သုးကီၣ်ကးပာ်လီၤ၀ဲ ကမျၢၫ်တၫ်ကဘၣ်ကဲသုးတၫ်ဘျၢအံၤ တအိၣ်ဒီးတဖိးသဲစးဘၣ်အသိး မ့ၫ်တၫ်မၤလၢ အကမၤလီၤဘျၢကွံာ်ထံကီၫ်တဘ့ၣ်ဆူ တၫ်ဒုးအကပျၢၤဃိာ်ပူၤ(စစ်နွံအတွင်း)ဒီး မ့ၫ်စ့ၫ်ကီး တၫ်ကမၤထီထီၣ် သုးမီၤစိရိၤသးသမူ(စစ်အာဏာ သက်ဆိုးရှည်)လီၤအဃိ ခ့ၣ်အဲၣ်ယူၣ်တပၤ တတူၫ်လိာ်၀ဲဘၣ်ဒီး ထီဒါ၀ဲအဂ့ၫ် ထုးထီၣ်ပာ်ဖျါဃာ်၀ဲ ဖဲတနံၤအံၤ လါဖ့ၤဘြူၤအါရံၤ(၁၉)သီအနံၤန့ၣ်လီၤ.
ကမျၢၫ်ကဘၣ်ကဲသုးတၫ်ဘျၢလၢ သုးကီၣ်ကးပာ်လီၤ၀ဲအံၤ မ့ၫ်ဒၣ်တၫ်ကထၢန့ၫ်ဆူၣ်သုးသီလၢ စၢၤသွဲၣ်သးစၫ်(မျိူးဆက်သစ်လူငယ်)တဖၣ်ဒီး ဂံၫ်ခီၣ်ထံးၦၤမၤတၫ်ဖိ(လုပ်သားအရင်းအမြစ်)တဖၣ်၀ံၤ ကဆှၢဃီၤဆူတၫ်ဒုးပျီပူၤဒီတစိၤအဃိ ထံဖိကမျၢၫ်ဖိတဖၣ် အလီၫ်တအိၣ်လၢ သုတလူၤပိာ်မၤထွဲဘၣ်ဒီး ၦၤလၢအလူၤပိာ်မၤထွဲမၤသကိးတၫ်ဒီး သုးကီၣ်ကးခဲလၢာ်န့ၣ် ကဘၣ်ဟံးန့ၫ်မူ, ဟံးန့ၫ်ဒါလၢ တၫ်လၢအပိာ်ထွဲထီၣ်သးတဖၣ်အဖီခိၣ်အဂ့ၫ် ခ့ၣ်အဲၣ်ယူၣ် ဘိးဘၣ်ပာ်ဖျါဃာ်၀ဲန့ၣ်လီၤ.
စၢၤသွဲၣ်သးစၫ်တဖၣ် ဃုာ်ဒီးကလုာ်ဒူၣ်ထံဖိကမျၢၫ်ဖိခဲလၢာ်သုတပာ်ဃုာ်မၤသကိး၀ဲဒၣ်လၢသုးကီၣ်ကး အတဖိးသဲစးတၫ်ဘျၢအပူၤဘၣ်ဒီး မ့မ့ၫ်တခီတၫ်ကခီၣ်ရီၣ်ထီဒါလၢထံရူၫ်ကီၫ်သဲးတၫ်ခီၣ်ရီၣ်အကျဲ, ကပာ်ဖှိၣ်မၤသကိးတၫ်ဒီး တၫ်ပၢၫ်ဆၢဂံၫ်ဘါကရူၫ်ကရၢတဖၣ်၀ံၤ ကခီၣ်ဆၢက့ၤသုးကီၣ်ကး လၢကျဲအကလုာ်ကလုာ်အဂီၫ်စ့ၫ်ကီး တဲဆီၣ်တခူထီၣ်ဃာ်၀ဲန့ၣ်လီၤ.
ကီၫ်ပယီၤပူၤ သုးမီၤစိရိၤသနူမ့ၫ်လီၤၦီၫ်ကတၢၫ်ကွံာ်မးဒီး သုးမီၤစိရိၤသုးအတၫ်ဆီၣ်တံၫ်မၤနၢၤ, မၤတရီတပါ, တၫ်မၤလီၤမုၫ်လီၤဖး, တၫ်မၤသံမၤ၀ီထံဖိကမျၢၫ်ဖိ, တၫ်ဒုးကဲထီၣ်ထံကီၫ်လၢ တၫ်ဒုးပျီတဖၣ်ကကတၢၫ်ကွံာ်၀ဲအဂ့ၫ် တဲ၀ဲန့ၣ်လီၤ.
“ကမျၢၫ်တၫ်ကဘၣ်ကဲသုးတၫ်ဘျၢ“ အံၤမ့ၫ်ဒ်သိး တၫ်ကဒီသဒၢ၀ဲ ကီၫ်ချၢထံကီၫ်သ့ၣ်တဖၣ် အတၫ်နုာ်လီၤဘၢၣ်ဖျိဒုးန့ၫ် ပထံကီၫ်အခါမ့ၫ်ဂ့ၤ, န့ဆၢၣ်တၫ်တတၢၤတနါဒီး တၫ်ကဲထီၣ်သးသတူၫ်ကလာ်လၢ အဒိၣ်အမုၫ်သ့ၣ်တဖၣ်အဂီၫ်ဃုာ်ဒီး တၫ်ဟ့ၣ်လီၤနီၤလီၤ တၫ်ဒိသူၣ်ဒိသးတၫ်မၤစၢၤသ့ၣ်တဖၣ်ဒီး ဖဲလၢတၫ်ဆီၣ်ထွဲမၤစၢၤ မၤၦဲၤန့ၫ် တၫ်ဂဲၤလိာ်ဘၣ်ဃး တၫ်သူၣ်ထီၣ်ဘှီထီၣ်က့ၤထံကီၫ် အဆၢကတီၫ်ခါ တၫ်မၤသ့ၣ်တဖၣ်န့ၣ် မ့ၫ်အကြၢး၀ဲဘၣ်၀ဲအဂ့ၫ်စ့ၫ်ကီး ပာ်ဖျါဃာ်၀ဲန့ၣ်လီၤ.
ဖဲလါဖ့ၤဘြူၤအါရံၤ (၁၃)သီအနံၤန့ၣ် ကမျၢၫ်တၫ်ကဘၣ်ကဲသုးတၫ်ဘျၢလၢ သုးကီၣ်ကးပာ်လီၤ၀ဲအံၤ တၫ်ဘျၢအစိကမီၤပၢ၀ဲအသိး ဒီး တၫ်ကရၢကရိထုးအိၣ်ထီၣ်စ့ၫ်ကီး ကမျၢၫ်တၫ်ဘၣ်ကဲသုးလီၫ်ခၫ်သးကရၢ(စစ်မူထမ်းဆင့်ခေါ်ရေးအဖွဲ့)အဂ့ၫ် သုးကီၣ်ကးထုးထီၣ်ပာ်ဖျါဃာ်၀ဲန့ၣ်လီၤ.
