မကွ့ကီၫ်ခီ, ကးကီကီၫ်ဆၣ် ဟီၣ်က၀ီၤပူၤ ယီတၫ်ဒီသဒၢသုး(YDF) လၢပာ်ဖှိၣ်မၤဒုးယၤရဲၣ်ကျဲၤဒီး သိၣ်မှံကရၢ သုးဖိ(၂)ဂၤ, မၠီးခ့ၣ်ယါ(မြောက်ခင်ရန်း)သ၀ီ ပၠူၣ်စီထံသုးတဖၣ်ဖီၣ်န့ၫ်အီၤ၀ံၤ တၫ်ဒွဲၣ်အူမၤသံကွံာ်အီၤမူဒံးအဂ့ၫ် ယီတၫ်ဒီသဒၢသုး ပာ်ဖျါဃာ်၀ဲဖဲ လါဖ့ၤဘြူၤအါရံၤ(၆)သီအနံၤ, ဟါအဆၢကတီၫ်န့ၣ်လီၤ.
ပှၤလၢကူသိးဃာ် သုးကူသုးကၤတဖၣ် ဒွဲၣ်အူမၤသံကွံာ် PDF သုးဖိ(၂)ဂၤတၫ်ဂီၤမူတဖၣ် ဟဲဟူသါထီၣ်လၢ ပှၤတ၀ၢကဘျံးပၤတဖၣ်အဖီခိၣ်၀ံၤ ဟါခီလီၤအဆၢကတီၫ် YDF သုး ထုးထီၣ်ပာ်ဖျါထီၣ်၀ဲ တၫ်ကစီၣ်န့ၣ်လီၤ.
ဖဲအပူၤကွံာ်နံၣ်, လါနိၣ်၀့ဘၢၣ်(၇)သီအနံၤ, သုးကီၣ်ကးအသုးတဖၣ် အိၣ်ဆီလီၤ ကးကီကီၫ်ဆၣ်, မၠီးခ့ၣ်ယါသ၀ီပူၤ တၫ်ထီဒါသုးကီၣ်ကး တၫ်ပာ်ဖှိၣ်ဒုး၀ဲဒီးသိၣ်မှံကရၢတဖၣ်အဆၢကတီၫ် တၫ်ဖီၣ်န့ၫ်အီၤ PDF သုးဖိ(၂)ဂၤအဂ့ၫ် ပာ်ဖျါဃာ်၀ဲလၢ လံာ်ဘိးဘၣ်ရၤလီၤအပူၤန့ၣ်လီၤ.
ပှၤ(၂)ဂၤလၢတၫ်ဖီၣ်န့ၫ် ဒွဲၣ်အူမၤသံကွံာ်အီၤမ့ၫ်၀ဲ ဖိတ့ၣ်(ဖိုးတေ)ဒီး သါထီၣ်(သားထောင်)အံၤ တၫ်မၤဆူၣ်မၤဆါအီၤ အဘျီတဖၣ်အဘျီ၀ံၤအလီၫ်ခံ တၫ်ဒွဲၣ်အူမၤသံမူဒံးအီၤလၢ ကမျၢၫ်အါဂၤအိၣ်တၫ်လီၫ်အဂ့ၫ် ကွဲးဖျါဃာ်၀ဲန့ၣ်လီၤ. တချူးမၤသံအီၤအကတီၫ် ကိး၀ဲဒူသ၀ီဖိ တဟံၣ်တဂၤစုာ်စုာ်၀ံၤ မၢကွၫ်၀ဲအဂ့ၫ် စံး၀ဲန့ၣ်လီၤ.
မကွ့ကီၫ်ခီ, ကးကီကီၫ်ဆၣ်ပူၤ ပှၤလၢတူၫ်လိာ်ဆီၣ်ထွဲ သုးကီၣ်ကးတဖၣ် ပၠူၣ်စီထံသ၀ီအိၣ်၀ဲအါအါဂီၫ်ဂီၫ်၀ံၤ ဖဲအပူၤကွံာ် လါဒံၣ်စ့ဘၢၣ်(၁၂)သီဒီး (၁၃)သီအနံၤ မၠီးခ့ၣ်ယါသ၀ီဖိ (၁၃၉)ဂၤလၢ အပျံၤ၀ဲ ပၠူၣ်စီထံအတၫ်မၤအၢမၤသီအဃိ ဃ့ၫ်ပူၤဖျဲးသးတဖၣ်အိၣ်၀ဲအဂ့ၫ် လီၫ်က၀ီၤကမျၢၫ်တဖၣ်ဒီး ကမျၢၫ်တၫ်ပၢတၫ်ပြးကရၢဖိတဖၣ် တဲ၀ဲန့ၣ်လီၤ.
ဘၣ်ထွဲဒီးတၫ်ကဲထီၣ်သးလၢ YDF ကရၢတၫ်ဘိးဘၣ်ရၤလီၤ တၫ်ဂီၤမူလၢဟူသါထီၣ်တဖၣ်အဖီခိၣ် သုးကီၣ်ကးတပၤ ဘိးဘၣ်ရၤလီၤတအိၣ်နီၤတမံၤဒံးဘၣ်န့ၣ်လီၤ.
ကးကီ(ဂန့်ဂေါ) PDF(၂)ဂၤ တၫ်ဒွဲၣ်အူမၤသံကွံာ်အီၤအဂ့ၫ် ယီ(ယော)တၫ်ဒီသဒၫသုး ထုးထီၣ်ပာ်ဖျါ
