ဖဲ ၂၀၂၄နံၣ်, လါဖ့ၤဘြူၤအါရံၤ(၂၃)သီအနံၤ, မုၫ်ဃ့ၫ်လီၤ(၂)နၣ်ရံၣ်ဘျဲၣ်အဆၢကတီၫ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၂), တီအူကီၫ်ရ့ၣ်, ထီတထူၣ်ကီၫ်ဆၣ်, စယးကၠံး၀့ၫ် တၫ်ဆါတၫ်ပှ့ၤတၫ်လီၫ် မ့ၣ်အူအီၣ်ကွံာ်အီၤအဃိ တၫ်ဆါတၫ်ပှ့ၤဒၢး(၉၀)ဘျဲၣ်ဒီး ကမျၢၫ်အိၣ်ဟံၣ်(၂)ဖျၢၣ် မ့ၣ်အူအီၣ်ကွံာ်အီၤအဂ့ၫ် စယးကၠံး၀့ၫ်ကမျၢၫ်ဖိတဂၤ စံးဘၣ်အၣ်ထူခ့ၣ်န့ၣ်လီၤ.
“စယးကၠံး၀့ၫ် တၫ်ဆါတၫ်ပှ့ၤတၫ်လီၫ်န့ၣ် မ့ၣ်အူစးထီၣ်အီၣ်အီၤလၢ မုၫ်ဃ့ၫ်လီၤ(၂)နၣ်ရံၣ်ဘျဲၣ်လီၤ. ဟါ(၄)ဘျဲၣ်အဆၢကတီၫ်မး တၫ်မၤပံာ်အီၤန့ၫ်၀ဲလီၤ. တၫ်ဆါတၫ်ပှ့ၤဒၢး(၉၀)ဖျၢၣ် ဒီး ဟံၣ်(၂)ဖျၢၣ်မ့ၣ်အူအီၣ်ကွံာ်၀ဲလီၤ“အဂ့ၫ် စံး၀ဲန့ၣ်လီၤ.
ကတီၫ်ခဲအံၤ စယးကၠံ၀့ၫ်ပူၤ ကမျၢၫ်တနီၤအိၣ်၀ဲန့ၣ်လီၤ. မ့မ့ၫ်လၢ ခံခီခံကပၤသုးတခီ တအိၣ်လၢၤဘၣ်ဒီး မ့မ့ၫ်သုးကီၣ်ကးအသုးတခီ တၫ်ထံၣ်ဘၣ်အီၤ တဘျီတဘျီအဂ့ၫ်အ၀ဲတဲ၀ဲန့ၣ်လီၤ. ဘၣ်ဆၣ်တၫ်ဒုးတကဲထီၣ်လၢၤလၢ ၀့ၫ်ပူၤလၢၤဘၣ်န့ၣ်လီၤ.
“ယဆိမိၣ်လၢ တၫ်ဒွဲၣ်အူကွံာ်အီၤလီၤ. စယးကၠံး၀့ၫ်တၫ်ဆါတၫ်ပှ့ၤတၫ်လီၫ်အပူၤ ပှၤ(၂)ဂၤလဲၤနုာ်၀ဲလီၤ. အမၤသးဒ် တၫ်လဲၤဟံးထီၣ်တၫ်ဖိတၫ်လံၤ၀ံၤ တယံာ်တမီၣ်ဘၣ်ဒီး မ့ၣ်အူအီၣ်၀ဲလီၤ. ဖဲမဟါ မုၫ်ဃ့ၫ်လီၤ(၂)နၣ်ရံၣ်ဘျဲၣ်ကတီၫ် မ့ၣ်အူစးထီၣ်အီၣ်၀ဲလီၤ“အဂ့ၫ် တီအူကီၫ်ရ့ၣ် ပှၤဘၣ်မူဘၣ်ဒါတဂၤ စ့ၫ်ကီးတဲ၀ဲန့ၣ်လီၤ.
စယးကၠံး၀့ၫ် တၫ်ဆါတၫ်ပှ့ၤတၫ်လီၫ် မ့ၣ်အူအီၣ်ကတီၫ် စယးကၠံး၀့ၫ် ပှၤမၤပံာ်မ့ၣ်အူကရၢ, ထီတထူၣ် ပှၤမၤပံာ်မ့ၣ်အူကရၢ, တီအူ ပှၤမၤပံာ်မ့ၣ်အူကရၢတဖၣ်ဒီး ကမျၢၫ်လၢအိၣ်တ့ၫ်တဖၣ် မၤပံာ်ကွံာ်၀ဲမ့ၣ်အူအဂ့ၫ် ၀့ၫ်စယးကၠံးကမျၢၫ်ဖိတဂၤတဲ၀ဲန့ၣ်လီၤ.
ဖဲအပူၤကွံာ် ၂၀၂၄နံၣ်, လါဖ့ၤဘြူၤအါရံၤ(၇)သီအနံၤ, ဂီၤအဆၢကတီၫ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ် (KNLA) အတၫ်တီခိၣ်ရိၣ်မဲဃုာ်ဒီး ကမျၢၫ်တၫ်ဒီသဒၢသုးမုၫ်ဒိၣ်(PDF)တဖၣ် လဲၤနုာ်လီၤဒုး၀ဲစယဲကၠံး၀့ၫ် နီၫ်ဂံၫ်(၇၃)ခီၣ်ချ့သုးရ့ၣ်သုးကလၢၤ ဒီး သုးကီၣ်ကး တၫ်သမံသမိးတြဲၤတဖၣ်န့ၣ်လီၤ.
photo:CJ
