ကၣ်စၣ်ဟီၣ်က၀ီၤ(ဂါဇာဒေသ) ကလံၤထံး ရၣ်ဖၣ်၀့ၫ်(Rafah) ဖဲလါဖ့ၤဘြူၤအါရံၤ(၁၂)သီအနံၤန့ၣ် အံၣ်စရ့အကလံၤကျါတၫ်လဲၤခးလီၤတၫ်အဃိ ၦၤတစှၤန့ၣ်(၆၇)ဂၤ ဘၣ်သံ၀ဲန့ၣ် လီၫ်က၀ီၤဆူၣ်ချ့ပှၤဘၣ်မူဘၣ်ဒါ(ဒေသခံကျန်းမာရေး တာဝန်ရှိသူ)တဖၣ် တဲ၀ဲအဂ့ၫ် (VOA )တၫ်ကစီၣ်သန့ပာ်ဖျါ၀ဲလီၤ. တၫ်တူၫ်ဘၣ် တၫ်ပိၫ်ဖး နးနးကျံးကျံး၀ံၤ အံၣ်စရ့ကလံၤကျါတၫ်ခးလီၤတၫ်အပူၤ ဘၣ်၀ဲကမျၢၫ်အိၣ်ဟံၣ်ဒီး ပလံၣ်(ဗလီ)တဖၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.
အံၣ်စရ့သုးတခီ တဲ၀ဲလၢ ခး၀ဲဒၣ် ရၣ်ဖၣ်၀့ၫ်အပူၤ ၦၤမၤအၢမၤသီတၫ်ဖိတဖၣ် အတၫ်ပညိၣ်လီၫ်တဖၣ်အဂ့ၫ်န့ၣ်လီၤ. ခီဖျိလၢဒုးယၤဂ့ၫ်၀ီတဘျီအံၤအဖီခိၣ် ၦၤအံၣ်စရ့ဖိ(၂)ဂၤလၢ ဟါမးစ်(ဟားမတ်စ်)က့ၤဖီၣ်တဖၣ် ဘၣ်တၫ်မၤပူၤဖျဲးအီၤန့ၫ်၀ဲအဂ့ၫ်တဲ၀ဲလီၤ. ၦၤလၢဘၣ်တၫ်က့ၤဖီၣ်အီၤလၢ ကၣ်စၣ်ဟီၣ်က၀ီၤတဖၣ် ကဟဲက့ၤဘၣ်လၢဟံၣ်အဂီၫ် တၫ်ခွဲးတၫ်ယာ်တဖၣ်တပျၫ်ကွံာ်၀ဲဘၣ်အဂ့ၫ်, လၢသုးဂ့ၫ်၀ီတကပၤ တၫ်ဟ့ၣ်တၫ်ဆီၣ်သနံးမ့ၫ်န့ၫ်မးဒီး ၦၤလၢဘၣ်တၫ်က့ၤဖီၣ်ခဲလၢာ် ကပူၤဖျဲးထီၣ်ဘၣ်က့ၤအဂ့ၫ် အံၣ်စရ့ကိတိာ်ခိၣ်ကျၢၫ် Benjamin Netanyahu တဲဃာ်၀ဲဒၣ်လၢ လံာ်ဘိးဘၣ်ရၤလီၤအပူၤန့ၣ်လီၤ.
လၢတၫ်ဒုးယံာ်(၄)လါအတီၫ်ပူၤ ကမျၢၫ်တဖၣ်ကသုးဘၣ်အသးလၢတၫ်ပူၤဖျဲးအလီၫ်အဂီၫ် အံၣ်စရ့ ထုးထီၣ်တၫ်ကလုၫ်( အမိန့်ထုတ်) တဲဟ့ၣ်ပလီၫ်အီၤအဘျီတဖၣ်အဘျီ၀ံၤ တၫ်ဆီၣ်ဖျိးကွံာ်အီၤလၢ ကလံၤထံးဟီၣ်က၀ီၤတကပၤ ကယီကယီဒီး လၢကတီၫ်အံၤ ရၣ်ဖၣ် အကပိာ်ကပၤ လၢဘီမုၫ်စၢဖှိၣ်ကရၢ အိးထီၣ်ဃာ် ဒဲက၀ီၤတဖၣ်အပူၤ ကမျၢၫ်တဖၣ်ၦဲၤလံန့ၣ်လီၤ. ၦၤတဖၣ်အံၤ ကအိၣ်ဘၣ်လၢတၫ်ပူၤဖျဲးအဂီၫ်စ့ၫ်ကီး ထံဂုၤကီၫ်ဂၤတဖၣ် တၫ်ဘၣ်ယိၣ်အိၣ်အါထီၣ်၀ဲန့ၣ်လီၤ.
ကသံၣ်သရၣ်ကရၢအၦၤနဲၣ်တၫ် Meinie Nicolai ဃ့ထီၣ်၀ဲဒ်သိး တၫ်ကပတုာ်ကွံာ် တၫ်ထီၣ်ဒုးလၢ ရၣ်ဖၣ်အသိး တၫ်ပတုာ်တၫ်ခး(အပစ်အခတ် ရပ်စဲရေး) တၫ်ပၢၤဃာ်အီၤကန့ၫ်အဂီၫ် ဃ့ထီၣ်ဃာ်၀ဲထံဂုၤကီၫ်ဂၤတဖၣ်စ့ၫ်ကီးလီၤ. လၢကတီၫ်အံၤ အံၣ်စရ့အတၫ်ဒုးဆၢကဒါက့ၤအဃိ လၢကၣ်စၣ်(ဂါဇာ)အပူၤ ၦၤခဲလၢာ် (၂၈,၃၀၀)ဘျဲၣ် ဘၣ်သံ၀ဲအဂ့ၫ် ဟါမးစ်(ဟားမတ်စ်) ဆူၣ်ချ့(ကျန်းမာရေး)ပှၤဘၣ်မူဘၣ်ဒါတဖၣ်တဲ၀ဲလီၤ.
ref:voa
