လါအီကူၥ် ၁၂သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ဖဲ ၂၀၂၅ နံၣ် လါအီကူၥ် ၉ သီ, လၢအမ့ၢ်ဝဲ ဟီၣ်ခိၣ်ဒီဖျၢၣ် ၦၤထူလံၤဖိအမုၢ်နံၤ န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, မုၢ်တြီၢ်ကီၢ်ရ့ၣ်, ဖျးခိၣ်ကရူၢ် ပူၤ ဒူသဝီကမျၢၢ်တဖၣ် ပၥ်ဖှိၣ်ထီၣ်အသးဒီး ရဲၣ်ကျဲၤမၤလၤကပီၤသကိးဝဲ ၦၤထူလံၤဖိမုၢ်နံၤ တၢ်ရဲၣ်တၢ်ကျဲၤ ဖဲ ကၠီၤကၢၣ်ဒၢသဝီ တၢ်လီၢ်တတီၤအဂ့ၢ် , ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲတၢ်ကစီၣ်န့ၣ်လီၤ.
လၢတၢ်ရဲၣ်တၢ်ကျဲၤတဘျီအံၤ ဒူသဝီအိၣ်ဘူးအိၣ်တံၢ်တဖၣ် ဒ်အမ့ၢ် ကၠီၤကၢၣ်ဒၢသဝီ, ကၠူၣ်မလ့ ဒၢသဝီ, ကၠီၤအံၣ်ဒၢသဝီ, လ့ဂီၤသဝီဒီးဖျးခိၣ်သဝီ သဝီခိၣ်နၢ်ဘၣ်မူဘၣ်ဒါ ဒီး သဝီဖိတဖၣ် ဟဲထီၣ်ပၥ် ဂုၥ်ပၥ်ဂီၢ်, ပၥ်ဖှိၣ်မၤသကိးတၢ်စ့ၢ်ကီးအဂ့ၢ် ပၥ်ဖျါဃၥ်၀ဲန့ၣ်လီၤ.
တၢ်မၤလၤကပီၤ ဟီၣ်ခိၣ်ဒီဖျၢၣ်ၦၤထူလံၤဖိအမုၢ်နံၤအံၤ လၢဒူသဝီကမျၢၢ်ဖဲအံၤသ့ၣ်တဖၣ်အဂီၢ် မ့ၢ်တၢ်အဆိကတၢၢ်တဘျီန့ၣ်လီၤ. တၢ်ရဲၣ်တၢ်ကျဲၤအံၤအပူၤ တၢ်ကွဲမုၥ်စ့ၢ်ကီး တံၤသကိးလၢအဂၤ ဒ်အမ့ၢ် စီၤမုၢ်ပျီကရူၢ် ဒူသဝီလၢမုၢ်ထီၣ်တဖၣ် ဒ်သိး ကဟဲမၤလၤကပီၤဃုၥ်သကိးန့ၣ်လီၤ. တကးဒံးဘၣ် လီၢ်ကဝီၤပူၤ ကၠိဖိသ့ၣ်တဖၣ်စ့ၢ်ကီး ဟဲပၥ်ဖှိၣ်မၤသကိးတၢ်အဃိ ၦၤဟဲထီၣ်မၤလၤကပီၤမူးတဘျီအံၤ ခဲလၢၥ်အိၣ်ဝဲ ၄၀၀ ဘျဲၣ်အဂ့ၢ် စံး၀ဲန့ၣ်လီၤ.
ၦၤထူလံၤဖိ အမုၢ်နံၤ ဟဲကဲထီၣ်အဂ့ၢ်အကျိၤ ဒီး ၦၤထူလံၤဖိသ့ၣ်တဖၣ်အံၤ အတၢ်ခွဲးတၢ်ယၥ်လၢအဂီၢ် အိၣ်တၢ်မနုၤလဲၣ်န့ၣ် ၦၤထူလံၤဖိလၢ ဟဲထီၣ်မၤလၤကပီၤမူးအံၤသ့ၣ်တဖၣ် သ့ၣ်ညါဘၣ်ဝဲအဆိကတၢၢ်တဘျီ ခီဖျိ ခိၣ်နၢ်ဘၣ်မူဘၣ်ဒါတဖၣ် အတၢ်ကတိၤဟ့ၣ်ခီဟ့ၣ်နီၤလီၤအဃိန့ၣ်လီၤ.
ၦၤထူလံၤ ဖိအမုၢ်နံၤအံၤ လၢအပူၤကွံၥ် တၢ်တမၤလၤကပီၤအီၤဖဲ တၢ်လီၢ်အံၤ နီတဘျီဘၣ်အဃိ ၦၤထူလံၤဖိဖဲအိၣ် ဆိးတၢ်လီၢ်ဖဲအံၤသ့ၣ်တဖၣ် တသ့ၣ်ညါဒီးတနၢ်ဟူဘၣ်ဝဲနီတဘျီဘၣ် ဒီး တၢ်တဘျီအံၤလၢအဂီၢ် မ့ၢ်တၢ်အဆိကတၢၢ်အဂ့ၢ် ပၥ်ဖျါဃၥ်၀ဲန့ၣ်လီၤ.
