထိဂၤဘျဲၣ်လံန့ၣ်လီၤ.
photo:PNLA
