လါဖ့ၤဘြူၤအါရံၤ ၂၆သီႇ ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်သူလ့ၤတၫ်ပၢဟီၣ်က၀ီၤ, ချၢၣ်လွံၫ်ထူၣ်ကီၫ်ရ့ၣ်အပူၤ သုးကီၣ်ကးအသုးတဖၣ် ပညိၣ်ခးလီၤထံဖိကီၫ်ဖိကမျၢၫ်တဖၣ်၀ံၤ လၢကမျၢၫ်တၫ်အိၣ်ဆိးလီၫ်ကျဲတဖၣ်အပူၤ ဖဲ၂၀၂၄နံၣ် လါဖ့ၤဘြူၤအါရံၤ(၂၁)သီအနံၤတုၤ (၂၄)သီအနံၤ ခးလီၤကျိဖးဒိၣ်တစှၤန့ၫ်(၁၀၁)ဖျၢၣ် အမဲာ်ညါ ခးလီၤစ့ၫ်ကီးကျိဖးဒိၣ်လၢဒရိ(ဒရုန်း) တစှၤန့ၫ်(၅)ဖျၢၣ်အဃိ ကမျၢၫ်ဟံၣ်(၃၄)ဖျၢၣ် မ့ၣ်အူအီၣ်လီၤကလဲကွံာ်၀ံၤ ဟံၣ်(၅)ဖျၢၣ်, ကျီၫ်အဒဲ(၁)ဖျၢၣ်ဒီး သီခါဖၠၣ် (၁)ဖျၢၣ် ဘၣ်ဟးဂီၤ၀ဲအဂ့ၫ် ခ့ၣ်အဲၣ်ယူၣ် ပာ်ဖျါ၀ဲလီၤ.
ခ့ၣ်အဲၣ်ယူၣ်-ဆီထံးကီၫ်ဆၣ် တၫ်ပၢဟီၣ်က၀ီၤအပူၤ ဖဲလါဖ့ၤဘြူၤအါရံၤ(၂၁)သီအနံၤန့ၣ် သုးကီၣ်ကး အသုး ခလရ-၂၆၄ လၢအိၣ်ဆီလီၤအသးဖဲ ပ့စလိး(ပိန်းဇလုပ်)သုးကလၢၤတဖၣ် ခးလီၤကျိဖးဒိၣ်ဆူ ခၠိၣ်အ့သ၀ီ(ချုံအင်းကျေးရွာ) (၃)ဖျၢၣ်, တီၣ်ခ့ၣ်သ၀ီ(တောင်ခင်ကျေးရွာ) (၂)ဖျၢၣ်, သုးကီၣ်ကးအသုး ခမရ(၂၀) ခးလီၤကျိဖးဒိၣ်(၄)ဖျၢၣ်ဆူ ခၠိၣ်အ့သ၀ီဒီး လီၤတဲာ်ဘၣ်၀ဲလၢ တီၣ်ခ့ၣ်သ၀ီပူၤ သီခါဖၠၣ်ဒီး ဘၣ်ဟးဂီၤ၀ဲန့ၣ်လီၤ.
