လါမးရှး (၂)သီ, ၂၀၂၄နံၣ်
တနံၤအံၤ လါးမးၡး(၂)သီအနံၤ, ဘၣ်ထွဲဒီးကီၫ်ပယီၤသုးဟံးန့ၫ်ဆူၣ်ထံကီၫ်တၫ်စိတၫ်ကမီၤ ပှဲၤထီၣ်(၃)နံၣ်၀ံၤ ကီၫ်ကၠီၣ်တဲၣ်ဘျီၣ်ဒိၣ်(ထိုင်းနိုင်ငံလွတ်တော်) တီခိၣ်ရိၣ်မဲမၤ၀ဲ တၫ်တၢၣ်ပီၣ်တဲသကိးအဖီခိၣ် သုးကီၣ်ကးတပၤထီဒါ၀ဲအဂ့ၫ် ဟ့ၣ်ထီၣ်လံာ်တၫ်ထီဒါဆူ ကၠီၣ်တဲၣ်ထံဂုၤကီၫ်ဂၤကိတိာ်၀ဲၤကျိၤအအိၣ် ဖဲအပူၤကွံာ်တနွံအတီၫ်ပူၤအဂ့ၫ် တၫ်သ့ၣ်ညါဘၣ်န့ၣ်လီၤ.
ကၠီၣ်တဲၣ်ဘျီၣ်ဒိၣ်အံၤ ကီၫ်ပယီၤသုးဟံးန့ၫ်ဆူၣ်ထံကီၫ်တၫ်စိတၫ်ကမီၤ ယံာ်(၃)နံၣ်ဘျဲၣ်ကတီၫ် ကီၫ်ပယီၤဆူဒံၣ်မိၣ်ကရံးတံး(ဒီမိုကရက်တစ်မြန်မာသို့) ဒီးဘၣ်ထွဲကၠီၣ်တဲၣ်-ပယီၤကီၫ်ဆၢဟီၣ်က၀ီၤ တၫ်ဘံၣ်တၫ်ဘၢ တၫ်ပိာ်ထွဲထီၣ်သးတဖၣ်အဖီခိၣ် တၫ်မၤ၀ဲတၫ်တၢၣ်ပီၣ်တဲသကိး ဖဲ လါမးၡး(၂)သီဒီး (၃)သီအနံၤန့ၣ်လီၤ.
တၫ်မၤ၀ဲတၫ်တၢၣ်ပီၣ်တဲသကိးလၢ ကၠီၣ်တဲၣ်-ပယီၤထံကီၫ်(၂)ဘ့ၣ်အဘၢၣ်စၢၤ တၫ်ရ့လိာ်ဘၣ်ထွဲ ကဆံးလီၤစှၤလီၤအဂီၫ်အဃိ တၫ်ထီဒါ၀ဲကၠီၣ်တဲၣ်ဘျီၣ်ဒိၣ်အဂ့ၫ်ဒီး ကီၫ်ပယီၤအတၫ်ဘၣ်ယိၣ်ဘၣ်ဘှီတဖၣ် တၫ်ကတဲဖျါထီၣ်န့ၫ်ဆူ ဘျီၣ်ဒိၣ်အဂ့ၫ်သုးကီၣ်ကး စံး၀ဲန့ၣ်လီၤ.
သုးကီၣ်ကး ထံဂုၤကီၫ်ဂၤကိတိာ်၀ဲၤကျိၤတခီ “ တၫ်ဟူးတၫ်ဂဲၤလၢအကမၤဘၣ်ဒိ ကတီၫ်တၫ်ရ့လိာ်ဘၣ်ထွဲလၢအဂ့ၤတဖၣ် ခါဆူညါသုတမၤဘၣ်၀ဲအဂ့ၫ် အဲၣ်ဒိးဒုးသ့ၣ်ညါ၀ဲအဂ့ၫ်“ တၫ်ဆှၢထီၣ်ဆူ ကၠီၣ်တဲၣ်ထံဂုၤကီၫ်ဂၤကိတိာ်၀ဲၤကျိၤ(ထိုင်းနိုင်ငံခြားရေးဝန်ကြီးဌာန)လံာ်အပူၤ ပာ်ဖျါဃာ်၀ဲန့ၣ်လီၤ.
ကၠီၣ်တဲၣ်ဘျီၣ်ဒိၣ် လၢတၢၣ်ပီၣ်တဲသကိး ကီၫ်ပယီၤဂ့ၫ်၀ီ(မြန်မာ့အရေး)အံၤ ကၠီၣ်တဲၣ်ပဒိၣ်တၫ်ထီဒါပၣ်တံၣ်(ပါတီ) Moveforward တီခိၣ်ရိၣ်မဲ၀ဲ၀ံၤ ပၣ်တံၣ်(ပါတီ)ခိၣ်နၫ်တဖၣ် စ့ၫ်ကီး ပာ်ဃုာ်တၢၣ်ပီၣ်တဲသကိး၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
တၫ်တၢၣ်ပီၣ်တဲသကိးအပူၤ ဒီကလုာ်ဃူဖိးပဒိၣ်(အမျိုးသားညီညွတ်ရေးအစိုးရ) (NUG)ထံဂုၤကီၫ်ဂၤကိတိာ် ဒီၣ်စ့ၣ်မၣ်အီၣ်(ဒေါ်ဇင်မာအောင်), ဘီမုၫ်စၢဖှိၣ်ကရၢဘၣ်ထွဲကီၫ်ပယီၤဂ့ၫ်၀ီမီၫ်သီ(ကုလသမဂ္ဂဆိုင်ရာ မြန်မာနိုင်ငံသံအမတ်ကြီး) အူကၠီၣ်မိထိ(ဦးကျော်မိုးထွန်း)ဒီး ကညီဒီကလုာ်စၢဖှိၣ်ကရၢ(ကရင်အမျိုးသားအစည်းအရုံး) (KNU)ခၢၣ်စးခိၣ်နၫ်တနီၤစ့ၫ်ကီး လဲၤထီၣ်၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
သုးကီၣ်ကးအံၤ အဟံးန့ၫ်ဆူၣ်ထံကီၫ်တၫ်စိတၫ်ကမီၤပှဲၤထီၣ်(၃)နံၣ်ကတီၫ် ဖဲ လါဖ့ၤဘြူၤအါရံၤ(၁၀)သီအနံၤန့ၣ် ကမျၢၫ်တၫ်ဘၣ်ကဲသုးတၫ်ဘျၢအံၤ အသးသမူအိၣ်လံအဂ့ၫ်ထုးထီၣ်ပာ်ဖျါဝဲ၀ံၤ လၢသုးကီၣ်ကး အတၫ်ထုးထီၣ်ပာ်ဖျါအဃိ ကီၫ်ပယီၤသးစၫ်လၢ အသးနံၣ်ပာ်ဃုာ်လၢ တၫ်ကဘၣ်ကဲသုးတဖၣ် ဟဲနုာ်လီၤလၢကီၫ်ကၠီၣ်တဲၣ်ပူၤ ဟဲအါထီၣ်၀ဲကွ့ၫ်ကွ့ၫ်န့ၣ်လီၤ.
ref:theirrawaddy
