ကီၫ်ကရ့ၣ်နံၣ်အပူၤ မိၫ်ဒၢ, ဖိသၣ်ဒီး ကမျၢၫ်တဖၣ်အဖီခိၣ် သုးကီၣ်ကး အတၫ်မၤသံမၤ၀ီတဖၣ် ကကတၢၫ်ကွံာ်အဂီၫ် တၫ်ကတီၣ်ထီၣ်အီၤလၢ ထံဂုၤကီၫ်ဂၤသုးကွီၫ်မ့ၣ်၀ဲၤဒၢး(နိုင်ငံတကာ စစ်ခုံရုံး) သမံသမိးဟ့ၣ်တၫ်စံၣ်ညီၣ်အဂီၫ် ထံဂုၤကီၫ်ဂၤတၫ်ကရၢကရိတဖၣ် လၢဒ်သိးဘီမုၫ်စၢဖှိၣ်ကရၢဒီး ထံကီၫ်လၢအိၣ်ဘူးတဖၣ်တကပၤ ကဟ့ၣ်ကဒီးဘၣ်တၫ်မၤစၢၤတုၤလီၤတီၤလီၤတဖၣ်အဂီၫ် ကီၫ်ကရ့ၣ်နံၣ် တၫ်ဘၢၣ်စၢၤပၢပြးကီၣ်ကး တဲဆီၣ်တခူ ဃ့ထီၣ်ဃာ်၀ဲလီၤ.
ဖဲလါဖ့ၤဘြူၤအါရံၣ်(၄)သီအနံၤ ဟါခီအကတီၫ်န့ၣ် သုးကီၣ်ကးအသုး (ခလရ-၂၄၉) ဂံၫ်ဘါအိၣ်(၆၀)ဂၤ လၢအိၣ်ဆီလီၤအသးဖဲတီၣ်ကၠံကီၫ်ဆၣ် မဲပၠ့(မိုင်းပျဉ်း)တဖၣ် လၢၡါတီကီၫ်ဆၣ်(ၡားတောမြို့နယ်)အပူၤ ကမျၢၫ်ဟံၣ်ဖိဃီဖိ(၃)ဒူၣ်လၢ ဃ့ၫ်အိၣ်ကဒုဖဲခုးပူၤတဖၣ် က့ၤဖီၣ်၀ဲဒီး သူ၀ဲဒ်ၦၤကညီတၫ်ဒီသဒၢအသိးအဂ့ၫ်, အလီၫ်ခံ ဖဲလါဖ့ၤဘြူၤအါရံၣ်(၅)သီအနံၤ ဂီၤ(၈)နၣ်ရံၣ်ဃၣ်ဃၣ်န့ၣ် ကမျၢၫ်လၢက့ၤဖီၣ်၀ဲ ဖိသၣ်(၃)ဂၤ မိၫ်ဒၢ(၁)ဂၤ ပာ်ဃုာ် ပိာ်မုၣ်(၃)ဂၤ, ဟုးသၣ်အပူၤဖိသၣ်(၁)ဒီး ပိာ်ခွါ(၁)ဂၤ ခဲလၢာ်ပာ်ဖှိၣ်(၇)ဂၤ မၤသံ၀ဲအၢအၢသီသီန့ၣ်လီၤ.
ဖဲတသီဃီ၀ဲန့ၣ်အပူၤ လၢဒံၣ်မီဆိၣ်ကီၫ်ဆၣ်, ဒီဆံအံၣ်သ၀ီဒီး လွဲၣ်နါဖးသ၀ီ(လွိုင်နန်းဖကျေးရွာ)တဖၣ်အပူၤ သုးကီၣ်ကးအသုး ဟဲခးလီၤတၫ်လၢကလံၤကျါဒီး ကျိဖးဒိၣ်တဖၣ်အဃိ ၦၤကၠိဖိလၢတၫ်ကမၣ်တအိၣ်(၄)ဂၤ, ပိာ်ခွါ(၁)ဂၤပာ်ဃုာ် ခဲလၢာ်(၅)ဂၤ ဘၣ်သံ၀ဲအဂ့ၫ် တၫ်သ့ၣ်ညါဘၣ်လီၤ.
