ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ဘျံး-ဒ၀ဲၫ်ကီၫ်ရ့ၣ်အပူၤ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်တီခိၣ်ရိၣ်မဲ သုးပာ်ဖှိၣ်တဖၣ်ဒီး သုးကီၣ်ကးအဘၢၣ်စၢၤ တၫ်ဒုးတဖၣ်လၢ(၃)သီအတီၫ်ပူၤ သုးကီၣ်ကးတပၤ သံဒီးဘၣ်ဒိအိၣ်၀ဲအါအါဂီၫ်ဂီၫ်အသိး တၫ်မၤဟးဂီၤကွံာ် သိၣ်လ့ၣ်(၁၅)ခိၣ်အဂ့ၫ် ဘျံးဒ၀ဲၫ်ကီၫ်ရ့ၣ်, သုးရ့ၣ်(၁၂)-သုးရ့ၣ်ခိၣ် စီၤမူဂ့ၤတဲဘၣ် အၣ်ထူခ့ၣ်အအိၣ်န့ၣ်လီၤ.
ဖဲလါဖ့ၤဘြူၤအါရံၤ(၁၇)သီအနံၤ တၫ်ဒုးကဲထီၣ်သးတတီၤ၀ံၤ သုးကီၣ်ကးတပၤသံ၀ဲ(၃)ဂၤ ဒီး မ့မ့ၫ်တၫ်ပၢၫ်ဆၢသုးပာ်ဖှိၣ်တပၤ တၫ်သံတၫ်ပှၫ်တအိၣ်၀ဲဘၣ်အဂ့ၫ် တဲ၀ဲန့ၣ်လီၤ. ဖဲလါဖ့ၤဘြူၤအါရံၤ(၁၉)သီအနံၤစ့ၫ်ကီး ဘၣ်တၫ်သဂၢၤခးလိာ်သးဒီး သုးကီၣ်ကးအသိၣ်လ့ၣ်ကျိၤလၢ ဟဲထီၣ်တဖၣ်၀ံၤသုးကီၣ်ကးတပၤအသံဒီးဘၣ်ဒိအိၣ်၀ဲ(၁၃)ဂၤန့ၣ်လီၤ. တကးဘၣ်သုးကီၣ်ကး သိၣ်လ့ၣ်(၅)ခိၣ်ဘၣ်ဒိ၀ဲဒီး မ့မ့ၫ်(၃)ခိၣ်တခီဘၣ်ဒိဒီးတၫ်သူအီၤတန့ၫ်လၢၤဘၣ်န့ၣ်လီၤ.
တကးဘၣ် ဖဲလါဖ့ၤဘြူၤအါရံၤ(၂၁)သီအနံၤ, ဂီၤ(၈)နၣ်ရံၣ်ဒီး (၉)နၣ်ရံၣ်အဘၢၣ်စၢၤ ကညီဒီကလုာ်တၫ်ထူၣ်ဖျဲးသုးမုၫ်ဒိၣ် လဲၤနုာ်လီၤဒုး၀ဲဖဲ ၀ၣ်ကူးကတီၫ် သုးကီၣ်ကးတပၤ သံ၀ဲ(၂)ဂၤဒီးဘၣ်ဒိ(၅)ဂၤန့ၣ်လီၤ. မ့မ့ၫ် KNLAတပၤ သံ၀ဲ(၆)ဂၤ ဒီး စုက၀ဲၤ(၆)ခိၣ်စ့ၫ်ကီး ဒုၣ်ဒါတပၤမၤန့ၫ်၀ဲ အဂ့ၫ်တဲ၀ဲန့ၣ်လီၤ. တနံၤဃီဖဲ ဟါ(၄)နၣ်ရံၣ်ဒီး (၅)နၣ်ရံၣ်အဘၢၣ်စၢၤကတီၫ် ဘၣ်တၫ်သဂၢၤခးလိာ်သးဆူၣ်ဆူၣ်ကလၢၣ်ဒီး သုးကီၣ်ကးအပှၤသုးဖိတဖၣ်၀ံၤ သုးကီၣ်ကးတပၤသံ၀ဲဖဲကျဲမုၫ်ဖးဒိၣ် (၁၉)ဂၤ, တၫ်မၤန့ၫ်စ့ၫ်ကီး ကျိအဒိၣ်အဆံး(၃၄)ခိၣ် ဒီး တၫ်ဒွဲၣ်အူမၤဟးဂီၤကွံာ် သုးကီၣ်ကး သိလ့ၣ်(၇)ခိၣ် အဂ့ၫ်တဲ၀ဲန့ၣ်လီၤ.
