လါမးရှး(၁၂)သီ, ၂၀၂၄နံၣ်
ရခၢၣ်ကီၫ်စဲၣ်ပူၤ ကမျၢၫ်အိၣ်တၫ်လီၫ်တဖၣ် သုးကီၣ်ကးခးလီၤကျိဖးဒိၣ်အဖီခိၣ် ဘၣ်ယိဘၣ်ဘှီ၀ဲအဂ့ၫ် ဘီမုၫ်စၢဖှိၣ်ကရၢ ဘၣ်ထွဲဟီၣ်ခိၣ်ဖိတၫ်ဒိသူၣ်ဒိသး တၫ်တၢၣ်ပီၣ်တဲသကိး၀ဲၤဒၢး (UNOCHA) ထုးထီၣ်ပာ်ဖျါဃာ်၀ဲဖဲ လါမးၡး(၁၁)သီအနံၤန့ၣ်လီၤ.
ဖဲလါမးၡး(၉)သီအနံၤ, ကျိဖးဒိၣ်လဲၤလီၤတဲာ်၀ဲဒၣ် ဖဲရခၢၣ်ကီၫ်စဲၣ်, ၀့ၫ်စ့းတွ့ၣ်(စစ်တွေမြို့), ကမျၢၫ်အိၣ်က၀ီၤဒ့အပူၤအဃိ ရိၣ်ဟ့ၣ်ကၠၣ်တစှၤန့ၣ်(၈)ဂၤသံ၀ဲ၀ံၤ ဖိသၣ်(၅)ဂၤပာ်ဃုာ်(၁၂)ဂၤ ဘၣ်ဒိဘၣ်ထံး၀ဲအဂ့ၫ် UNOCHAတဲ၀ဲန့ၣ်လီၤ.
ဖဲအပူၤကွံာ် လါဖ့ၤဘြူၤအါရံၤ (၂၉) သီအနံၤစ့ၫ်ကီး ကျိဖးဒိၣ်လဲၤလီၤတဲာ်၀ဲဒၣ်ဖဲ ၀့ၫ်စ့းတွ့ၣ်တလး(စစ်တွေမြို့ဈေးတန်း) အကပၤအဃိ ကမျၢၫ်တစှၤန့ၣ် (၂၁)ဂၤသံ၀ဲ၀ံၤ (၃၀)ဘျဲၣ်ဘၣ်ဒိဘၣ်ထံး၀ဲန့ၣ်လီၤ. တၫ်န့ၣ်အဃိ (၂)နွံအတီၫ်ပူၤ ၀့ၫ်စ့းတွ့ၣ်ကမျၢၫ်တဖၣ်သံ၀ဲအဖီခိၣ် ဒုးနဲၣ်ဖျါ၀ဲ၀ံၤ UNOCHA တခီဘၣ်ယိၣ်၀ဲအဂ့ၫ် ထုးထီၣ်ပာ်ဖျါ၀ဲန့ၣ်လီၤ.
သုးကီၣ်ကးဒီး ရခၢၣ်သုးမုၫ်ဒိၣ် (AA) အဘၢၣ်စၢၤတၫ်ဒုးတဖၣ်ဆူၣ်ထီၣ်၀ဲကတီၫ် ကမျၢၫ်တၫ်ဘၣ်ဒိဘၣ်ထံး တၫ်သံတၫ်ပှၫ်အိၣ်၀ဲ၀ံၤ တၫ်ဒုးတဖၣ်အဃိ ရခၢၣ်ကီၫ်စဲၣ်အပူၤ ပှၤလၢပာ်တ့ၫ်အိၣ်ဆိးလီၫ်ကျဲ ဃ့ၫ်ပူၤဖျဲးသးအိၣ်ထီၣ်(၃)ကလီၤဘျဲၣ်အဂ့ၫ် တဲ၀ဲန့ၣ်လီၤ.
ပှၤမၤစၢၤတၫ်ဖိတဖၣ်ပာ်ဃုာ် ကမျၢၫ်တဖၣ်တၫ်ဒီသဒၢကန့ၫ်အဂီၫ် တၫ်ကရၢကရိလၢအဘၣ်ထွဲဒီး တၫ်သဘံၣ်သဘုၣ်ခဲလၢာ်အံၤ တၫ်ကမၤ၀ဲလၢ ထံဂုၤကီၫ်ဂၤပှၤဟီၣ်ခိၣ်ဖိ တၫ်ဒိသူၣ်ဒိသးဘၣ်ထွဲတၫ်ဘျၢသဲစးတဖၣ်အဂ့ၫ်စ့ၫ်ကီး UNOCHA တဲဒုးသ့ၣ်ညါ၀ဲန့ၣ်လီၤ.
ကတီၫ်ခဲအံၤ ကီၫ်ပယီၤဒီတဘ့ၣ်အပူၤ ပှၤလၢဟံၣ်ဃီတအိၣ် အစှၤကတၢၫ်အိၣ်၀ဲ (၂.၇)ကကွဲၫ်အဂ့ၫ်စ့ၫ်ကီး ပာ်ဖျါဃာ်၀ဲလၢ တၫ်ထုးထီၣ်ပာ်ဖျါအပူၤန့ၣ်လီၤ.
ref:rfa
photo:aainfodesk
