လါမးရှး(၆)သီ, ၂၀၂၄နံၣ်
ထံဖိကီၫ်ဖိခဲလၢာ်လၢသးနံၣ်ၦဲၤတဖၣ် တကဲသုးတသ့ ခီဖျိလၢသုးကီၣ်ကး ကမျၢၫ်တၫ်ဘၣ်ကဲသုးတၫ်ဘျၢအဃိ သးစၫ်လၢတအဲၣ်ဒိးကဲသုး(၄၀၀)ဂၤဘျဲၣ် ဟဲနုာ်လီၤအိၣ်ကဒုလၢ KNU-ဒူသထူၣ်ကီၫ်ရ့ၣ်အဂ့ၫ် ဒူသထူၣ်ကီၫ်ရ့ၣ် PDF ပှၤဘၣ်မူဘၣ်ဒါတဲ၀ဲန့ၣ်လီၤ.
သုးမီၤစိရိၤလီၫ်လံၤ အူသါရွ့ၣ်အစိၤ ၂၀၁၀နံၣ်အပူၤ ပာ်လီၤဃာ် ကမျၢၫ်တၫ်ဘၣ်ကဲသုးတၫ်ဘျၢန့ၣ် သုးကီၣ်ကးအခိၣ် မ့အီၣ်လဲၣ် မၤမူထီၣ်က့ၤတၫ်ဘျၢ ဖဲအပူၤကွံာ်လါဖ့ၤဘြူၤအါရံၤ(၁၀)သီအနံၤန့ၣ်လီၤ.
တၫ်ဘိးဘၣ်ရၤလီၤလၢ တၫ်ပာ်ဂၢၫ်ပာ်ကျၢၤ ကမျၢၫ်တၫ်ဘၣ်ကဲသုးတၫ်ဘျၢ၀ံၤအလီၫခံ တလါဃၣ်ဃၣ်အတီၫ်ပူၤ သးစၫ် (၆၀၀)ဂၤဘျဲၣ် ကဟဲနုာ်လီၤလၢ KNU-ဒူသထူၣ်ကီၫ်ရ့ၣ်အပူၤ၀ံၤ ဖဲလါ၀ဲန့ၣ်အပူၤ သးစၫ်(၄၀၀)ဂၤဘျဲၣ် ဟဲတုၤ၀ဲန့ၣ်လီၤ.
သးစၫ်လၢဟဲနုာ်လီၤအိၣ်ကဒုတဖၣ် KNU-ဒူသထူၣ်ကီၫ်ရ့ၣ် ပၢဆှၢရဲၣ်ကျဲၤဃာ်အီၤ၀ံၤအလီၫ်ခံ ဒ်အ၀ဲသ့ၣ်အတၫ်အဲၣ်ဒိးအသိး တၫ်ကမၤစၢၤအီၤအဂ့ၫ် ဒူသထူၣ်ကီၫ်ရ့ၣ် PDF ဘၣ်မူဘၣ်ဒါ ကိၣ်အ့မ့ထိတဲ၀ဲန့ၣ်လီၤ.
မၤလီၤတံၫ်၀ဲအဖၢမုၫ်လီၤ. ကထီၣ်တၫ်မၤလိဧါ. ကမၤ PDF ဧါ. မ့တမ့ၫ် တအဲၣ်ဒိးကဲသုးဘၣ်အဃိ ဟဲအိၣ်ကဒုဧါလီၤ. ဟဲဃုာ်ဒီးဟံၣ်ဖိဃီဖိအိၣ်အဃိ ဘၣ်မၤလီၤတံၫ်လီၤ. ဘၣ်မၤဒ်လဲၣ်တခီ ပတၢၣ်ပီၣ်တဲသကိးဒီး တၫ်ကရၢကရိလၢအိၣ်ဖဲအံၤတဖၣ်၀ံၤ ပကမၤထွဲဒ်အ၀ဲသ့ၣ်လိၣ်ဘၣ်၀ဲအသိးလီၤ. အါတက့ၫ်ဒု မ့ၫ်ၦၤတဖၣ်လၢအဲၣ်ဒိးမၤ တၫ်ပၢၫ်ဆၢတၫ်မၤတဖၣ်လီၤအဂ့ၫ် တဲ၀ဲန့ၣ်လီၤ.