ဖဲ လါဖ့ၤဘြူၤအါရံၣ် (၂၁)သီအနံၤ, ဘၣ်ထွဲဒီးတၫ်လဲၤခိးခး သုးကီၣ်ကးသိလ့ၣ်ကျိၤဖဲ ၀့ၫ်မတါအပူၤ သုးကီၣ်ကးတပၤ သံဒီးဘၣ်ဒိကအိၣ်၀ဲအဂၤ(၃၀)ဘျဲၣ်, တၫ်မၤန့ၫ်စုက၀ဲၤ(၃၀)ဘျဲၣ်, တၫ်မၤဟးဂီၤကွံာ် သိၣ်လ့ၣ်(၇)ခိၣ်ဒီး တၫ်ပၢၫ်ဆၢသုးပာ်ဖှိၣ်တပၤ စ့ၫ်ကီးတၫ်ဘၣ်ဒိဘၣ်ထံးအိၣ်၀ဲအဂ့ၫ် ဘျံး-ဒ၀ဲၫ်ကီၫ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤစ့ၫ်ကီးတဲ၀ဲန့ၣ်လီၤ.
တၫ်လဲၤမၤဟးဂီၤ သုးကီၣ်ကးသိလ့ၣ်(၇)ခိၣ်၀ံၤအလီၫ်ခံ သုးကီၣ်ကးအကဘီယူၤ(၂)ခိၣ် ဟဲခးလီၤတၫ်(၂)ဘျီဘၣ်ဆၣ် တၫ်ပၢၫ်ဆၢသုးပာ်ဖှိၣ်တပၤ တၫ်ဘၣ်ဒိဘၣ်ထံးတအိၣ်၀ဲအဘၣ်အဂ့ၫ် အ၀ဲတဲ၀ဲန့ၣ်လီၤ. ဒီးလါဖ့ၤဘြူၤအါရံၤ(၂၂)သီအနံၤစ့ၫ်ကီး ဟဲတ့ၫ်လီၤကဒီး မ့ၣ်ပိၫ်(၁)ဘျီအဂ့ၫ် တၫ်သ့ၣ်ညါဘၣ်န့ၣ်လီၤ.
သုးကီၣ်ကးအသုး ၁၀၄-သုးရ့ၣ်ခိၣ်တီခိၣ်ရိၣ်မဲသိၣ်လ့ၣ်ကျိၤအံၤ အိၣ်ဟဲဟးထီၣ်၀ဲဒၣ်ဖဲ ၀့ၫ်ဒ၀ဲၫ်ဒီး ဒ်သိးကဟဲထီၣ်ဒီသဒၢန့ၫ်၀ဲ အသုးကလၢၤ(၃)ဖျၢၣ်လၢအမ့ၫ် ၀့ၫ်မတါသုးကလၢၤ, ကၠီးမဲတီၣ်သုးကလၢၤ(ကျောက်မဲတောင်တပ်စခန်း)ဒီး မဲၫ်ခ့းတၫ်သုးကလၢၤတဖၣ်န့ၣ်လီၤ. သုးကီၣ်ကးတပၤ ခးလီၤကျိဖးဒိၣ်ဆူ ၀့ၫ်မတါပူၤဘၣ်ဆၣ် လီၫ်က၀ီၤကမျၢၫ်တဖၣ် ဃ့ၫ်ပူၤဖျဲးသးတဘျုးသီလံအဂ့ၫ်, ဘၣ်ယိၣ်၀ဲလၢ တၫ်ကလဲၤထီၣ်ဒုး ၀့ၫ်မတါသုးကလၢၤအဂ့ၫ်တဲ၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ဘျံး-ဒ၀ဲၫ်ကီၫ်ရ့ၣ်ပူၤ ကမျၢၫ်တၫ်ဒီသဒၢသုး(PDF) သုးကရၢတဖၣ်အိၣ်၀ဲ အဖု(၈၀)ဘျဲၣ်ဒီး သုးဂ့ၫ်၀ီတပၤတၫ်ပာ်ဖှိၣ်မၤသကိးအိၣ်၀ဲအဂ့ၫ် စံး၀ဲန့ၣ်လီၤ.
ဖဲလါဖ့ၤဘြူၤအါရံၤ(၁၀)အသီနံၤ, သုးကီၣ်ကးပာ်လီၤ တၫ်ဘၣ်ကဲးသုးတၫ်ဘျၢအဖီခိၣ် ပှၤသးစၫ်လၢမ့ၫ်အဲၣ်ဒိးဟဲမၤသကိးတၫ်တဖၣ်ဒီး ကမျၢၫ်လၢဟဲအိၣ်ကဒုတဖၣ်မ့ၫ်အိၣ်ထီၣ်န့ၣ် တၫ်ကမၤစၢၤအီၤအဂ့ၤကတၢၫ်လီၤအဂ့ၫ် စ့ၫ်ကီး (သုးရ့ၣ်-၁၂)သုးရ့ၣ်ခိၣ် စီၤမူဂ့ၤတဲ၀ဲန့ၣ်လီၤ.
