လါအီကူၥ်(၄)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
တၢ်ဒုးတဖၣ်ကဲထီၣ်သးသ့လၢ ဘျံး-ပလီၢ်နီၣ်ဂံၢ်(၈)ကီၢ်စၢဖှိၣ်ကျဲမုၢ်ဖးဒိၣ်ဒီး ဘျံး-ဘိးပၠ့ကျဲမုၢ်အဖီခိၣ်တၢ်လီၢ်တဖၣ်အပူၤအဃိကမျၢၢ်ဖိလၢအိၣ်ဖဲန့ၣ်တဖၣ်ကသုးစိပၥ်သးအဂီၢ်တနီသရံၣ်ကီၢ်ခီသုး၀ဲၤလီၢ်ခိၣ်သ့ၣ် ထုးထီၣ်ပၥ်ဖျါဃၥ်၀ဲန့ၣ်လီၤ.
သုးကီၣ်ကးအသုးတဖၣ် ဟဲနုၥ်လီၤသုးကျိၤ ဖဲတနီသရံၣ်ကီၢ်ခီသုး၀ဲၤလီၢ်ခိၣ်သ့ၣ်အဖီလၥ် တၢ်ကူၣ်တရံး(၃၅)ဟီၣ်က၀ီၤလၢအမ့ၢ် ပလီၢ်ကီၢ်ဆၣ်ဒီးတနီသရံၣ်ကီၢ်ဆၣ်တဖၣ်အပူၤအဃိ တၢ်ဘၣ်သဂၢၢ်ခးလိၥ်သးတဖၣ်အိၣ်ထီၣ်၀ဲဒီး တနီသရံၣ်ကီၢ်ခီသုး၀ဲၤလီၢ်ခိၣ်သ့ၣ်အစုတီၤဖီလၥ် သုးကျိၤတဖၣ်အဂ့ၢ် စံး၀ဲန့ၣ်လီၤ.
ပလီၢ်ကီၢ်ဆၣ်အပူၤတၢ်ဒုးကဲထီၣ်သးတအိၣ်ဘၣ်ဒီး ခီဖျိသုးကီၣ်ကးအသုး ခးလီၤကျိဖးဒိၣ်တဖၣ်အဃိ ပှၤလီၢ်အိၣ်ကမှံဖိ(၁၀)ဂၤဘၣ်သံ၀ဲအသိး တနီသရံၣ်ကီၢ်ဆၣ်အပူၤစ့ၢ်ကီး သုးကီၣ်ကးအသုးဟဲနုၥ်လီၤသုးကျိၤ၀ံၤ ဖီၣ်န့ၢ်ဆူၣ်ကမျၢၢ်အဂၤ(၁၀)ဒီးကမၢကဲသုးအဂ့ၢ် ပၥ်ဖျါဃၥ်၀ဲန့ၣ်လီၤ.
တကးဘၣ် တၢ်လီၢ်လၢသုးကီၣ်ကးအသုးကျိၤတဖၣ် နုၥ်လီၤ၀ဲတဖၣ်အပူၤ ဖီၣ်န့ၢ်ဆူၣ်ကမျၢၢ်, မၢန့ၢ်ဆူၣ်၀ဲတဖၣ်, မၤဆူၣ်မၤဆါ၀ဲ, မၤသံမၤ၀ီတၢ်တဖၣ်, ဂုၤဟံးန့ၢ်ကမျၢၢ်အတၢ်စုလီၢ်ခီၣ်ခိၣ်တၢ်ဖိတၢ်လံၤတဖၣ်၀ံၤ ဒွဲၣ်အူမၤဟးဂီၤကွံၥ် ကမျၢၢ်ဟံၣ်ဃီတဖၣ်ဒီး မၤကမၣ်သုးကွီၢ်မ့ၣ်တဖၣ်အဂ့ၢ် စံး၀ဲန့ၣ်လီၤ.
လၢတၢ်န့ၣ်အဃိ တနီသရံၣ်ကီၢ်ခီသုး၀ဲၤလီၢ်ခိၣ်သ့ၣ်အစုတီၤဖီလၥ် ကမျၢၢ်တၢ်ဒီသဒၢသုးရ့ၣ်ဒီးသုးကျိၤတဖၣ်တခီ ကနုၥ်လီၤဒုး၀ဲ သုးကီၣ်ကးအသုးဟဲဆီၣ်လီၤဃၥ်သးအလီၢ်တဖၣ်အဃိ ထံဖိကီၢ်ဖိကမျၢၢ်တဖၣ် သုတလ့ၤလိၤဟးထီၣ်ဘၣ်လၢ ဘျံး-ပလီၢ်နီၣ်ဂံၢ်(၈)ကီၢ်စၢဖှိၣ်ကျဲမုၢ်ဖးဒိၣ်, ဘျံး-ဘိးပၠ့ကျဲမုၢ်ဖးဒိၣ်၀ံၤ သုတလဲၤအိၣ်ဘၣ်လၢ သုးကီၣ်ကးအသုးဟဲဆီၣ်ဃၥ်သးတၢ်လီၢ်တဖၣ်အကပၤဒီး ကသုးစိပၥ်သးအဂီၢ် ဟ့ၣ်ပလီၢ်ဃၥ်၀ဲန့ၣ်လီၤ.
