လါယူၤလံ(၁၄)သီ,၂၀၂၅နံၣ်
လၢ၀့ၫ်တကူၣ်အပူၤ သုးကီၣ်ကးဘုၣ်အါထီၣ် ပှၤဟ့ၣ်တၫ်ကစီၣ်ဖိတဖၣ်၀ံၤ ရၤလီၤ၀ဲတၫ်လီၫ်သကုၤအပူၤအဃိ သးစၫ်လၢဘၣ်ထွဲဒီးတၫ်ပၢၫ်ဆၢတဖၣ် ဘၣ်ပလီၫ်သူၣ်ပလီၫ်သးအဂ့ၫ် ပှၤကွၫ်ဆၢၣ်မဲာ်ဘၣ်၀ဲလၢအနီၫ်ကစၫ်တနီၤ တဲ၀ဲလီၤ.
၀့ၫ်တကူၣ်အဖီခိၣ် ပၢပြးကရၢလၢမၤတၫ်ဖျိဖျိဖျါဖျါလၢသုးကီၣ်ကးအဂီၫ်တဖၣ်, ပှၤဆီၣ်ထွဲသုးဒီးထံရူၫ်ကီၫ်သဲးပၣ်တံၣ်တနီၤလၢတူၫ်လိာ်ဆီၣ်ထွဲ သုးဟံးန့ၫ်တၫ်စိတၫ်ကမီၤတဖၣ် ပှၤတၫ်ပၢၫ်ဆၢဖိတဖၣ် လူၤကူၣ်မၤသံ၀ဲ၀ံၤလီၫ်ခံ တၫ်ထံၣ်ဘၣ်လၢဒုးအိၣ်ထီၣ် ပှၤဟ့ၣ်တၫ်ကစီၣ်ဖိတဖၣ်အဂ့ၫ် သးစၫ်လၢပာ်ဃုာ်လၢ၀့ၫ်ပူၤတၫ်ပာ်ဖျါထီၣ်တၫ်ဘၣ်သးတဂၤ တဲ၀ဲလီၤ.
“အပူၤကွံာ် သုးကီၣ်ကးအပှၤဟ့ၣ်တၫ်ကစီၣ်ဖိဖဲလဲၣ်တဂၤန့ၣ် တၫ်သ့ၣ်ညါ၀ဲလီၤ.အဃိတၫ်ပဒ့ၣ်ဟးဆှဲးဆိသး သ့၀ဲလီၤ.လၢအခဲအံၤ ဒုးအိၣ်ထီၣ်အါထီၣ် ပှၤဟ့ၣ်တၫ်ကစီၣ်ဖိတဖၣ်အိၣ်အဂ့ၫ်န့ၣ် တၫ်ဃုထံၣ်သ့ၣ်ညါန့ၫ်၀ဲလီၤ.တၫ်န့ၣ်အဃိ ဘၣ်ပလီၫ်သးဒိၣ်န့ၫ်အလီၫ်လီၤ.”
သုးကီၣ်ကးန့ၣ် စးထီၣ်လၢဒူသ၀ီပတီၫ် ကရၢကရိဒုးအိၣ်ထီၣ်ဂၢၤကီၫ်သုး၀ံၤကရၢကရိဒုးအိၣ်ထီၣ်ပှၤဟ့ၣ်တၫ်ကစီၣ်ဖိတဖၣ်ဖျိဖျိဖျါဖျါအိၣ်အသိး ပှၤလၢတၫ်တပာ်သူၣ်ပာ်သးတဖၣ် ပာ်၀ဲဒ်ပှၤဟ့ၣ်တၫ်ကစီၣ်ဖိတဖၣ်အဂ့ၫ် ပှၤလၢအိၣ်ဘူးဒီးပၢပြးတကပၤတဲ၀ဲလီၤ.
သုးကီၣ်ကးန့ၣ် ဟံးန့ၫ်ဟီၣ်က၀ီၤတၫ်ကစီၣ်တၫ်ဂ့ၫ်တၫ်ကျိၤလၢပၢပြးကရၢအိၣ်တကးဘၣ် ထၢပာ်ဖှိၣ်၀ဲကိးမုၫ်နံၤတၫ်အိၣ်သးလၢပှၤဟ့ၣ်တၫ်ကစီၣ်ဖိတဖၣ်အိၣ်အဂ့ၫ် တကူၣ်၀့ၫ်သီမုၫ်ထီၣ်ကီၫ်ဆၣ် ပှၤအိၣ်ဘူးဒီးပၢပြးတကပၤတဂၤတဲ၀ဲလီၤ.
“ပကစၫ်ပၢပြးကရၢဒၣ်လဲၣ်တသ့ၣ်ညါဘၣ်အမဲာ်ညါ ပှၤဟ့ၣ်တၫ်ကစီၣ်ဖိလၢအ၀ဲသ့ၣ်နဲၣ်လီၤဃာ်၀ဲတဘျီဃီန့ၣ် အိၣ်၀ဲလီၤ.ဟံးန့ၫ်တၫ်ကစီၣ်တၫ်ဂ့ၫ်တၫ်ကျိၤလၢအ၀ဲသ့ၣ်အိၣ်၀ံၤ မ့ၫ်ကဲထီၣ်တမံၤမံၤလံမးဒီး ဃ့ထီၣ်တၫ်ပာ်ဂၢၫ်ပာ်ကျၢၤလၢပၢပြးကရၢတကပၤအိၣ်န့ၣ်လီၤ.”
ပှၤဟ့ၣ်တၫ်ကစီၣ်ဖိလၢသုးကီၣ်ကးကရၢကရိဒုးအိၣ်ထီၣ်အံၤ အိၣ်၀ဲလၢတၫ်လီၫ်သကုၤအပူၤဃုာ်ဒီးက့ၫ်ဂီၤအကလုာ်ကလုာ် ဘၣ်တၫ်ဟ့ၣ်ဃာ်အီၤတၫ်ဆီၣ်ထွဲမၤစၢၤတဖၣ်ဒီးကရၢကရိဒုးအိၣ်ထီၣ်၀ဲန့ၣ်လီၤ.
သုးကီၣ်ကးန့ၣ် လၢတနံၣ်အံၤအလၢာ် ဂဲၤလိာ်၀ဲလၢ မၤတၫ်ဃုထၢလၢ၀့ၫ်တကူၣ်ပူၤမ့ၫ်န့ၫ်န့ၣ် အသုးသ့ၣ်လၤကပီၤကအိၣ်ဖျါထီၣ်၀ံၤ တၫ်ဃုထၢသုတဘၣ်ဒိဘၣ်ထံးတဂ့ၤအဂီၫ် မ့ၫ်ဒၣ်မၤဆူၣ်ထီၣ် တၫ်ဘံၣ်တၫ်ဘၢဒီးတၫ်ဃုထံၣ်န့ၫ် တၫ်ကစီၣ်တၫ်ဂ့ၫ်တၫ်ကျိၤတၫ်ဖံးတၫ်မၤတဖၣ်လီၤအဂ့ၫ် ကီၫ်ပူၤပှၤဟူးဂဲၤလၢထံရူၫ်ကီၫ်သဲးဂ့ၫ်၀ီတဖၣ်တဲ၀ဲလီၤ.
ref: dvb
