လါမ့ၤ(၉)သီ, ၂၀၂၅ နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤ, ချၢၣ်လွံၢ်ထူၣ်ကီၢ်ရ့ၣ်အပူၤ သုးမီၤစိရိၤအသုး မၤထီဒါဟီၣ်ခိၣ်ဖိခွဲးယၥ်တလီၢ်လီၢ်အဖီခိၣ် ခးလီၤကျိဖးဒိၣ်အဃိ ကမျၢၢ်ဖိလၢတၢ်ကမၣ်တအိၣ်(၁)ဂၤဘၣ်ဒိ၀ဲဒီး ဟံၣ်ဟးဂီၤကွံၥ်၀ဲ(၁)ဖျၢၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲ တၢ်ကစီၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ချၢၣ်လွံၢ်ထူၣ်ကီၢ်ရ့ၣ်, မူကီၢ်ဆၣ်အပူၤ ဖဲ ၂၀၂၅ နံၣ်,လါမ့ၤ(၃)သီအနံၤ(ခလရ-၆၀)အိၣ်ဆီလီၤအသးဖဲ သၣ်ဘိၣ်သုးရ့ၣ် ခးလီၤ၀ဲ (၁၂၀-မမ)ဆူ မၠးနံၣ်ကွ့, မုၢ်ဃါပျီသ၀ီ(၂)ဖျၢၣ်, ဟီၣ်ခိၣ်ဂီၤသ၀ီ(၁)ဖျၢၣ်ဒီး သုးမီၤစိရိၤအိၣ်ဖဲမုၢ်ဃါပျီခးလီၤ(၁၂၀-မမ)ဆူ ထံလီၤဃံၣ်သ၀ီ(၁)ဖျၢၣ် ခဲလၢၥ်(၄)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
၂၀၂၅ နံၣ်, လါမ့ၤ(၅)သီ (ခမရ-၄၃၉) ခးလီၤကျိဖးဒိၣ်(၁၂၀-မမ)ဆူ ဖယါလဟၣ်သ၀ီ(၂)ဖျၢၣ် ဘၣ်ဒိ၀ဲသ၀ီဖိ လၢအမံၤမ့ၢ်၀ဲ မမိသံၣ်တၣ်(၄၁)နံၣ်န့ၣ်လီၤ.
၂၀၂၅ နံၣ်, လါမ့ၤ(၆)သီ သုးမီၤစိရိၤ အကဘီယူၤဟဲတ့ၢ်လီၤကျိဖးဒိၣ်ဖဲယွၣ်ကၠံအ့, ကၠိကိ, မယါစ့ၣ်လ့, အရှ့ၣ်တီၣ်စူး, အနီးတီၣ်စူး, တမၣ်ခီ,ယၣ်မၠိအီၣ်သ၀ီသ့ၣ်တဖၣ် လၢကျိဖးဒိၣ်အချံ(၂၄)ဖျၢၣ် အဂ့ၢ်တၢ်သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, လၢၢ်ဒိၣ်ကီၢ်ဆၣ်အပူၤ ဖဲ ၂၀၂၅ နံၣ်, လါမ့ၤ(၄)သီန့ၣ် (ခလရ-၂၆၄)အိၣ်ဆီလီၤ အသးဖဲယီးသွါကိခးလီၤ၀ဲ (၈၁-မမ) (၂)ဖျၢၣ်ဒီး သုးမီၤစိရိၤ အသုးအိၣ်ဆီလီၤသးဖဲ မုၢ်ဃါပျီခးလီၤ၀ဲကျိဖးဒိၣ်(၈၁-မမ) (၂)ဖျၢၣ် လီၤဘၣ်၀ဲဖဲခၠီဝးဒီး ဘၣ်ဒိဟးဂီၤကွံၥ်၀ဲကမျၢၣ်ဖိအဟံၣ် (၁)ဖျၢၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဆီထံးကီၢ်ဆၣ်ကီၢ်ဆၣ်အပူၤ ဖဲ ၂၀၂၅ နံၣ်, လါမ့ၤ(၃)သီ, တီအူ၀့ၢ်ကလံၤသုး ဟဲတ့ၢ်လီၤမ့ၣ်ပိၢ်(၃၃)ဖျၢၣ် ခီဖျိကဘီယူၤဒုးသုး(Y-12)အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
၂၀၂၅ နံၣ်,လါမ့ၤ(၄)သီအနံၤ သုးမီၤစိၤရိၤ အကလံၤသုးလၢအအိၣ်ဖဲတီအူ၀့ၢ်န့ၣ် ဟဲတ့ၢ်လီၤ၀ဲကျိဖးဒိၣ်ချံ(ပီၣ်-၅၀၀)လၢ သယဲသမ့ၣ်သ၀ီကပၤဒီး တကတီၢ်ဃီ (ခလရ-၃၅၀) ခးလီၤ၀ဲကျိဖးဒိၣ်(၁၂၀-မမ)ဆူ ယိၤသ၀ီအပူၤ(၂၀)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