သးစၫ်လၢဟဲနုာ်လီၤအိၣ်ကဒုဖဲ KNU-ဒူသထူၣ်ကီၫ်ရ့ၣ်တဖၣ်အံၤ ဆဲးကျိးလိာ်သးလၢ တၫ်ပၢၫ်ဆၢဂံၫ်ဘါကရၢတဖၣ်တဆီ၀ံၤ လၢအကျါ အါတက့ၫ်မ့ၫ်ပိာ်ခွါတဖၣ် ဒီးပိာ်မုၣ်နီၫ်ဂံၫ်ပာ်ဃုာ် ခံမျးကယၤအဂ့ၫ်တဲ၀ဲလီၤ.
သုးကီၣ်ကး ကမျၢၣ်တၫ်ဘၣ်ကဲသုးတၫ်ဘျၢန့ၣ် ပိာ်ခွါ သးနံၣ်(၁၈)နံၣ် တုၤ(၄၅)နံၣ်, ပိာ်မုၣ်သးနံၣ်(၁၈)နံၣ်တုၤ(၃၅)နံၣ် အစှၤကတၢၫ်ကဘၣ်ကဲသုး (၂)နံၣ်တုၤလၢ(၅)နံၣ်န့ၣ်လီၤ.
သုးကီၣ်ကးတခီ သုးတၫ်သိၣ်လိ အဆိကတၢၫ်(၁)၀ီ ကစးထီၣ်မၤ၀ဲဖဲ တါ(သင်္ကြန်)လီၤ၀ံၤအလီၫ်ခံ၀ံၤ တၫ်သိၣ်လိတကတီၫ်န့ၣ် ၦၤနီၫ်ဂံၫ်အိၣ်(၅၀၀၀)ဂၤ, တနံၣ်န့ၣ်ၦၤနီၫ်ဂံၫ်(၆၀၀၀၀)ဂၤ ကဘၣ်ကဲသုးအဂီၫ် ကကိး၀ဲအဂ့ၫ် ရဲၣ်ကျဲၤဃာ်၀ဲန့ၣ်လီၤ.
ကမျၢၫ်တၫ်ဘၣ်ကဲသုးတၫ်ဘျၢအဃိ သူၣ်ဘီၣ်သးစၫ်တဖၣ် နုာ်လီၤလၢတၫ်ပၢၫ်ဆၢသုးပူၤ, လဲၤဆူကီၫ်ကၠီၣ်တဲၣ် ပာ်ဃုာ်ဟးထီၣ်ဆူထံဂုၤကီၫ်ဂၤ လၢဖိးသဲစးမ့ၫ်ဂ့ၤ, တဖိးသဲစးမ့ၫ်ဂ့ၤ အိၣ်၀ဲအါမးန့ၣ်လီၤ.
ကညီဒီကလုာ်စၢဖှိၣ်ကရၢ (KNU)ပာ်ဃုာ် တၫ်ပၢၫ်ဆၢဂံၫ်ဘါကရၢတဖၣ်တခီ သုးကီၣ်ကး ကမျၢၫ်တၫ်ဘၣ်ကဲသုးတၫ်ဘျၢန့ၣ် တၫ်ကပာ်ဖှိၣ်ထီဒါသကိးဘၣ်အဂီၫ်ဒီး တၫ်ကနုာ်လီၤဘၣ်လၢ တၫ်ပၢၫ်ဆၢဂံၫ်ဘါကရၢတဖၣ်အိၣ်အဂီၫ် တဲဆီၣ်တခူထီၣ်ဃာ်၀ဲန့ၣ်လီၤ.
ref:thanlwintimes
