ရခၢၣ်သုးမုၫ်ဒိၣ်(AA) အတၫ်ဒုးအီၤအဃိ သုးကီၣ်ကး အကဘီဒုးသုး(၃)ခိၣ်လၢ လီအုးကွံာ်အပူၤ သုးခိၣ်ဒိၣ်ဖိတဖၣ်ပာ်ဃုာ် သုးကီၣ်ကးအၦၤသုးဖိဒီး သုးအဒူၣ်ဖိထၢဖိ (၆၈၀)ဂၤဘျဲၣ် သံ၀ဲအဂ့ၫ် တၫ်သ့ၣ်ညါဘၣ်လၢ ၦၤလၢအသ့ၣ်ညါ ရခၢၣ်သုးဂ့ၫ်၀ီ ဂံၫ်ခီၣ်ထံးတၫ်ကစီၣ်အအိၣ်န့ၣ်လီၤ.
လါဖ့ၤဘြူၤအါရံၤ(၇)သီဒီး (၈)သီအနံၤ, ရခၢၣ်သုးမုၫ်ဒိၣ်(AA) လဲၤခီၣ်ဆၢ ဒုးက့ၤ သုးကီၣ်ကးထံသုး အကတီၫ် ကဘီဒုးသုး(စစ်သင်္ဘော)(၃)ခိၣ် လီၤအုးဟးဂီၤကွံာ်၀ဲန့ၣ်လီၤ.
“ၦၤသံခဲလၢာ် အအါကတၢၫ်န့ၣ် ခိသုး(ကြည်းတပ်)လီၤ. ခိသုးန့ၣ် ၦၤပီၫ်ထံတဘၣ်အါဘၣ်. ထံသုးန့ၣ်စှၤလီၤ. စကခ(၉) က့ၤဂုၤက့ၤအခံကတီၫ် တၫ်လဲၤကိးအီၤ, တုၤလၢ ထံကျိအံၣ်( မြစ်ကြောင်းကျဉ်း)ဒီး ထံဒီၣအလီၫ် (ရေတိမ်တဲ့နေရာ)ဘျီ တၫ်ခးလီၤလၢတၫ်ဖီခိၣ်လီၤ. ကဘီလၢ တၫ်ခးဘၣ်အီၤအဃိ လီၫ်ခံတခိၣ် လဲၤမၤစၢၤ၀ဲကတီၫ် တၫ်တ့ၫ်လီၤမ့ၣ်ပိၫ်လၢ ဒရိ (Drone) လၢတၫ်ဖီခိၣ်အဃိ သံခဲလၢာ်လီၤ. အစိာ်တဖၣ် ဖၢပူၣ်အသးလၢ ထံကျိၤနံၤန့ၣ် မတၤမးလဲၤထၢက့ၤအီၤ တဘူၣ်ဘၣ်အဂ့ၫ်” ၦၤလၢအသ့ၣ်ညါ ရခၢၣ်သုးဂ့ၫ်၀ီ ဂံၫ်ခီၣ်ထံးတၫ်ကစီၣ် တဲ၀ဲန့ၣ်လီၤ.
ၦၤလၢအသံအါတက့ၫ်န့ၣ် ဖဲလါယနူၤအါရံၤ(၃၀)သီအနံၤ ရခၢၣ်သုးမုၫ်ဒိၣ် ထီၣ်ဒုးမၤန့ၫ်တ့ၫ် စကခ(၉)အစုတီဖီလာ် ကၠီးတီၣ်တၫ်လီၫ်ခိၣ်သ့ၣ် ခမရ(၃၇၄), ခမရ(၃၈၀) သုးကီၣ်ကးအၦၤသုးဖိ လၢဂုၤက့ၤအခံတဖၣ်၀ံၤ တၫ်လဲၤဒုးအီၤ ကဘီဒုးသုးအဃိ ၦၤလၢအသံအကျါ ခိသုး( ကြည်းတပ်) သုးခိၣ်ဒိၣ်ဖိအပတီၫ်အိၣ်(၁၂)ဂၤ, ထံသုး(ရေတပ်) သုးခိၣ်ဒိၣ်ဖိအပတီၫ်အိၣ်(၂)ဂၤဒီး သုးခိၣ်စိ(၂)ဂၤပာ်ဃုာ်, ကတီၫ်ခဲအံၤတၫ်ထၢဖှိၣ်မၤနီၣ်ဃၣ်စရီအဖီခိၣ် ၦၤသံခဲလၢာ် အိၣ်ထီၣ်တုၤ(၆၈၇)ဂၤအဂ့ၫ် တၫ်သ့ၣ်ညါဘၣ်န့ၣ်လီၤ.
“ကဘီတၢတခိၣ် လၢတၫ်ခးဘၣ်အီၤဒီး တၫ်လဲၤမၤစၢၤကတီၫ် ကဘီအံၤတၫ်ဖီၣ်အီၤဒီးၦၤ၀ံၤ ကဘီဟးထီၣ်တန့ၫ်လၢာ်ဘၣ်ကတီၫ် တၫ်ခးတံၫ်အီၤလၢတၫ်ဖီခိၣ်, မ့မ့ၫ်ထံသုးတပၤ သံစှၤစံးတၫ်န့ၣ် တၫ်ဟဲကိးက့ၤအၦၤအဃိ ကဘီလီၫ်လၤအိၣ်ခိၣ်နၫ်(အရာရှိ)ဒီး ၦၤကဘီဖိ(သင်္ဘောသား)ပာ်စှၤဂၤအဃိလီၤ. အ၀ဲသ့ၣ်စ့ၫ်ကီး သံ၀ဲလီၤအဂ့ၫ်” ၦၤလၢအသ့ၣ်ညါ ရခၢၣ်သုးဂ့ၫ်၀ီ ဂံၫ်ခီၣ်ထံးတၫ်ကစီၣ် တဲ၀ဲလီၤ.
ၦၤလၢသံတဖၣ်အကျါ သုးကီၣ်ကးအၦၤသုးဖိ အဒူၣ်ဖိထၢဖိလၢ ဟဲပိာ်စကခ(၉)သုးလၢ ဟဲက့ၤဂုၤက့ၤအခံတဖၣ်စ့ၫ်ကီး ပာ်ဃုာ်၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
ရခၢၣ်သုးမုၫ်ဒိၣ်အံၤ ၂၀၂၄နံၣ်အတီၫ်ပူၤ သုးကီၣ်ကးအကဘီဒုးသုး (၇)ခိၣ်ဃၣ်ဃၣ် လၢထံကျိ, ထံကျိၤအပူၤတၫ်သုလဲၤတန့ၫ်အဂီၫ် ဒုးန့ၫ်၀ဲအဂ့ၫ် ရခၢၣ်သုးမုၫ်ဒိၣ် ထုးထီၣ်ပာ်ဖျါဃာ်၀ဲန့ၣ်လီၤ.
ref:CJPlatfrom
photo:burmavj
