လါဖ့ၤဘြူၤအါရံၤ ၂၈သီႇ ၂၀၂၄နံၣ်
ဖဲ ၂၀၂၄နံၣ်, လါဖ့ၤဘြူၤအါရံၤ(၂၇)သီအနံၤ, သုးကီၣ်ကးကျိဖးဒိၣ်သုးလၢ အိၣ်ဆီလီၤအသးဖဲ ထ့ၣ်တီ(ထိန်တော)ဒီး မုၫ်ဃါပျီ၀့ၫ်(နတ်သံကွင်းမြို့), ပရဲကျိတိၤခိၣ်ထီး(စစ်တောင်းတံတားထိပ်)သုးတဖၣ် ခးလီၤကျိဖးဒိၣ်တဖၣ် လၢခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢ, ချၢၣ်လွံၫ်ထူၣ်ကီၫ်ရ့ၣ်, လၢၫ်ဒိၣ်ကီၫ်ဆၣ်, မုၫ်ဃါပျီ၀့ၫ်(နတ်သံကွင်းမြို့), တကိၣ်တဲၣ်(တံခွန်တိုင်)ဟီၣ်က၀ီၤပူၤ အိၣ်၀ဲအသိး ဟါခီလီၤအဆၢကတီၫ် ဒွဲၣ်အူကွံာ်၀ဲ မုၫ်ဃါပျီ၀့ၫ်, တကိၣ်တဲၣ်ဟီၣ်က၀ီၤအဃိ ဟီၣ်က၀ီၤဒီတဘ့ၣ်မ့ၣ်အူအီၣ်ကလၢာ်လီၤအဂ့ၫ် လၢၫ်ဒိၣ်ကီၫ်ဆၣ် ပှၤတဲတၫ်ပၢ ပဒိၣ်စီၤ၀ါမုၫ် တဲဘၣ်အၣ်ထူခ့ၣ်န့ၣ်လီၤ.
ဒ်န့ၣ်အသိး မဟါအနံၤ လါဖ့ၤဘြူၤအါရံၤ(၂၇)သီအနံၤ, (၄)နၣ်ရံၣ်တခီအဆၢကတီၫ်, သုးကီၣ်ကး ဟဲခးလီၤ (၁၂၀-မမ)ကျိဖးဒိၣ်(၃)ဖျၢၣ်ဖဲ ချၢၣ်လွံၫ်ထူၣ်ကီၫ်ရ့ၣ်, လၢၫ်ဒိၣ်ကီၫ်ဆၣ်, ကည့ၣ်ကၠိသ၀ီ(ကညင်ကျိုးရွာ)ပူၤအဃိ ကည့ၣ်ကၠိတၫ်ဆါဟံၣ်ဟးဂီၤကွံာ်၀ဲ ဒီတဖျၢၣ်အသိး ကည့ၣ်ကၠိသ၀ီဖိ(၂)ဂၤလၢအမ့ၫ် မီၣ်ထိထိ(မောင်ထွန်းထွန်း)ဒီး အီၣ်ထိလ့(အောင်ထွန်းလင်း)ဟံၣ်တဖၣ်စ့ၫ်ကီး ဟးဂီၤကွံာ်၀ဲအဂ့ၫ် အ၀ဲတဲ၀ဲအဖီခိၣ် တၫ်သ့ၣ်ညါဘၣ်န့ၣ်လီၤ.
လါဖ့ၤဘြူၤအါရံၤ(၂၅)သီအနံၤ, (၁၁)နၣ်ရံၣ်အဆၢကတီၫ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ချၢၣ်လွံၫ်ထူၣ်ကီၫ်ရ့ၣ်, လၢၫ်ဒိၣ်ကီၫ်ဆၣ်ပူၤ သုးကီၣ်ကးတီအူကလံၤသုး(စစ်ကောင်စီတောင်ငူလေတပ်) အကဘီယူၤဒုးသုး(ကၠဲးဖဲၣ်တၣ်)(၆)ခိၣ် ဒီး ကဘီယူၤ(ဟဲၣ်လံၣ်ခီၣ်ပတၣ်)(၁)ခိၣ် ဟဲ၀ဲ(၂)၀ီ ဒီး ဟဲခးလီၤတၫ်လၢ ကၠိတီ(ကျွန်းတော) KNLAသုးကလၢၤ, ထံမိၫ်ဂံၫ်ထၣ်ပၢၤကီၫ်သုးကလၢၤ(ကေလာသရဲစခန်း)ဒီး ကျီမီၤခိၣ်တၫ်သွၣ်ခိၣ်အလီၫ် တၫ်လီၫ်(၃)တီၤခဲလၢာ် (၁၅)ဘျီန့ၣ်လီၤ.
