Move Forwardပၣ်တံၣ် တၫ်ကြၢးတကြၢးမၤလီၤမၫ်ကွံာ်အီၤဧါန့ၣ် ကၠီၣ်တဲၣ်တၫ်ဃုထၢခီၣ်မံးရှၢၣ်(ထိုင်းရွေးကောက်ပွဲကော်မရှင်)တဲ၀ဲလၢ ကတီၣ်ထီၣ်၀ဲဆူ ကွီၫ်မ့ၣ်ဘျီၣ်

လါမးရှး(၁၄)သီ, ၂၀၂၄နံၣ်

အပူၤကွံာ်နံၣ် ကၠီၣ်တဲၣ်တၫ်ဃုထၢ(ထိုင်းရွေးကောက်ပွဲ)အပူၤ Move Forward ပၣ်တံၣ်လၢ အါတက့ၫ်မၤနၢၤဘျီၣ်ဒိၣ်ခၢၣ်စးတၫ်လီၫ်(လွှတ်တော်အမတ်နေရာ)အံၤ ကြၢးတကြၢးတၫ်မၤလီၤမၫ်ကွံာ်အီၤဧါန့ၣ် ကဘၣ်တၫ်ဆၢတဲာ်အီၤခီဖျိလၢ ထံကီၫ်တၫ်ဘျၢသဲစး၀ဲၤဒၢး(ဥပဒေတရားရုံး)အဂ့ၫ် ဖဲလါမးရှး(၁၂)သီအနံၤန့ၣ် ကၠီၣ်တဲၣ်တၫ်ဃုထၢခီၣ်မံးရှၢၣ် (ထိုင်းရွေးကောက်ပွဲကော်မရှင်) ဘိးဘၣ်ပာ်ဖျါ၀ဲအဂ့ၫ် Myanmar Now တၫ်ကစီၣ်သန့ ပာ်ဖျါ၀ဲလီၤ.

တၫ်ဘျၢလၢဒီသဒၢန့ၫ်ဃာ် ကၠီၣ်တဲၣ်စီၤပၤပာ်ဃုာ် စီၤလိၣ်စီၤပၤဟံၣ်ဖိဃီဖိတဖၣ် Move Forward ပၣ်တံၣ် ကဘှီဘၣ်ဆီတလဲ၀ဲအဂီၫ် တၫ်အၢၣ်လီၤလၢဟ့ၣ်ဃာ်၀ဲတဖၣ်ဒီး ပၣ်တံၣ်အတၫ်ဘျၢ(ပါတီမူဝါဒ)တဖၣ်န့ၣ် မၤကမၣ်တၫ်ဘျၢအိၣ်တအိၣ် တၫ်ကသမံသမိး၀ဲလၢ ကွီၫ်မ့ၣ်ဘျီၣ်အဂီၫ် ကၠီၣ်တဲၣ်တၫ်ဃုထၢခီၣ်မံးရှၢၣ် အၢၣ်လီၤတူၫ်လိာ်၀ဲအဂ့ၫ် တၫ်ဘိးဘၣ်ပာ်ဖျါအပူၤ ပာ်ဖျါ၀ဲလီၤ.

တၫ်ကြၢးတကြၢးမၤလီၤမၫ်ကွံာ် Move Forward ပၣ်တံၣ်န့ၣ် တၫ်ကတီၣ်ထီၣ်ဆူ ထံကီၫ်တၫ်ဘျၢသဲစးကွီၫ်မ့ၣ်ဘျီၣ်အဂီၫ် ဘၣ်တၫ်အၢၣ်လီၤ၀ဲဃူဃူဖိးဖိးအဂ့ၫ် ကၠီၣ်တဲၣ်တၫ်ဃုထၢခီၣ်မံးရှၢၣ် ပာ်ဖျါ၀ဲလီၤ. Move Forward န့ၣ် အပူၤကွံာ်နံၣ် တၫ်ဃုထၢအပူၤ မၤနၢၤ ဘျီၣ်ဒိၣ်ခၢၣ်စးတၫ်လီၫ်(လွှတ်တော်အမတ်နေရာ)တဖၣ်၀ံၤ ပၣ်တံၣ်ပှၤပၢၤလီၫ်ဆ့ၣ်နီၤ Pita Limjaroenrat န့ၣ် အမံၤဟူထီၣ်သါလီၤလၢ ကကဲထီၣ်ဘၣ်ကိတိာ်ခိၣ်ကျၢၫ်(ဝန်ကြီးချုပ်)န့ၣ်လီၤ.

