လါဖ့ၤဘြူၤအါရံၤ ၂၅သီႇ ၂၀၂၄နံၣ်
စးထီၣ်လၢ သုးကီၣ်ကးအသုးက့ၤပၢ၀ဲ ကီလ့၀့ၫ်၀ံၤအလီၫ်ခံ သုးကီၣ်ကးအသုးတဖၣ် ဒွဲၣ်အူမၤဟးဂီၤကွံာ်ကီလ့၀့ၫ်, က၀ီၤဒ့ခဲလၢာ်ဃၣ်ဃၣ်အဂ့ၫ် Kawlin Revolution-KR ပာ်ဖျါဃာ်၀ဲ ဖဲလါဖ့ၤဘြူၤအါရံၤ (၂၃)သီအနံၤန့ၣ်လီၤ.
တၫ်ထီၣ်ဒုးဟံးက့ၤ ၀့ၫ်လၢ အ၀ဲသ့ၣ်သုးသ့ၣ်လၤကပီၤအဂီၫ်လီၤ. ဟံးပာ်ဟံၣ်အဂ့ၤအထီတဖၣ်၀ံၤ ကတဲာ်ကတီၤပာ်ဒ်သိး တၫ်ကခီၣ်ဆၢဒုးက့ၤအဂီၫ်လီၤ. တၫ်လီၫ်လၢအဖျါတၡဲတဖၣ် ဒွဲၣ်အူမၤဟးဂီၤကွံာ်အီၤခဲလၢာ်လီၤ. တၫ်အိၣ်သဒၢလၢ အိၣ်ဖဲကီလ့၀့ၫ်အဃၢၤတဖၣ် တၫ်ဒွဲၣ်အူကွံာ်အီၤခဲလၢာ်ဒီး တၫ်မ့ၫ်ဟဲထီၣ်န့ၣ် ဒ်သိးတၫ်ကွၫ်ကဖျါၡဲအဂီၫ် ပညိၣ်ဒွဲၣ်အူကွံာ်၀ဲအဂ့ၫ် ကွဲးဖျါဃာ်၀ဲန့ၣ်လီၤ.
ကီလ့၀့ၫ်, က၀ီၤဒ့(၈)ဘ့ၣ်လၢၣ် မ့ၣ်အူအီၣ်ကွံာ်၀ဲဒီး သ၀ီလၢအဘူးဒီး ကၠိလးခိၣ်(ကျွန်းလှခုံ), ခွ့ၣ်တီ(ခွင့်တောင်း), လဲးပၣ်ကွ့း(လက္ပံကွေ့), ကၠူၣ်တီ(ကျူတော), ယွၣ်မး(ရွာမ), စၣ်တီၣ်ယၣ်ကိ(စံတော်ရာကုန်း), စ့မ့ခိၣ်(ဆေးမင်းခုံ), စဲၣ်ဒူ(ဆိုင်ဒူး), ၀ါယိၣ်ခိၣ်(ဝါးရုံခုံ) ဒီး စံခိၣ်(ဇီးခုံ)သ၀ီတဖၣ်စ့ၫ်ကီး မ့ၣ်အူအီၣ်ဟးဂီၤဃာ်လံအဂ့ၫ် ကွဲးဖျါဃာ်၀ဲန့ၣ်လီၤ.
တၫ်တယာ်အီၤအဖီခိၣ် သ၀ီလၢမ့ၣ်အူအီၣ်ကွံာ်တဖၣ် ပာ်ဃုာ်သ၀ီခဲလၢာ်ပာ်ဖှိၣ်(၂၅)ဘ့ၣ်အပူၤ ပှၤဃ့ၫ်သုးပှၤလီၫ်အိၣ်ကမှံဖိ အိၣ်၀ဲ(၂)ကလး(၅)ကထိဃၣ်ဃၣ်အဂ့ၫ်စ့ၫ်ကီး ပာ်ဖျါဃာ်၀ဲန့ၣ်လီၤ.
ပှၤဃ့ၫ်သုးပှၤလီၫ်အိၣ်ကမှံဖိတဖၣ်အံၤ ဘၣ်ဃ့ၫ်ပူၤဖျဲးအသး စးထီၣ်လၢလါဖ့ၤဘြူၤအါရံၤ(၁)သီအနံၤအဃိ ဘၣ်ဃ့ၫ်ပူၤဖျဲးအသးအိၣ်(၂၃)သီလံန့ၣ်လီၤ. ခီဖျိလၢ တၫ်ကးတံာ်ကျဲတဖၣ်အဃိ ဘၣ်ကွၫ်ဆၢၣ်မဲာ်ဒီး တၫ်အီၣ်တၫ်အီတၫ်ဂ့ၫ်ကီတဖၣ်န့ၣ်လီၤ.
မ့မ့ၫ် ကီလ့၀့ၫ်(၈၀)မျးကယၤ မ့ၣ်အူအီၣ်ဟးဂီၤကွံာ်လံ ဒီး ခဲလၢာ်ဃၣ်ဃၣ်န့ၣ်ကဲထီၣ်ဖၣ်ဆါလံအဂ့ၫ် ပာ်ဖျါဃာ်၀ဲန့ၣ်လီၤ. စကဲကီၫ်ခီ, ကီလ့၀့ၫ်အံၤ သုးကီၣ်ကးအသုးတဖၣ် က့ၤပၢက့ၤ စးထီၣ်ဖဲ ၂၀၂၄နံၣ်, လါဖ့ၤဘြူၤအါရံၤ(၁၂)သီအနံၤန့ၣ်လီၤ.