သုးကီၣ်ကး အတၫ်ဟဲခးလီၤတၫ်လၢ ထံမိၫ်ဂံၫ်ထၣ်ပၢၤကီၫ်သုးကလၢၤ(ကေလာသရဲစခန်း)အပူၤအဃိ သုးကီၣ်ကးအပှၤသုးဖိလၢ ဘၣ်တၫ်ဖီၣ်န့ၫ်အီၤလၢတၫ်ဒုးအပူၤဒီး တၫ်ဒုးလီၤဃာ်ဃိၣ်ပူၤ (၁)ဂၤသံ၀ဲဒီး (၁၄)ဂၤဘၣ်ဒိ၀ဲအသိး ထံမိၫ်ဂံၫ်ထၣ်ပၢၤကီၫ်သုးကလၢၤ(ကေလာသရဲစခန်း)တၫ်သူၣ်ထီၣ်စ့ၫ်ကီး ဟးဂီၤ၀ဲအဂ့ၫ် လၢၫ်ဒိၣ်ကီၫ်ဆၣ်ပှၤတဲတၫ်ပၢ ပဒိၣ်စီၤ၀ါမုၫ် တဲ၀ဲန့ၣ်လီၤ.
ဖဲ ၂၀၂၄နံၣ်, လါဖ့ၤဘြူၤအါရံၤ(၂၅)သီအနံၤ, ဟါ(၇)နၣ်ရံၣ်ဘျဲၣ်အဆၢကတီၫ် သုးကီၣ်ကး ခးလီၤကျိဖးဒိၣ်(၃)ဖျၢၣ်လၢ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ချၢၣ်လွံၫ်ထူၣ်ကီၫ်ရ့ၣ်, လၢၫ်ဒိၣ်ကီၫ်ဆၣ်, အီပ၀ါသ၀ီ(အောပဝါးရွာ)ပူၤအဃိ ကမျၢၫ်(၂)ဂၤလၢအမ့ၫ် စီၤ၀့ၫ်ခိၣ်(စောဝေခို), သးနံၣ်(၂၇)နံၣ်ဒီး မးယံၣ်၀့(မရီဝင်း), သးနံၣ် (၅၈)နံၣ် ဘၣ်ဒိ၀ဲန့ၣ်လီၤ.
ဖဲ လါဖ့ၤဘြူၤအါရံၤ(၂၆)သီအနံၤစ့ၫ်ကီး သုးကီၣ်ကး ဟဲတ့ၫ်လီၤမ့ၣ်အူမ့ၣ်ပိၫ်လၢဒရိဖဲ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ချၢၣ်လွံၫ်ထူၣ်ကီၫ်ရ့ၣ်, လၢၫ်ဒိၣ်ကီၫ်ဆၣ်, ကည့ၣ်ကၠိသ၀ီပူၤအဃိ ဒူသ၀ီဖိ(၂)ဂၤလၢအမ့ၫ် ကိၣ်စိကၠံၣ်(ကိုစိုးကြည်) ဒီး ကိၣ်စ့ၣ်ထိ(ကိုစိန်ထွန်း)ဟံၣ်တဖၣ်ဘၣ်ဒိ၀ဲဒၣ်အဂ့ၫ် စံး၀ဲန့ၣ်လီၤ.
လါဖ့ၤဘြူၤအါရံၤ(၂၅)သီအနံၤ, ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ချၢၣ်လွံၫ်ထူၣ်ကီၫ်ရ့ၣ်, ဆီထံးကီၫ်ဆၣ်, ခၠိၣ်အ့သ၀ီ(ချုံအင်းရွာ)ပူၤအဃိ ဖိသၣ်တဂၤဘၣ်ဒိ၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
ဖဲ ၂၀၂၄နံၣ်, လါဖ့ၤဘြူၤအါရံၤ(၁)လါအတီၫ်ပူၤဒၣ်လဲၣ်န့ၣ် သုးကီၣ်ကး ဟဲခးလီၤတၫ်လၢ ကလံၤကျါဒီး ကျိဖးဒိၣ်တဖၣ်အဃိ တၫ်သိၣ်လိကၠိတဖၣ်, တၫ်ဘူၣ်တၫ်ဘါတၫ်သူၣ်ထီၣ်တဖၣ်, ကမျၢၫ်အိၣ်ဟံၣ်ဃီတၫ်သူၣ်ထီၣ်တဖၣ်ဒီး ဆၣ်ဖိကီၫ်ဖိတဖၣ် တၫ်ဘၣ်ဒိဘၣ်ထံး, တၫ်သံတၫ်ပှၫ်အိၣ်ထဲ၀ဲအါအါဂီၫ်ဂီၫ်န့ၣ်လီၤ.