ဘၣ်ဆၣ်သနာ်က့ မံၣ်ဒံၣ်ယၣ်ခီပနံၣ်အပူၤ ကၠီၣ်တဲၣ်ဘျီၣ်ဒိၣ်ခၢၣ်စးတဖၣ် တၫ်တဟ့ၣ်အခွဲးလၢကန့ၫ်ပၢဘၣ်၀ဲ ရှဲၣ်ယၣ်တဖၣ်ဒီး တၫ်ပဲာ်အၢပဲာ်သီလၢန့ၫ်ပၢဘၣ်၀ဲအဖီခိၣ် Pita န့ၣ် ဘၣ်တၫ်ထုးကွံာ်အီၤလၢ ဘျီၣ်ဒိၣ်ခၢၣ်စး(လွှတ်တော်အမတ်)အလီၫ်န့ၣ်လီၤ. အလီၫ်ခံ တၫ်ပဲာ်အၢပဲာ်သီ၀ဲအံၤ တၫ်အုၣ်ကီၤလီၤတံၫ်လီၤဆဲးတအိၣ်ဘၣ်အဂ့ၫ် တၫ်ဘျၢသဲစး၀ဲၤဒၢး(တရားရုံး)တကပၤ ဆၢတဲာ်၀ဲ၀ံၤအလီၫ်ခံ Pita န့ၣ် ဘၣ်တၫ်ဟ့ၣ်ကဒါက့ၤအခွဲးလၢဘျီၣ်ဒိၣ်ခၢၣ်စး(လွှတ်တော်အမတ်)အလီၫ်န့ၣ်လီၤ.

Move Forward ပၣ်တံၣ်လၢ Pita Limjaroenrat တီခိၣ်ရိၣ်မဲ၀ဲအံၤ လၢကဘှီဘၣ်ဆီတလဲသုးအဂီၫ်, လၢကမၤလီၤစှၤတၫ်မၤမုာ်ကျိၤ၀ဲၤကွာ် လၢတဖိးမံဒီးတၫ်ဘျၢတဖၣ်အဂီၫ်, တၫ်ဘျၢလၢဒီသဒၢန့ၫ်တၫ်လၢ စီၤပၤဒီးစီၤလိၣ်စီၤပၤအဟံၣ်ဖိဃီဖိတဖၣ် ကဘှီဘၣ်၀ဲအဂီၫ် အပူၤကွံာ်နံၣ် လါမ့ၤ တၫ်ဃုထၢအပူၤ ဒ်သိးကဒိးန့ၫ်ဘၣ်တၫ်ဖးအဂီၫ် ကရၢကရိ၀ဲလီၤ.

အလီၫ်ခံ မၤနၢၤတၫ်ဃုထၢဘၣ်ဆၣ် လၢ Pita ကကဲထီၣ်ဘၣ်ကိတိာ်ခိၣ်ကျၢၫ်(ဝန်ကြီးချုပ်)အဂီၫ် ကၠီၣ်တဲၣ်ဘျီၣ်ဒိၣ်ထး(ထိုင်းအထက်လွှတ်တော်)အပူၤ ခိၣ်နၫ်လီၫ်လံၤတဖၣ် ထီဒါ၀ဲဆူၣ်ဆူၣ်ကလဲာ်န့ၣ်လီၤ. ကၠီၣ်တဲၣ်စီၤပၤတၫ်ဘျၢ(ထိုင်းတော်ဝင်ဥပဒေ)န့ၣ် မ့ၫ်တၫ်ဘျၢတခါလၢ တၫ်ပညိၣ်ကွဲးလီၤဃာ်ဒ်သိး ကဒီသဒၢန့ၫ်တၫ်လၢ တၫ်စံးအၢစံးသီ စီၤပၤအဂီၫ်န့ၣ်လီၤ. တၫ်ဘျၢအံၤ တၫ်မ့ၫ်မၤကမၣ်အီၤန့ၣ် ဘၣ်တၫ်ဒုးလီၤဃိာ်တုၤလၢ(၁၅)နံၣ်သ့၀ဲန့ၣ်လီၤ.

ref:myanmarnow