လါမးရှး (၄)သီ, ၂၀၂၄နံၣ်
၂၀၂၄နံၣ်, လါမးၡး(၄)သီအနံၤ, စကဲကီၫ်ခီ, တးဆဲၣ်ကီၫ်ဆၣ်(တန့်ဆည်မြို့နယ်), ကၣ်ထူမးသ၀ီပၢၤကီၫ်သုးကလၢၤ(ကံထူးမရွာရဲစခန်း) PDFသုးပာ်ဖှိၣ်တဖၣ်ထီၣ်ဒုးမၤန့ၫ်၀ဲအဂ့ၫ် ဒီကလုာ်ဃူဖိးပဒိၣ်(အမျိုးသားညီညွတ်ရေးအစိုးရ) NUG တၫ်ဒီသဒၢကိတိာ်၀ဲၤကျိၤ ပာ်ဖျါဃာ်၀ဲ တနံၤအံၤန့ၣ်လီၤ.
ပၢၤကီၫ်သုးရ့ၣ်-၁၆, ခမရ-၃၆၁ ဒီး ပၠူၣ်စီထံတဖၣ် အိၣ်ဆီလီၤ စကဲကီၫ်ခီ(စစ်ကိုင်းတိုင်း), တးဆဲၣ်ကီၫ်ဆၣ်, ကၣ်ထူမးသ၀ီပၢၤကီၫ်သုးကလၢၤအံၤ စးထီၣ်ဖဲ လါဖ့ၤဘြူၤအါရံၤ(၂၁)သီအနံၤ နီၫ်ဂံၫ်(၁)သုးဟီၣ်က၀ီၤ, ဆွ့ၣ်ဘိၣ်ကီၫ်ရ့ၣ်(ရွှေဘိုခရိုင်) နီၫ်ဂံၫ်(၁)တၫ်ပၢဆှၢရဲၣ်ကျဲၤအသိး ဆွ့ၣ်ဘိၣ်ကီၫ်ရ့ၣ် PDFသုးရ့ၣ်(၃), (၆), (၁၂) တၫ်တိာ်ကူၣ်ခိၣ်ကျၢၫ်(၅၂) ဆွ့ၣ်ဘိၣ်ကီၫ်ရ့ၣ် သုးရ့ၣ် (၇), (၈), (၁၆) ဒီး စကဲကီၫ်ရ့ၣ် သုးရ့ၣ်(၃)တဖၣ် ပာ်ဖှိၣ်ထီၣ်သးဒီး တၫ်ထီၣ်ဒုး၀ဲန့ၣ်လီၤ.
တၫ်ဒုးအပူၤ သုးကီၣ်ကးကလံၤသုး တတါအူ(တံတားဦး), နးစၣ်(နမ့်စန်), နမခ, တီအူ(တောင်ငူ)ဒီး န့ၣ်ပၠံၣ်တီၣ်(နေပြည်တော်) ကဘီယူၤဒုးသုး Y-12, Mi-35တဖၣ် ဟဲဒုး၀ဲလၢကလံၤကျါတၫ်ဒုးတစှၤန့ၣ် (၂၃)ဘျီအဂ့ၫ်ပာ်ဖျါဃာ်၀ဲန့ၣ်လီၤ. ဖဲလါဖ့ၤဘြူၤအါရံၤ(၂၂)သီအနံၤဒီး (၂၃)သီအနံၤစ့ၫ်ကီး တၫ်ဒုးကဲထီၣ်တ့ၫ်သးလၢ ကၣ်ထူမးသ၀ီပၢၤကီၫ်သုးကလၢၤကလံၤစိးတပၤ(ကံထူးမရွာ ရဲစခန်းမြောက်ဘက်) ခမရ(၁၁,၇၀၈), ပၠူၣ်စီထံသုးပာ်ဖှိၣ်တဖၣ်အဘၢၣ်စၢၤန့ၣ်လီၤ.
တနံၤအံၤ ဂီၤကတီၫ်န့ၣ် သုးကီၣ်ကးအပှၤသုးဖိတဖၣ် ပာ်တ့ၫ်သုးကလၢၤဃ့ၫ်ဖျိးကွံာ်အဃိ ကၣ်ထူမးပၢၤကီၫ်သုးကလၢၤ တၫ်ထီၣ်ဒုးမၤန့ၫ်၀ဲ၀ံၤ G-3(၅)ခိၣ်, စုမ့ၣ်ပိၫ် (၄)ဖျၢၣ်, MA-15 ကျိချံ (၁၆၃၅)ဖျၢၣ်, ကျိချံအဒၢ(၁၂)ခါ, စ့(၃၈)ကလီၤ ဒီး မီၫ်တီၣ်တုၤအါအါဂီၫ်ဂီၫ် မၤန့ၫ်၀ဲစ့ၫ်ကီးန့ၣ်လီၤ.
တၫ်ဒုးတဖၣ်အပူၤ သုးကီၣ်ကးအပှၤသုးဖိ(၁၈)ဂၤသံ၀ဲ, (၃၂)ဂၤဘၣ်ဒိ၀ဲ၀ံၤ မ့မ့ၫ် PDFတပၤ သံ၀ဲ(၂၀)ဂၤအဂ့ၫ် ဒီကလုာ်ဃူဖိးပဒိၣ်(အမျိူးသားညီညွတ်ရေးအစိုးရ) NUG တၫ်ဒီသဒၢကိတိာ်၀ဲၤကျိၤပာ်ဖျါဃာ်၀ဲန့ၣ်လီၤ.
photo:MOD