ဖဲ၂၀၂၄နံၣ်, လါဖ့ၤဘြူၤအါရံၤ(၂၂)သီအနံၤ လၢခ့ၣ်အဲၣ်ယူၣ်-လၢၫ်ဒိၣ်ကီၫ်ဆၣ်တၫ်ပၢဟီၣ်က၀ီၤအပူၤ သုးကီၫ်ကးအသုး ခမရ-၃၀၇ ရွ့ၣ်၀ၣ်သုးရ့ၣ်(ရွှေဝါတပ်ရင်း) ခးလီၤကျိဖးဒိၣ်ဟီၣ်၀ံၣ်စၣ်(ဟောင်ဝစ်ဇာ) (၂)ဖျၢၣ်န့ၣ် လီၤတဲာ်ပိၫ်ဖး၀ဲဖဲ နးသၣ်ကွ့၀့ၫ်(နတ်သံကွင်းမြို့)၀ံၤ သုးကီၣ်ကးအသုး ခလရ-၂၆၄ သုးရ့ၣ် လၢအိၣ်ဖဲ ပ့စလိး(ပိန်းဇလုပ်)တဖၣ် ခးလီၤကျိဖးဒိၣ်(၉)ဖျၢၣ်ဆူ နးသၣ်ကွ့၀့ၫ်, လၢတီၣ်ခ့ၣ်သ၀ီ (၄)ဖျၢၣ်, အလဲၣ်သ၀ီ(အလှိုင်ကျေးရွာ) (၂)ဖျၢၣ်, ကၠဲးကွ့သ၀ီ(ကြိတ်ကွင်းကျေးရွာ) (၃)ဖျၢၣ်, ဖယါငိးတိၣ်သ၀ီ(ဘုရားငုတ်တိုကျေးရွာ) (၂)ဖျၢၣ်, ခဲလၢာ်ပာ်ဖှိၣ်(၁၉)ဖျၢၣ် အဃိ နးသၣ်ကွ့၀့ၫ်အပူၤ ဟံၣ်(၃)ဖျၢၣ်ဘၣ်ဟးဂုၤဟးဂီၤ, သုးကီၣ်ကးအသုးခးလီၤကျိဖးဒိၣ်လၢ ဒရိ(ဒရုန်း)လၢ ဖယါငိးတိၣ်သ၀ီ (၂)ဖျၢၣ်, တီၣ်ခ့ၣ်သ၀ီ (၁)ဖျၢၣ်, အလဲၣ်သ၀ီ (၂)ဖျၢၣ် ခဲလၢာ်ပာ်ဖှိၣ်(၅)ဖျၢၣ် အတၫ်ခးလီၤတၫ်တဖၣ်အဃိ တီၣ်ခ့ၣ်သ၀ီ ကမျၢၫ်ကျီၫ်အဒဲ(၁)ဖျၢၣ် ဘၣ်ဟးဂီၤဒီး ဟံၣ်(၂)ဖျၢၣ်မ့ၣ်အူအီၣ်လီၤကလဲကွံာ်တကးဘၣ် သုးကီၣ်ကး အသုးလၢအိၣ်ဆီလီၤအသးဖဲ ကိခၠီ၀းသ၀ီ(ကုန်းချောင်းဝကျေးရွာ) ခးလီၤစ့ၫ်ကီး ၆၀-မမ(၄)ဖျၢၣ်ဆူ ခ့ၣ်အဲၣ်ယူၣ်-မူကီၫ်ဆၣ်(မူးမြို့နယ်) ယ့ၣ်တွ့ကိကၠံသ၀ီ(ရေတွင်းကုန်းကြီးကျေးရွာ)အပူၤဒံးန့ၣ်လီၤ.
အလီၫ်ခံ ဖဲလါဖ့ၤဘြူၤအါရံၤ(၂၃)သီအနံၤ မုၫ်ဃ့ၫ်လီၤ(၁)နၣ်ရံၣ် တုၤ(၆)နၣ်ရံၣ်တခီန့ၣ် သုးကီၣ်ကးအသုး ခးလီၤကျိဖးဒိၣ်ဆူ နးသၣ်ကွ့၀့ၫ် ခဲလၢာ်ပာ်ဖှိၣ် (၃၂)ဖျၢၣ်အဃိ နးသၣ်ကွ့၀့ၫ်ပူၤ ကမျၢၫ်အဟံၣ်(၂၈)ဖျၢၣ်မ့ၣ်အူအီၣ်လီၤကလဲကွံာ်၀ဲန့ၣ်လီၤ.
ဒ်န့ၣ်အသိးဖဲလါဖ့ၤဘြူၤအါရံၤ (၂၄)သီအနံၤ ဂီၤ(၈)နၣ်ရံၣ်တုၤ (၉း၁၀)နၣ်ရံၣ်အကတီၫ် သုးကီၣ်ကးအသုး လၢအိၣ်ဆီလီၤအသး ဖဲကိခၠီ၀းသ၀ီ(ကုန်းချောင်းဝကျေးရွာ)တဖၣ် ခးလီၤကျိဖးဒိၣ် ခဲလၢာ်ပာ်ဖှိၣ်(၃၅)ဖျၢၣ် ဆူနးသၣ်ကွ့၀့ၫ်ပူၤအဃိ ကမျၢၣ်အဟံၣ်ဘၣ်ဟးဂီၤကဒီး(၆)ဖျၢၣ်န့ၣ်လီၤ.
