ဖဲလါဖ့ၤဘြူၤအါရံၤ (၁၁)သီအနံၤ သုးကီၣ်ကးအသုးကျိၤ လၢအိၣ်ဟဲထီၣ်ဖဲ ခ့ၣ်အဲၣ်ယူၣ်-သထူၣ်ကီၫ်ဆၣ် တၫ်ပၢဟီၣ်က၀ီၤအပူၤတဖၣ် လၢအမ့ၫ် သုးကီၣ်ကးအသုး စကခ(၈) အစုတီၤဖီလာ် (ခမရ-၄၀၉)သုးရ့ၣ်, အသုးဖိတဖၣ် ဖဲမုၫ်နံၤအ၀ဲန့ၣ် မုၫ်ထူၣ်(၁၂)နၣ်ရံၣ်န့ၣ် စးထီၣ်ဟးထီၣ်လၢ ၀ံၣ်ယီၣ်သုးကလၢၤ(ဝီယော်စခန်း)ဒီး ဖဲနုာ်လီၤလၢ ထိဘိၣ်ကၠံသ၀ီ(ထုံးဘိုကြီးကျေးရွာ)ပူၤအကတီၫ် ဖီၣ်၀ဲလီၫ်က၀ီၤကမျၢၫ်(၃)ဂၤဒီး သူ၀ဲဒ်ၦၤကညီတၫ်ဒီသဒၢ(လူသားဒိုင်း)အသိးအဂ့ၫ် ခ့ၣ်အဲၣ်ယူၣ်ပာ်ဖျါ၀ဲန့ၣ်လီၤ.
သ၀ီဖိတဖၣ်လၢဘၣ်တၫ်က့ၤဖီၣ်အီၤတဖၣ်န့ၣ် မ့ၫ်ထိဘိၣ်လ့(ထုံးဘိုလေးကျေးရွာ)သ၀ီဖိ သးနံၣ်အိၣ်(၆၃)နံၣ် အူအီၣ်ဆါ(ဦးအောင်ဆန်း), ထိဘိၣ်ကၠံသ၀ီ(ထုံးဘိုကြီးကျေးရွာ)ဖိ သးနံၣ်(၅၀)နံၣ် စီၤမီၣ်ပ့ၣ်(စောမောင်ပေ)ဒီး သးနံၣ်အိၣ်(၄၀)နံၣ်အိၣ် စီၤဖိသဲး(စောဖိုးသက်)တဖၣ်၀ံၤ အ၀ဲသ့ၣ်တဖၣ် ဖဲလါဖ့ၤဘြူၤအါရံၤ(၁၂)သီအနံၤန့ၣ် ဘၣ်တၫ်ပျၫ်ကွံာ်အီၤန့ၣ်လီၤ.
ဖဲလါဖ့ၤဘြူၤအါရံၣ်(၈)သီ, (၉)သီဒီး (၁၁)သီအနံၤတဖၣ်န့ၣ် သုးကီၣ်ကးအသုး (အမတ-၃၁၄)ဒီး (အမတ-၄၀၂)သုးရ့ၣ်တဖၣ် ခးလီၤကျိဖးဒိၣ် အဖျၢၣ်(၂၀)ဆံလၢကမျၢၫ်အိၣ်ဆိးဒူသ၀ီတဖၣ်ပူၤဃိ လီၤတဲာ်ပိၫ်ဖး၀ဲဒၣ်လၢ ခ့ၣ်အဲၣ်ယူၣ်-သထူၣ်ကီၫ်ဆၣ်, ရွ့ၣ်ယီၣ်ပြးက၀ီၤ(ရွှေရောင်ပြကျေးနယ်), ဒီးယးက၀ီၤ(ဒေါက်ရပ်ကျေးနယ်), ဆူအ့က၀ီၤ(ဆူးအင်းကျေးနယ်) သ၀ီတဖၣ်အပူၤအဃိ ကမျၢၫ်တၫ်သူၣ်တၫ်ဖျးအလီၫ်တဖၣ် ဘၣ်ဟးဂီၤ၀ဲန့ၣ်လီၤ.
တၫ်ဂီၤ-ခ့ၣ်အဲၣ်ယူၣ်-လၢၫ်ဒိၣ်ကီၫ်ဆၣ်ပူၤ သုးကီၣ်ကးခးလီၤကျိဖးဒိၣ်တဖၣ်အဃိ တၫ်သံတၫ်ပှၫ်, တၫ်ဘၣ်ဒိဘၣ်ထံးဒီး တၫ်ဟးဂုၤဟးဂီၤတဖၣ်.
photo:knu
