ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ဒူပျာ်ယာ်ကီၫ်ရ့ၣ်, ကီးတရံးကီၫ်ဆၣ်, ကီးတရံး၀့ၫ်ပူၤ သုးကီၣ်ကးဒီး တၫ်ပၢၫ်ဆၢသုးပာ်ဖှိၣ်တဖၣ်အဘၢၣ်စၢၤ တၫ်ဘၣ်သဂၢၫ်ခးလိာ်သးတဖၣ် ကဲထီၣ်ဒံး၀ဲအဖၢမုၫ်ဒီး ကမျၢၫ်အိၣ်ဟံၣ်ဃီတနီၤ မ့ၣ်အူအီၣ်ဟးဂီၤကွံာ်ကဒီး၀ဲအဂ့ၫ် တၫ်သ့ၣ်ညါဘၣ်လၢ လီၫ်က၀ီၤဂံၫ်ခီၣ်ထံးတၫ်ကစီၣ်အအိၣ်လီၤ.
စးထီၣ်ဖဲလၢလါဖ့ၤဘြူၤအါရံၤ (၁၃)သီအနံၤ, ဂီၤအဆၢကတီၫ် ကီးတရံး၀့ၫ်, နီၫ်ဂံၫ်(၇)က၀ီၤဒ့, ကီၫ်ရ့ၣ်၀ဲၤဒၢးအကပၤ သုးကီၣ်ကးဒီး တၫ်ပၢၫ်ဆၢသုးပာ်ဖှိၣ်တဖၣ်အဘၢၣ်စၢၤ ခံခီခံကပၤတၫ်ဘၣ်သဂၢၫ်ခးလိာ်သးတဖၣ် ကဲထီၣ်၀ဲဘၣ်ဆၣ် မ့မ့ၫ်ခံခီခံကပၤ တၫ်ဘၣ်ဒိဘၣ်ထံးတခီ တၫ်တသ့ၣ်ညါလီၤတံၫ်ဒံးဘၣ်.
တၫ်ဒုးအပူၤ ဖဲ ဂီၤ(၁၁)နၣ်ရံၣ်ဃၣ်ဃၣ်အဆၢကတီၫ် နီၫ်ဂံၫ်(၂)က၀ီၤဒ့, ၀့ကၠံ တမးရၣ်မးကိ မုၫ်ထီၣ်တပၤ(ဝင်းကြီး ဓမ္မရာမကုန်းအၡေ့ဘက်)ဒီး တီၣ်စိတိၤအကပၤ(တောင်စွန်းတံတားအနီး) ဘယ့းနီၣ်ကျဲမုၫ်(ဘုရင့်နောင်လမ်း)အဖီခိၣ် ကမျၢၫ်အိၣ်ဟံၣ် တစှၤန့ၣ်(၆)ဖျၢၣ် မ့ၣ်အူအီၣ်ဟးဂီၤကွံာ်၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
တၫ်ပၢၫ်ဆၢသုးပာ်ဖှိၣ်တဖၣ် လဲၤက၀ီၤကးတံာ်ဒုး၀ဲ ကီးတရံး၀့ၫ်၀ံၤ သုကီၣ်ကးတပၤစ့ၫ်ကီး ၀့ၫ်သုတလီၤအဂီၫ် ဖဲလါဖ့ၤဘြူၤအါရံၤ (၇)သီအနံၤန့ၣ် မၤၦဲၤအါထီၣ်၀ဲ သုးအဂံၫ်အဘါ (၂၀၀)ဃၣ်ဃၣ်လၢ တလၢၤကီၫ်စဲၣ်တဆီ၀ံၤအလီၫ်ခံ ခံခီခံကပၤတၫ်ဒုးတဖၣ်ကဲထီၣ်၀ဲန့ၣ်လီၤ.
တၫ်ဒုးတဖၣ်အဃိ လီၫ်က၀ီၤကမျၢၫ်တဖၣ် ဃ့ၫ်ပူၤဖျဲးသးကတီၫ် ကီးတရံး၀့ၫ်ပူၤ ကမျၢၫ်အိၣ်ဟံၣ်ဃီတဖၣ်အံၤ မ့ၣ်အူအီၣ်ဟးဂီၤကွံာ်၀ဲ ကိးမုၫ်နံၤဒဲး၀ံၤ တကးဘၣ် သုးကီၣ်ကးအသုးစ့ၫ်ကီး ခးလီၤကျိဖးဒိၣ်တဖၣ် လၢ၀့ၫ်ပူၤတဖၣ်အဂ့ၫ် တၫ်သ့ၣ်ညါဘၣ်လၢ လီၫ်က၀ီၤကမျၢၫ်တဖၣ်အအိၣ်န့ၣ်လီၤ.
တၫ်ဒုးတဖၣ်လၢ အယံာ်(၂)လါဘျဲၣ်အပူၤ ကီးတရံးလီၫ်က၀ီၤကမျၢၫ်(၃)ကလးဘျဲၣ် ဘၣ်ပာ်တ့ၫ်ဟံၣ်ဃီ ဘၣ်ဃ့ၫ်ပူၤဖျဲးသး၀ံၤ ၦၤဃ့ၫ်သုးၦၤလီၫ်အိၣ်ကမှံတဖၣ်အဂီၫ် လိၣ်ဘၣ် ၦၤဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤတဖၣ်(လူသားချင်းစာနာမှုအကူအညီ)အဂ့ၫ် ခ့ၣ်အဲၣ်ယူၣ်-ဒူပျာ်ယာ်ကီၫ်ရ့ၣ် ဒုးသ့ၣ်ညါဃာ်၀ဲန့ၣ်လီၤ.
ref:thanlwintimes