တၫ်ကဲထီၣ်အသးအၢအၢသီသီဒ်သိးအံၤန့ၣ် မ့ၫ်သုးကီၣ်ကးအသုး အတၫ်မၤကမၣ် ဟီၣ်ခိၣ်ဖိခွဲးယာ်ဂ့ၫ်၀ီဒီး သုးကွီၫ်မ့ၣ်တၫ်မၤကမၣ်(စစ်ရာဇဝတ်မှု)တဖၣ် လၢတၫ်ပညိၣ်အိၣ်အပူၤ မ့ၫ်တၫ်ပညိၣ်ဒုး၀ဲ ထံဖိကီၫ်ဖိကမျၢၫ်တဖၣ်၀ံၤ တၫ်မၤတၫ်ဒ်သိးအံၤန့ၣ် ဂ့ၫ်လိာ်ထီဒါ၀ဲအဂ့ၫ် ကီၫ်ကရ့ၣ်နံၣ်တၫ်ဘၢၣ်စၢၤပၢပြးကီၣ်ကး-IEC), ဘိးဘၣ်ရၤလီၤ၀ဲလီၤ.
တၫ်မၤကမၣ် ဟီၣ်ခိၣ်ဖိခွဲးယာ်အၢအၢသီသီ ဒ်သိးတပယူာ်ဃီအံၤ တၫ်မၤကမၣ်တဖၣ် ကကတၢၫ်ကွံာ်အဂီၫ် ထံဂုၤကီၫ်ဂၤတၫ်ကရၢကရိတဖၣ်လၢဒ်သိး ဘီမုၫ်စၢဖှိၣ်ကရၢဒီး ထံကီၫ်လၢအိၣ်ဘူးတဖၣ်တကပၤ ၦၤလၢမၤကမၣ်ကွီၫ်မ့ၣ် တၫ်မၤကမၣ်တဖၣ် လၢထံဂုၤကီၫ်ဂၤသုးကွီၫ်မ့ၣ်၀ဲၤဒၢးအပူၤ တၫ်ကသမံသမိး ဟ့ၣ်တၫ်စံၣ်ညီၣ်အဂီၫ်ဒီး ၦၤလၢတူၫ်ဘၣ်တၫ်တဖၣ်လၢအမ့ၫ် ပိာ်မုၣ်, ဖိသၣ်ဒီး ကမျၢၫ်တဖၣ်အဂီၫ် တၫ်ဆီၣ်ထွဲမၤစၢၤလၢ တုၤလီၤတီၤလီၤတဖၣ် တၫ်ကဟ့ၣ်ဘၣ်အဂီၫ် ကီၫ်ကရ့ၣ်နံၣ်တၫ်ဘၢၣ်စၢၤပၢပြးကီၣ်ကး-IEC), ဃ့ထီၣ်ဃာ်၀ဲလီၤ.
ဟံၣ်ဖိဃီဖိလၢကွၫ်ဆၢၣ်မဲာ်ဘၣ် တၫ်လီၤသူၣ်အုးသးအုး တၫ်ကဲထီၣ်သးဒ်သိးအံၤ ဒီးၦၤလၢတူၫ်ဘၣ်တၫ်လၢအမ့ၫ် ဖိဒံဖိသၣ်, ပိာ်မုၣ်ဒီး ကမျၢၫ်ထံဖိကီၫ်ဖိတဖၣ်အဂီၫ် တၫ်ကဒုးအိၣ်ထီၣ်န့ၫ်ဘၣ်အီၤ တၫ်တီတၫ်တြၫ်၀ံၤ သုးမီၫ်စိရိၤဒီး ကယဲၫ်မ့ၫ် မီၫ်စိရိၤခဲလၢာ် ကကတၢၫ်ကွံာ်တစု ကမၤထွဲ၀ဲအဂ့ၫ် ကီၫ်ကရ့ၣ်နံၣ်တၫ်ဘၢၣ်စၢၤပၢပြးကီၣ်ကး-IEC), ဟ့ၣ်ဒုးသ့ၣ်ညါ၀ဲလီၤ.
ref:khitthit
