လါဖ့ၤဘြူၤအါရံၤ ၂၈သီႇ ၂၀၂၄နံၣ်
ယိၤဒိၣ်ကီၫ်စဲၣ်(ရှမ်းပြည်နယ်), ဆံၣ်ဆဲၣ်ကီၫ်ဆၣ်(ဆီဆိုင်မြို့နယ်), နါခဲး(နားခိုက်)သ၀ီအပူၤ သုးကီၣ်ကး လဲၤတ့ၫ်လီၤမ့ၣ်ပိၫ်အဃိ ကမျၢၫ်သံ(၁)ဂၤဒီး ကမျၢၫ်အိၣ်ဟံၣ်(၄)ဖျၢၣ်ဟးဂီၤကွံာ်၀ဲအဂ့ၫ် ပအိးဒီကလုာ်တၫ်ထူၣ်ဖျဲးသုးမုၫ်ဒိၣ်(PNLA) ထုးထီၣ်ပာ်ဖျါဃာ်၀ဲတနံၤအံၤန့ၣ်လီၤ.
တနံၤအံၤ ဂီၤ(၉)နၣ်ရံၣ်တခီအဆၢကတီၫ် သုးကီၣ်ကး ကဘီယူၤလဲၤတ့ၫ်လီၤမ့ၣ်ပိၫ်(၈)ဘျီ ဖဲနါခဲး(နားခိုက်)သ၀ီပူၤ၀ံၤ ခးလီၤစ့ၫ်ကီးဒီးကျိဆဲး(စစ်လက်နက်)တဖၣ်အဂ့ၫ် PNLAပာ်ဖျါဃာ်၀ဲန့ၣ်လီၤ.
သုးကီၣ်ကး အတၫ်ဟဲခးလီၤတၫ်အပူၤ နါခဲး သ၀ီဖိလၢ သးနံၣ်အိၣ်(၆၃)နံၣ်တဂၤသံ၀ဲ၀ံၤ ကမျၢၫ်အိၣ်ဟံၣ်(၄)ဖျၢၣ်ဟးဂီၤကွံာ်၀ဲအသိး တၫ်သိၣ်လိကၠိတနီၤစ့ၫ်ကီး ဟးဂီၤကွံာ်၀ဲအဂ့ၫ် PNLA အတၫ်ပာ်ဖျါအဖီခိၣ် တၫ်သ့ၣ်ညါဘၣ်န့ၣ်လီၤ.
ဖဲအပူၤကွံာ် လါဖ့ၤဘြူၤအါရံၤ(၂၆)သီအနံၤစ့ၫ်ကီး ဟိၣ်ပိကီၫ်ဆၣ်(ဟိုပုန်းမြို့နယ်), စငီသ၀ီကရူၫ်(စငေါရွာအုပ်စု), တဖူ,က့သ၀ီ(တဖူꩻကဲင်းကျေးရွာ)ပူၤ သုးကီၣ်ကး လဲၤတ့ၫ်လီၤမ့ၣ်ပိၫ်အဃိ ဟံၣ်(၁)ဖျၢၣ်ဟးဂီၤကွံာ်၀ဲအဂ့ၫ် ပာ်ဖျါဃာ်၀ဲန့ၣ်လီၤ. သုးကီၣ်ကးတခီ ပာ်ပနီၣ်၀ဲကမျၢၫ်တဖၣ် ဒ်ဒုၣ်ဒါအသိး၀ံၤ ပညိၣ်ဒုး၀ဲ ပအိးသ၀ီတဖၣ်အဃိ မ့ၫ်ဒၣ်တၫ်ဖံးတၫ်မၤလၢ တလီၤကူလီၤဂၫ်ဒ်ပှၤကညီ တၫ်မၤအၢမၤသီတဖၣ်အဂ့ၫ် PNLA တဲ၀ဲန့ၣ်လီၤ.
ဒ်န့ၣ်အသိး ကမျၢၫ်တဖၣ်တခီ ကဒီသဒၢန့ၫ်၀ဲ သုးကီၣ်ကး ကလံၤကျါတၫ်ဒုးအဂီၫ် တၫ်ကခူၣ်ပာ် တၫ်အိၣ်သူၣ်တၫ်ပူၤတဖၣ်(ဗုံးခိုကျင်း) တဂၤစုာ်စုာ်အဂ့ၫ်စ့ၫ်ကီး PNLA တဲဆီၣ်တခူထီၣ်ဃာ်၀ဲန့ၣ်လီၤ.
photo:PNLA
