အ့ၣ်ဒံယၣ်ထံဖိကီၫ်ဖိလၢ ဟဲတုၤ၀ဲဒၣ်ဆူ ကီၫ်ပယီၤတဖၣ် သုတလဲၤဆူရခၢၣ်ကီၫ်စဲၣ်အဂီၫ် အ့ၣ်ဒံယၣ်ထံဂုၤကီၫ်ဂၤကိတိာ်၀ဲၤကျိၤ ထုးထီၣ်ပာ်ဖျါလံာ်တၫ်ဟ့ၣ်ပလီၫ်န့ၣ်လီၤ.
ရခၢၣ်ကီၫ်စဲၣ်အပူၤ တၫ်ဘံၣ်တၫ်ဘၢဟးဂီၤကွံာ်တဖၣ်, ပျံၤကျိၤတဖၣ်ပာ်ဃုာ် တၫ်ဆဲးကျိးဆဲးကျဲသနူ ဟးဂီၤကွံာ်တဖၣ်, တၫ်ဖိတၫ်လံၤလၢ လိၣ်ဘၣ်တဖၣ် တအိၣ်လၢၤဘၣ်အဃိ အ့ၣ်ဒံယၣ်ထံဖိကီၫ်ဖိတဖၣ် သုတလဲၤဆူ ရခၢၣ်ကီၫ်စဲၣ်အဂီၫ် အ့ၣ်ဒံယၣ်ပဒိၣ်ဟ့ၣ်ပလီၫ်၀ဲန့ၣ်လီၤ. အ့ၣ်ဒံယၣ်ထံဖိကီၫ်ဖိလၢ အလဲၤတုၤဆူရခၢၣ်ကီၫ်စဲၣ်တဖၣ်စ့ၫ်ကီး ကဟးထီၣ်၀ဲဒၣ်လၢရခၢၣ်ကီၫ်စဲၣ်ပူၤ တဘျီဃီအဂ့ၫ် အ့ၣ်ဒံယၣ်ထံဂုၤကီၫ်ဂၤကိတိာ်၀ဲၤကျိၤ ဟ့ၣ်ကူၣ်ဃာ်၀ဲန့ၣ်လီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ(၃)နံၣ်ပှဲၤထီၣ် တၢတနွံအတီၫ်ပူၤစ့ၫ်ကီး ကီၫ်အ့ၣ်ဒံယၣ်တခီ ကီၫ်ပယီၤပူၤ တၫ်မၤပျီၣ်မၤဂီၤတဖၣ်ဒီးတၫ်အိၣ်သးတအိၣ်ဂၢၫဆိးကျၢၤအဖီခိၣ်ဘၣ်ယိၣ်၀ဲအဂ့ၫ်, အံၣ်ဒံယၣ်ထံကီၫ်တၫ်ဘံၣ်တၫ်ဘၢအဂီၫ် တၫ်ဘၣ်ဒိဘၣ်ထံးအိၣ်၀ဲအဂ့ၫ်, ဂ့ၫ်ဂီၤအူတၫ်အိၣ်သး တၫ်မၤအါထီၣ်အဆၢကတီၫ်၀ံၤ နၣ်ရံၣ်အဆၢကတီၫ်ပူၤ ထံဂုၤကီၫ်ဂၤကိတိာ်၀ဲၤကျိၤ ပှၤတဲတၫ်ပၢ ရၣ်ဒံၣ်အၣ် ကၠ့ၣ်စ၀ဲ (Randhir Jaiswal) တဲ၀ဲအဂ့ၫ် ဟ့ၣ်ဒူးစတါထဲ (ဟိန္ဒူစတန်တိုင်းမ်း)တၫ်ကစီၣ်သန့ ပာ်ဖျါဃာ်၀ဲန့ၣ်လီၤ.
တၫ်မၤပျီၣ်မၤဂီၤတဖၣ် ကပတုာ်ကွံာ်ဒီး ပှၤခဲလၢာ်ပာ်ဃုာ် ဖဲၣ်ဒရၢၣ်ဒံၣ်မီၣ်ကရ့ၣ်စံၣ် တၫ်ဆီတလဲကကဲထီၣ်အဂီၫ် အ့ၣ်ဒံယၣ်တပၤ တဲလီၤ၀ဲန့ၣ်လီၤ. ခီဖျိတၫ်တၢၣ်ပီၣ်တဲသကိးတဆီ ဒီး ထံကီၫ်ကမုာ်ခုၣ်ကအိၣ်ဂၢၤဆိးကျၢၫ်ကကဲထီၣ်က့ၤအဂီၫ် တၫ်ကဘှါရှဲအီၤအဆိအချ့အီၤအဂ့ၫ် မံးစထၢၣ် ရၣ်ဒံၣ်အၣ် ကၠ့ၣ်စ၀ဲ (Randhir Jaiswal) တဲ၀ဲန့ၣ်လီၤ.
တၫ်သုတလဲၤလၢရခၢၣ်အဂီၫ် ကီၫ်အ့ဒံယၣ် ဟ့ၣ်ပလီၫ်အထံဖိကီၫ်ဖိ
