လါဖ့ၤဘြူၤအါရံၤ ၂၇သီႇ ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်သူလ့ၤတၫ်ပၢဟီၣ်က၀ီၤ, ဒူပျာ်ယာ်ကီၫ်ရ့ၣ်အပူၤ တၫ်လီၫ်သကုၤဆးဒး တၫ်ဘၣ်သဂၢၫ်ခးလိာ်သးဒီး သုးကီၣ်ကးအသုးမ့ၫ်ဂ့ၤ, တၫ်ဒုးစဲာ်ပြဲး(ပျောက်ကျားပစ်ခတ်မှု)မ့ၫ်ဂ့ၤ အိၣ်၀ဲတပယူာ်ဃီ၀ံၤ ဒူပျာ်ယာ်ကီၫ်ရ့ၣ် ကီးတရံးကီၫ်ဆၣ်, ကီးတရံး၀့ၫ်ပူၤစ့ၫ်ကီး ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA )နုာ်လီၤဒုးတၫ် လၢ၀့ၫ်ပူၤအဃိ (KNU)တီခိၣ်ရိၣ်မဲ၀ံၤ ကမျၢၫ်လၢအိၣ်လၢ၀့ၫ်ပူၤတဖၣ် ဘၣ်တၫ်သုးန့ၫ်အလီၫ်အကျဲလၢတၫ်ပူၤဖျဲးအလီၫ်အဂ့ၫ KNU ပာ်ဖျါဃာ်၀ဲ ဖဲတနံၤအံၤန့ၣ်လီၤ.
ဒူပျာ်ယာ်ကီၫ်ရ့ၣ်, ကီးတရံးကီၫ်ဆၣ်, ကီးတရံး၀့ၫ်အပူၤ ခံကပၤတၫ်ဘၣ်သဂၢၫ်ခးလိာ်သးအဃိ ဖဲကမျၢၫ်လၢအိၣ်လၢ၀့ၫ်ပူၤတဖၣ် ပာ်တ့ၫ်ဟံၣ်ဃီတၫ်အိၣ်တၫ်ဆိးလီၫ်အကတီၫ် သုးကီၣ်ကးအသုးလၢ အိၣ်ဆီလီၤအသးဖဲကီးတရံး၀့ၫ်ပူၤ လၢအမ့ၫ် ခလရ(၃၄၃), ခလရ(၅၄၈), ခမရ(၂၀၇), ခမရ(၂၀၁)ဒီး ခမရ(၂၀၃)သုးရ့ၣ်တဖၣ် ဟံးန့ၫ်တၫ်ခွဲးတၫ်ယာ်၀ံၤ လၢ၀့ၫ်ပူၤက၀ီၤဒ့တနီၤအပူၤ တၫ်လီၫ်လၢအ၀ဲသ့ၣ်ဟံးန့ၫ်ဃာ်အလီၫ်န့ၣ် ကမျၢၫ်အဟံၣ်တဖၣ်နုာ်လီၤဘၢၣ်ဖျိ၀ဲ၀ံၤ တၫ်ဖိတၫ်လံၤလုၫ်ဒိၣ်ၦ့ၤဒိၣ်တဖၣ်ဟံးန့ၫ်၀ဲအိၣ်အသိး, ကမျၢၫ်အကျး(ဆိုင်ခန်း)တဖၣ်ဒွဲၣ်အူမၤဟးဂီၤကွံာ်၀ဲ, ခးနါစိၤ၀ဲလၢကျိဖိကျိဖးဒိၣ်တဖၣ်ဒီး ဟးလူၤတ့ၫ်လီၤမ့ၣ်ပိၫ်လၢဒရိတဖၣ်အိၣ်၀ဲန့ၣ်လီၤ.
ဖဲ၂၀၂၄နံၣ် လါယနူၤအါရံၤ(၂၁)သီအနံၤစ့ၫ်ကီး သုးကီၣ်ကးအသုးလၢ အိၣ်ဖဲကီးတရံး၀့ၫ်တဖၣ် ဖဲကညီဒီကလုာ်တၫ်ထူၣ်ဖျဲးသုးမုၫ်ဒိၣ်ဒီး သုးပာ်ဖှိၣ်တဖၣ်နုာ်လီၤဟံးန့ၫ်တၫ်လီၫ်လၢကီးတရံး၀့ၫ်ပူၤအကတီၫ် ကိးမုၫ်နံၤဒဲး ခးစိနါစိၤ၀ဲလၢကျိဖိကျိဖးဒိၣ်တဖၣ်, လူၤတ့ၫ်လီၤမ့ၣ်ပိၫ်ဒီးဒရိ(ဒရုန်း)တဖၣ်ဒီး ဒွဲၣ်အူထီၣ်ကမျၢၫ်အကျး(ဆိုင်ခန်း)တဖၣ် မၤ၀ဲတပယူာ်ဃီန့ၣ်လီၤ.
သုးဟံးန့ၫ်ဆူၣ်တၫ်စိတၫ်ကမီၤသုးကီၣ်ကးအသုးတဖၣ် လူၤဒွဲၣ်အူအီၣ်ကွံာ်ကမျၢၫ်အကျးတဖၣ်, လူၤတ့ၫ်လီၤမ့ၣ်ပိၫ်လၢဒရိ(ဒရုန်း)တဖၣ်အဃိ ကီးတရံး၀့ၫ်ပူၤ ကမျၢၫ်ဟံၣ်ဃီဒီးကျး(ဆိုင်ခန်း)အါမး မ့ၣ်အူအီၣ်ဟးဂီၤကွံာ်၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကညီတၫ်ထူၣ်ဖျဲးသုးမုၫ်ဒိၣ်(KNLA)တီခိၣ်ရိၣ်မဲ၀ဲဒီး တၫ်ပၢၫ်ဆၢသုးပာ်ဖှိၣ်(တော်လှန်ရေးပူးပေါင်းတပ်ဖွဲ့)တဖၣ်အံၤ သုးကီၣ်ကး အတၫ်ပၢတၫ်ပြးကလဲၤတရံးသးအဂီၫ် အ့ၡၢၣ်ကျဲမုၫ်ဒိၣ်(အာရှလမ်းမကြီး)လၢအရ့ဒိၣ်အံၤစ့ၫ်ကီး ဘၣ်တၫ်ပၢဆှၢအီၤန့ၫ်ဂ့ၤဂ့ၤလံ၀ံၤ ၀့ၫ်ပူၤသုးကီၣ်ကးအသုးတဖၣ် ကဒုးဖျိးကွံာ်၀ဲအဂီၫ်ဒီး ကပာ်လီၤတၫ်ပၢတၫ်ပြးကန့ၫ်အဂီၫ် ရဲၣ်ကျဲၤ၀ဲတကတီၫ်ဃီ၀ံၤ တၫ်ဒုးတဖၣ်အိၣ်၀ဲကိးမုၫ်နံၤဒဲးဃၣ်ဃၣ်န့ၣ်လီၤ.
photo:knu
