လါမးရှး(၁၂)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၆), ကီၫ်ရ့ၣ်ဒူပျာ်ယာ်, ကီၫ်ဆၣ်ရၤမတံဟီၣ်က၀ီၤ, သ့ၣ်ခါညံၣ်နီၣ်သ၀ီ(သင်္ဃန်းညီနောင်ရွာ)ပူၤ တၫ်ဒုးကဲထီၣ်သးအဃိ လီၫ်က၀ီၤကမျၢၫ်(၂၀၀)ဃၣ်ဃၣ် အိၣ်ကးတံာ်သးအဂ့ၫ်တၫ်သ့ၣ်ညါဘၣ်န့ၣ်လီၤ.
စးထီၣ်ဖဲလါမးၡး(၇)သီအနံၤ, ကညီဒီကလုာ်တၫ်ထူၣ်ဖျဲးသုးမုၫ်ဒိၣ် (KNLA) လဲၤနုာ်လီၤဒုး၀ဲ သုးကီၣ်ကး အသုးကလၢၤလၢအိၣ်ဖဲ သ့ၣ်ခါညံၣ်နီၣ်န့ၣ်လီၤ.
တုၤလၢလါမးၡး(၁၂)သီအနံၤ တၫ်ဒုးတဖၣ်ကဲထီၣ်ဒံးအဖၢမုၫ်ဒီး လီၫ်က၀ီၤကမျၢၫ်တနီၤ အိၣ်ကးတံာ်သးအဂ့ၫ် ပိာ်ခွါတဂၤလၢအမၤစၢၤပှၤဂ့ၫ်၀ီတဖၣ်တဲ၀ဲန့ၣ်လီၤ.
“ယနၫ်ဟူဘၣ်လၢ ဘူးထီၣ်(၂၀၀)ဃၣ်ဃၣ်အိၣ်တ့ၫ်ဒံးလီၤ. ဟးထီၣ်တသ့ဘၣ် ခီဖျိတၫ်ဒုးကဲထီၣ်သးအဃိလီၤ“ အဂ့ၫ် အ၀ဲတဲ၀ဲန့ၣ်လီၤ.
တၫ်ဒုးကဲထီၣ်ကတီၫ် တၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤန့ၫ်ဃာ်၀ဲ သုးကီၣ်ကးအသုးနီၫ်ဂံၫ် (၃၅၅), (၃၅၆)ခီၣ်ချ့သုးရ့ၣ်သုးကလၢၤတဖၣ်ဒီး သ့ၣ်ခါညံၣ်နီၣ် ပၢၤကီၫ်သုးကလၢၤတဖၣ်န့ၣ်လီၤ. မ့မ့ၫ် နီၫ်ဂံၫ် (၃၅၇) သုးရ့ၣ်သုးကလၢၤဒီး တၫ်တိာ်ကူၣ်ခိၣ်ကျၢၫ်သုးကလၢၤတဖၣ်တခီ တၫ်ထီၣ်ဒုး၀ဲအဖၢမုၫ်ဒံးလီၤအဂ့ၫ် လီၫ်က၀ီၤကမျၢၫ်တနီၤစံး၀ဲန့ၣ်လီၤ.
ဖဲလါမးၡး(၁၁)သီအနံၤ, တၫ်ပၢၫ်ဆၢသုးပာ်ဖှိၣ်တဖၣ် လဲၤထီၣ်ဒုး၀ဲ သုးကီၣ်ကးဖလူသုးကလၢၤ၀ံၤ ဟါလီၤခီအဆၢကတီၫ် တၫ်ထီၣ်ဒုးမၤန့ၫ်၀ဲအဂ့ၫ် Cobra Column-1 တဲပာ်ဂၢၫ်ပာ်ကျၢၫ်၀ဲန့ၣ်လီၤ.
ဖဲအပူၤကွံာ်အသီတဖၣ်အပူၤ ပှၤလၢအိၣ်ကးတံာ်သးတဖၣ် တၫ်လဲၤဆှၢအီၤလၢသိၣ်လ့ဆူ ၀့ၫ်ရၤမတံပူၤ ပှၤဃ့ၫ်သုးဒဲက၀ီၤတဖၣ် အိၣ်၀ဲ(၁၅၀)ဂၤဃၣ်ဃၣ်န့ၣ်လီၤ. တၫ်ဒုးတဖၣ်အပူၤ ကမျၢၫ်တၫ်ဘၣ်ဒိဒီး တၫ်သံတၫ်ပှၫ်အစှၤကတၢၫ်အိၣ်၀ဲ (၁၀)ဂၤန့ၣ်လီၤ.
