လါမးရှး(၇)သီ, ၂၀၂၄နံၣ်
သုးကီၣ်ကးဘိးဘၣ်ရၤလီၤ TNLA ဟီၣ်က၀ီၤတဖၣ်လၢ သုးတၫ်ပၢတၫ်ပြးန့ၣ် တၫ်ဘၣ်ဒိဘၣ်ထံး တၫ်ပတုာ်တၫ်ခးသ့အဂ့ၫ် ကလံၤစိးသိၣ်မှံကရၢ စံး၀ဲန့ၣ်လီၤ.
ယိၤဒိၣ်ကီၫ်စဲၣ်ကလံၤစိးတပၤ မၣ်တိၣ်(မန်တုံ), နၣ်မတူၣ်(နမ္မတူ)ဒီး နးဆၣ်၀့ၫ်(နမ့်ဆန်မြို့)တဖၣ်လၢ တအီဒီကလုာ်တၫ်ထူၣ်ဖျဲးသုးမုၫ်ဒိၣ် TNLA ထီၣ်ဒုးမၤန့ၫ်ပၢဆှၢဃာ်တဖၣ် သုးကီၣ်ကးဘိးဘၣ်ရၤလီၤ သုးတၫ်ပၢတၫ်ပြး ဖဲလါမးၡး(၄)သီအနံၤန့ၣ်လီၤ.
လါယနူၤအါရံၤ(၁၁)သီၤအနံၤ, ဟဲၣ်က့ၣ်တၫ်အၢၣ်လီၤ(ဟိုင်ဂင်သဘောတူညီချက်)လၢ တရူးအတၫ်နုာ်လီၤဘှါရှဲတၫ်လၢဘၢၣ်စၢၤအဃိ သုးကီၣ်ကးဒီး သိၣ်မှံကရၢ(၃)ဖုအဘၢၣ်စၢၤတၫ်အၢၣ်လီၤအံၤ ခီဖျိလၢသုးကီၣ်ကးဘိးဘၣ်ရၤလီၤသုးတၫ်ပၢတၫ်ပြးအဃိ တၫ်ကီတၫ်ခဲအိၣ်ထီၣ်သ့အဂ့ၫ် ကိကးသုးမုၫ်ဒိၣ် (MNDAA), တအီသုးမုၫ်ဒိၣ် (TNLA)ဒီး ရခၢၣ်သုးမုၫ်ဒိၣ် (AA) သိၣ်မှံကရၢပာ်ဖှိၣ်ထုးထီၣ်တၫ်ဘိးဘၣ်ရၤလီၤအပူၤ စံး၀ဲန့ၣ်လီၤ.
ဟဲၣ်က့ၣ်တၫ်အၢၣ်လီၤ(ဟိုင်ဂင်သဘောတူညီချက်)အပူၤ ယိၤဒိၣ်ကလံၤစိးဟီၣ်က၀ီၤပူၤ တၫ်ကပတုာ်တၫ်ခးအဂီၫ်, တၫ်ကအိးထီၣ်က့ၤတရူးဒီး ကီၫ်ဆၢတၫ်ကူၤလဲၤမၤကၤကျဲအဂီၫ်, တရူး-ကီၫ်ပယီၤကီၫ်ဆၢ ကအိၣ်ဂၢၫ်ဆိးကျၢၤအဂီၫ်, တၫ်ကသူၣ်ထီၣ်က့ၤတၫ်ဒုးကဲထီၣ်တ့ၫ်တၫ်လီၫ်တဖၣ်အဂီၫ်, တၫ်ပတုာ်တၫ်ခးလၢအဂၢၫ်ကျၢၫ်တၫ်အၢၣ်လီၤကန့ၫ်အဂီၫ် တၫ်ကတၢၣ်ပီၣ်တဲသကိးအဂ့ၫ်တဖၣ် ပာ်ဃုာ်၀ဲအဂ့ၫ် သိၣ်မှံကရၢ(၃)ဖု အတၫ်ထုးထီၣ်ပာ်ဖျါအပူၤ ကွဲးဖျါဃာ်၀ဲန့ၣ်လီၤ.
