လါဖ့ၤဘြူၤအါရံၤ ၂၈သီႇ ၂၀၂၄နံၣ်
ကညီသုးခိးကီၫ်ဆၢ(BGF) လၢထုးဖးအသးလၢသုးကီၣ်ကးအစုတီၤဖီလာ်အံၤ လၢကညီကီၫ်စဲၣ်(ကရင်ပြည်နယ်), လူၫ်ပျဲၫ်ကီၫ်ဆၣ်(လှိုင်းဘွဲ့မြို့နယ်), ဒူသ၀ီတဖၣ်အပူၤ ထၢသုးဖိအသီ၀ံၤ ဟ့ၣ်၀ဲသုးတၫ်မၤလိအိၣ်၀ဲအဂ့ၫ် Than Lwin Times တၫ်ကစီၣ်သန့ ပာ်ဖျါ၀ဲလီၤ.
ၦၤလၢအိၣ်ဆိးလၢ လူၫ်ပျဲၫ်ကီၫ်ဆၣ် ဒူသ၀ီတဖၣ်အပူၤ သးနံၣ်(၁၈)နံၣ်တုၤ (၄၅)နံၣ်အဖီလာ် ပိာ်ခွါတဖၣ် စးထီၣ်ဖဲ လါဖ့ၤဘြူၤအါရံၤ, လါတ၀ာ်အကတီၫ်န့ၣ် ထၢသုးဖိအသီ၀ံၤ ဒူသ၀ီတဖျၢၣ်န့ၣ် အစှၤကတၢၫ် တၫ်ကဘၣ်ဟ့ၣ်အီၤအဂၤ(၁၀)ဒီး အအါကတၢၫ်န့ၣ်တၫ်ကဘၣ်ဟ့ၣ်အီၤ(၂၅)ဂၤန့ၣ်လီၤ.
ဂံၫ်ခီၣ်ထံးတၫ်ကစီၣ်သန့တဖၣ် တဲ၀ဲအဖီခိၣ် သးစၫ်လၢတအဲၣ်ဒိးကဲသုးလၢ(BGF)အပူၤတဖၣ် ပဒ့ၣ်ဟးဆှဲးအသးဆူ ကီၫ်ကၠီၣ်တဲၣ်အိၣ်၀ဲန့ၣ်လီၤ. သးစၫ်ပိာ်ခွါ သုးဖိအသီလၢ(BGF)ထၢတဖၣ်အံၤ ဘၣ်တၫ်ဟ့ၣ်အီၤသုးတၫ်မၤလိဖဲ (BGF)တၫ်ပၢလၢအမ့ၫ် ကညီကီၫ်စဲၣ်, လူၫ်ပျဲၫ်ကီၫ်ဆၣ်, ကၠၣ်အ့သ၀ီ(ကြာအင်းကျေးရွာ)အပူၤ၀ံၤ လၢတၫ်မၤလိအပူၤ တၫ်သိၣ်လိအ၀ဲသ့ၣ် ဂံၫ်ခီၣ်ထံးသုးတၫ်မၤလိ တကးဘၣ် ကသံၣ်တၫ်မၤလိဒီး ကျိဖးဒိၣ်တၫ်မၤလိတဖၣ်ပာ်ဃုာ်၀ဲအဂ့ၫ် ၦၤလၢအိၣ်ဘူးဒီး(BGF)တဖၣ် တဲ၀ဲအဖီခိၣ်တၫ်သ့ၣ်ညါဘၣ်လီၤ.
လူၫ်ပျဲၫ်ကီၫ်ဆၣ် တကးဘၣ် ရၤမတံ( မြဝတီ), ကမးမီ(ကမမောင်း), ဖၣ်အၣ်ကီၫ်ဆၣ်(ဘားအံမြို့နယ်)တကပၤစ့ၫ်ကီး (BGF)သုးတဖၣ် လၢတၫ်ကထၢသုးဖိသီအဂီၫ် လဲၤကရၢကရိ၀ဲအိၣ်အဂ့ၫ် လီၫ်က၀ီၤဂံၫ်ခီၣ်ထံးတၫ်ကစီၣ်သန့တဖၣ် တဲ၀ဲလီၤ. သုးခိးကီၫ်ဆၢ-BGFအံၤ ဖဲအပူၤကွံာ် လါယနူၤအါရံၤအပူၤ ထုးဖးအသးလၢ သုးကီၣ်ကးအစုတီၤဖီလာ်၀ံၤအလီၫ်ခံ လၢကမၤၦဲၤထီၣ်အသုးဂံၫ်ဘါအဂီၫ် ထၢသုးဖိအသီဒ်သိးအံၤန့ၣ်လီၤ.
သုးဖိအသီလၢဘၣ်တၫ်ထၢအီၤအံၤ သုးတၫ်မၤလိ မ့ၫ်၀ံၤအလီၫ်ခံ ကဘၣ်မၤတၫ်လၢ (BGF)သုးပူၤအသိးဒီး မ့ၫ်စ့ၫ်ကီးလၢ တၫ်ကဒီသဒၢလီၤက့ၤဒူသ၀ီအဂီၫ်အဂ့ၫ် ၦၤလၢအိၣ်ဘူးဒီး BGFတဖၣ်တဲ၀ဲလီၤ.
သုးကီၣ်ကးတကပၤ ပာ်လီၤတၫ်ဘျၢလၢ ကမျၢၫ်တၫ်ဘၣ်ကဲသုး(စစ်မှုထမ်းဥပဒေ ) အကတီၫ်(BGF) စ့ၫ်ကီး ထၢသုးဖိအသီအဃိ ကညီကီၫ်စဲၣ်အပူၤ လီၫ်က၀ီၤသးစၫ်အါတက့ၫ်န့ၣ် ပဒ့ၣ်ဟးဆှဲးအသးဆူ ကီၫ်ကၠီၣ်တဲၣ် ပူၤအါထီၣ်၀ဲကွ့ၫ်ကွ့ၫ်န့ၣ်လီၤ.
ကညီသုးခိးကီၫ်ဆၢ-BGF လၢထုးဖးအသးလၢ သုးကီၣ်ကးအစုတီၤဖီလာ်အံၤ ကဆီတလဲဒုးအိၣ်ထီၣ်က့ၤအမံၤဆူ(KNA)လီၤအဂ့ၫ် တၫ်ကစီၣ်ဟးထီၣ်၀ဲန့ၣ်လီၤ.
