လါဖ့ၤဘြူၤအါရံၤ ၂၆သီႇ ၂၀၂၄နံၣ်
တၫ်ဒုးယံာ်(၂)နံၣ်အတီၫ်ပူၤ ရၢၡၢၣ်သုးမုၫ်ဒိၣ်တပၤ အပှၤသုးဖိအဂံၫ်အဘါ (၄)ကလီၫ်ဘျဲၣ်ဆံးလီၤစှၤလီၤ၀ဲအဂ့ၫ် ယူၣ်ကရ့သုးမုၫ်ဒိၣ် တဲလီၤ၀ဲဖဲမဟါအနံၤန့ၣ်လီၤ. အပူၤကွံာ် (၂၄)နၣ်ရံၣ်အတီၫ်ပူၤဒၣ်လဲၣ်န့ၣ် ရၢၡၢၣ်သုးဖိ (၈၁၉)ဂၤ ဆံးလီၤစှၤလီၤ၀ဲအဂ့ၫ် Facebook ပှၤတ၀ၢပှာ်ဘျးစဲ တၫ်ကစီၣ်တၫ်ပာ်ဖျါအပူၤ ပာ်ဖျါဃာ်၀ဲန့ၣ်လီၤ.
ဘၣ်ထွဲဒီး ယူၣ်ကရ့သုးမုၫ်ဒိၣ် အတၫ်ထုးထီၣ်ပာ်ဖျါအဖီခိၣ် ရၢၡၢၣ်တပၤ တဲဖျါဃာ်၀ဲတအိၣ်နီတမံၤဒံးဘၣ်န့ၣ်လီၤ. ဖဲမဟါအနံၤ, ရၢၡၢၣ်သုးမုၫ်ဒိၣ် ဒရိလၢအခး၀ဲယူၣ်ကရ့ၣ်ထံကီၫ်တၫ်လီၫ်တဖၣ် ဒရိ(၁၈)ခိၣ်အကျါ (၁၆)ခိၣ်အံၤ တၫ်ခးလီၤတဲာ်ကွံာ်၀ဲန့ၫ်အဂ့ၫ် ယူၣ်ကရ့ၣ်ကလံၤသုးတပၤ တဲ၀ဲန့ၣ်လီၤ.
ရၢၡၢၣ်အတၫ်ဂုၤန့ၫ်ဆူၣ်တၫ်ဒုး ပှဲၤထီၣ်(၂)နံၣ်အနံၤန့ၣ် ယူၣ်ကရ့ကီၫ်ခိၣ်(ယူကရိန်းသမ္မတ) (Volodymyr Zelenskyy) အတၫ်တဲလီၤအပူၤ တဲစံးဘျုး၀ဲ ပှၤလၢအဆီၣ်ထွဲယူၣ်ကရ့တဖၣ်န့ၣ်လီၤ. တၫ်ဆီၣ်ထွဲတဖၣ်အဃိ ယူၣ်ကရ့ကမျၢၫ်လၢအကလီၫ်တဖၣ်, ထံကီၫ်လၢအိၣ်ဘူးတဖၣ် တကဲထီၣ်ဘၣ်၀ဲ ရၢၡၢၣ်အစုတီၤဖီလာ်ဘၣ်အဂ့ၫ် ကီၫ်ခိၣ် Zelenskyy တဲ၀ဲန့ၣ်လီၤ.
ဖဲအပူၤကွံာ် (၂၀၂၂)နံၣ်, လါဖ့ၤဘြူၤအါရံၤ (၂၄)သီအနံၤ ရၢၡၢၣ်စးထီၣ်ဂုၤန့ၫ်ဆူၣ်တၫ်ဒုးလၢ ယူၣ်ကရ့ၣ်ထံကီၫ် Hostomel ကဘီသန့တၫ်လီၫ် တၫ်တဲလီၤအပူၤ တၫ်ဒုးလၢအိၣ်ထီၣ်(၇၃၀)သီအပူၤ ယူၣ်ကရ့တၫ်သဘျ့အဂီၫ် တၫ်ကဒုး၀ဲအဂ့ၫ်စ့ၫ်ကီး တဲလီၤ၀ဲန့ၣ်လီၤ.
ref:voa
photo:atlanticcouncil
