လါအီးကထိဘၢၣ် ၆သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကီၢ်အ့ဒံယါ ကသံၣ်ကူးတကလုၥ်အပူၤ တၢ်ထံၣ်န့ၢ်၀ဲလၢ ဂၥ်တၢ်ဖိတၢ်လံၤလၢတၢ်လီၤဘၣ်ယိၣ်အိၣ် ပၣ်ဃုၥ်အဂ့ၢ် ၀ံၤအလီၢ်ခံ တၢ်အံၤန့ၣ် ဘၣ်ထွဲဒီးဖိသၣ်၉ဂၤသံအိၣ်တအိၣ် သမံသမိး၀ဲအဂ့ၢ် ပှၤဘၣ်မူဘၣ်ဒါတဖၣ် တဲလီၤ၀ဲ ဖဲလါအီးကထိဘၢၣ် ၄သီအနံၤန့ၣ်လီၤ.
ဆူၣ်ချ့ကိတိၥ်၀ဲၤကျိၤ အတၢ်တဲအဖီခိၣ် ဖဲလၢတၢ်သမံသမိးကွၢ်၀ဲ ကလံၤထံး တမံနၣ်ဒူၣ်ကီၢ်စဲၣ်အိၣ်သူၣ်လီၤ Sresan Pharmaကသံၣ်ခီပနံၥ် ထုးထီၣ် Coldrif Cough Syrupကသံၣ်ကူးတဖၣ်အဆၢကတီၢ် တၢ်ထံၣ်န့ၢ်၀ဲ ဒဲၣ်အီသလ့ကလိၣ်ကီ (Diethylene Glycol – DEG)အတၢ်ပၣ်ဃုၥ်န့ၣ် အါတလၢန့ၢ်ဒံးလၢ တၢ်ဟ့ၣ်ပျဲ ထီၣ်ဘးန့ၣ်လီၤ.
ကသံၣ်ဘူၣ် DEGလၢ တၢ်သူအီၤလၢ စဲးတၢ်ဖိတၢ်လံၤတဖၣ်အပူၤအံၤ ဘၣ်ထွဲလိၥ်အသးဒီး ထံကီၢ်အါဘ့ၣ်အပူၤ ပှၤသးသမူတဖၣ် ဘၣ်သံဘၣ်ပှၢ်၀ဲအဂ့ၢ်န့ၣ်လီၤ.
မဲးဒယၣ်ရၣ်ဒ့းကီၢ်စဲၣ်အပူၤ တယံၤတမီၤဒံးဘၣ် ဖိသၣ်၉ဂၤသံ၀ဲအံၤန့ၣ် အဘၣ်ထွဲလိၥ်သးဒီး အီကသံၣ်ကူးအံၤအဂ့ၢ် တၢ်ကစီၣ်တဖၣ်ဟူးထီၣ်သါလီၤ၀ံၤအလီၢ်ခံ ဆူၣ်ချ့ကိတိၥ်၀ဲၤကျိၤ အလံၥ်ထုးထီၣ်ပၥ်ဖျါတဖၣ် ဟဲအိၣ်ထီၣ်၀ဲန့ၣ်လီၤ.
တၢ်အဒိ ၁၃ခါလၢ မဲးဒယၣ်ရၣ်ဒ့း တၢ်ပၢဆှၢရဲၣ်ကျဲၤ တၢ်အီၣ်တၢ်အီဒီးကသံၣ်ကသီ၀ဲၤကျိၤဟံးဃၥ်၀ဲအကျါ တၢ်သမံသမိးကွၢ်၀ဲ ၃ခါအဆၢကတီၢ် ဂၥ်တၢ်ဖိတၢ်လံၤလၢအိၣ်ဒီးအစုၣ်အပျၢ်တဖၣ်တအိၣ်၀ဲဘၣ်အဂ့ၢ် ကိတိၥ်၀ဲၤကျိၤ အလံၥ်ဘိးဘၣ်ပၥ်ဖျါအပူၤ ပၥ်ဖျါဃၥ်၀ဲန့ၣ်လီၤ.
ဘၣ်ဆၣ်ဒီး တမံနၣ်ဒူၣ် တၢ်ပၢဆှၢကသံၣ်ကရၢ ဟံးဃၥ်၀ဲ ကသံၣ်အဒိလၢ ကၣ်ခၠံၣ်ပူရၣ်၀့ၢ် Sresan Pharmaခီပနံၥ်စဲးဖီကဟၣ်တၢ်မၤလီၢ်ပူၤတခီ တၢ်ထံၣ်ဘၣ်၀ဲလၢ အသူDEGတလၢကွံၥ်လၢတၢ်ဟ့ၣ်ပျဲအဂ့ၢ် ပၥ်ဂၢၢ်ပၥ်ကျၢၢ်ဃၥ်၀ဲန့ၣ်လီၤ.
ကတီၢ်ခဲအံၤန့ၣ် ပှၤဘၣ်မူဘၣ်ဒါတဖၣ် စးထီၣ်သမံသမိး၀ဲ ကီၢ်စဲၣ်၆ဘ့ၣ်အပူၤအိၣ် တၢ်ထုးထီၣ်ကသံၣ်တၢ်ဖံးတၢ်မၤ ၁၉ခါအပူၤ ကသံၣ်ကသီတဖၣ်လၢ တၢ်ပၥ်ပနီၣ် အကံၢ်အစီပှဲၤတပှဲၤအဂ့ၢ် တၢ်သ့ၣ်ညါဘၣ်န့ၣ်လီၤ.
၂၀၂၂နံၣ်, ကီၢ်ကၣ်ဘံၣ်ယၣ်အပူၤ ပှၤဖိသၣ်သံ ၇၀ဂၤတၢ်ဂ့ၢ်အံၤန့ၣ် ဘၣ်ထွဲလိၥ်သးဒီး ကီၢ်အ့ဒံယါခီပနံၥ်ထုးထီၣ် ကသံၣ်ကူးတဖၣ်အဂ့ၢ် ဟီၣ်ခိၣ်ဒီဖျၢၣ်ဆူၣ်ချ့ကရၢ(WHO) ပၥ်ဖျါထီၣ်၀ဲ၀ံၤအလီၢ်ခံ ကီၢ်အ့ဒံယါန့ၣ် ကွၢ်ဆၢၣ်မဲၥ်ဘၣ်ဒီး တၢ်တီၣ်သွီနုၥ်ကသံၣ်ကသီတဖၣ် အကံၢ်အစီပှဲၤတပှဲၤအဂ့ၢ်န့ၣ်လီၤ.
နယူဒ့ၣ်လံၣ်ပဒိၣ်တခီ ဘၣ်ထွဲဒီးတၢ်ထံၣ်န့ၢ်တဖၣ်အဖီခိၣ် ဂ့ၢ်လိၥ်ဃၥ်၀ဲန့ၣ်လီၤ.
Ref – Reuters