တၫ်ဆဲးကျိးသံကွၫ် ခ့ၣ်အဲၣ်ယူၣ်-ကီၫ်ရ့ၣ်ဒူပျာ်ယာ်နဲၣ်ရွဲၣ် ပဒိၣ်စီၤလ့စတၣ်လၢ ကတီၫ်အံၤတၫ်ဒုးကဲထီၣ်သးအဖီခိၣ်အ၀ဲတဲ၀ဲလၢ တၫ်အိၣ်သးတဖၣ်ဘံဘူဒံးအဖၢမုၫ်အဃိ တၫ်တဲအီၤတန့ၫ်ဒံးဘၣ်အဂ့ၫ် တဲဘၣ်အၣ်ထူခ့ၣ်န့ၣ်လီၤ.
ဖဲလါမးၡး(၈)သီအနံၤစ့ၫ်ကီး သုးကီၣ်ကး လဲၤတ့ၫ်လီၤမ့ၣ်ပိၫ်အဃိ သးနံၣ်(၅၀)ဘျဲၣ်အိၣ်ပိာ်ခွါ(၂)ဂၤ, ပှၤသးပှၫ်ပိာ်ခွါဒီးပိာ်မုၣ်ခဲလၢာ်တစှၤန့ၣ်(၈)ဂၤ လၢဟဲကူစါယါဘျါအသးဖဲ ယွၣ်သ့းသ၀ီ သဘၣ်၀းယ့းသၣ်တၫ်ဆါဟံၣ်(သဘာဝရိပ်သာဆေးခန်း) တဖၣ်ဘၣ်ဒိ၀ဲန့ၣ်လီၤ.
သဘၣ်၀းယ့းသၣ် တၫ်လဲၤတ့ၫ်လီၤမ့ၣ်ပိၫ်ဒီးတနံၤဃီ ပိာ်ခွါ(၄)ဂၤလၢ ဟဲဃ့ၫ်ဟးထီၣ်လၢ သ့ၣ်ခါညံၣ်နီၣ်တဖၣ် မ့ၣ်ပိၫ်အက့အခီဘၣ်အီၤအဃိ ပိာ်ခွါ(၂)ဂၤသံ၀ဲတဘျီဃီဒီး မ့မ့ၫ်အဂၤ(၂)ဂၤတခီဘၣ်ဒိ၀ဲအဂ့ၫ် သ့ၣ်ခါညံၣ်နီၣ်လီၫ်က၀ီၤ ပှၤဃ့ၫ်သုးပှၤလီၫ်အိၣ်ကမှံတဖၣ် စံး၀ဲန့ၣ်လီၤ.
ခံခီကပၤတၫ်ဒုးတဖၣ်အပူၤ သုးကီၣ်ကး တပၤတၫ်ဘၣ်ဒိဘၣ်ထံး, တၫ်သံတၫ်ပှၫ်အိၣ်အါ၀ဲဒီး မ့မ့ၫ်တၫ်ပၢၫ်ဆၢသုးပာ်ဖှိၣ်စ့ၫ်ကီး တၫ်ဘၣ်ဒိဘၣ်ထံး, တၫ်သံတၫ်ပှၫ်တဖၣ်အိၣ်၀ဲန့ၣ်လီၤ.
လၢကတီၫ်ခဲအံၤ တၫ်ဒုးတဖၣ်ကဲထီၣ်သးအဖၢမုၫ်ဒံးလီၤဒီး သုးကီၣ်ကးတပၤ မၤအါထီၣ်အသုးအဂံၫ်အဘါ အါအါဂီၫ်ဂီၫ်လီၤအဂ့ၫ် သုးဂ့ၫ်၀ီဂံၫ်ခီၣ်ထံးတဂၤတဲ၀ဲန့ၣ်လီၤ.
photo:cobracolumn-1
