လါဖ့ၤဘြူၤအါရံၤ(၂၆)သီ,၂၀၂၅နံၣ်
ဖဲလါဖ့ၤဘြူၤအါရံၤ(၂၆)သီအနံၤန့ၣ်တၢ်ပၢၢ်ဆၢသုးပၥ်ဖှိၣ်ဒုးအီၤသုးကီၣ်ကးအသုးကျိၤဖဲကီးတရံးအဆှၢခိၣ်ခၠီစိၣ်အကပၤအဃိ ဘၣ်သံ၀ဲ သုးကျိၤခိၣ်ပၥ်ဃုၥ်(၄)ဂၤအဂ့ၢ် လီၢ်က၀ီၤဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
တကးဘၣ် တၢ်ပၢၢ်ဆၢသုးပၥ်ဖှိၣ်ဒီးသုးကီၣ်ကးအသုးအဘၢၣ်စၢၤ တၢ်ဘၣ်သဂၢၢ်ကဲထီၣ်သး လၢရွ့ၣ်ကၠဲးမ့လီၢ်က၀ီၤပူၤအဂ့ၢ် စံး၀ဲန့ၣ်လီၤ.
ဒ်န့ၣ်အသိး တၢ်ပၢၢ်ဆၢသုးပၥ်ဖှိၣ်တပၤစ့ၢ်ကီး ခး၀ဲသုးကီၣ်ကးအိၣ်တၢ်လီၢ်တဖၣ် လၢကျိဖးဒိၣ်တဖၣ်အဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
လၢန့ၣ်အမဲၥ်ညါ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုး ကမၤ၀ဲဒုးယၤရဲၣ်ကျဲၤတဖၣ်အဂီၢ် ဆှၢပၥ်တူၣ်ရကံၣ်ဒြိအခိၣ်(၈၀၀)ဘျဲၣ်ဆူ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူပျၥ်ယၥ်, ကီးတရံးကီၢ်ဆၣ်ပူၤအဂ့ၢ် လီၢ်က၀ီၤတၢ်ကစီၣ်တဖၣ်ပၥ်ဖျါဃၥ်၀ဲန့ၣ်လီၤ.
တတၣ်ကူတပၤစ့ၢ်ကီး သုးကီၣ်ကးအသုးတဖၣ် ခးလီၤကျိဖးဒိၣ်တဖၣ်ဒီး ဟဲတ့ၢ်မ့ၣ်ပိၢ်လၢဒြိတဖၣ်အိၣ်ထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ကတီၢ်ခဲအံၤန့ၣ် KNLAဒီးတၢ်ပၢၢ်ဆၢသုးပၥ်ဖှိၣ်တဖၣ် ဂုၥ်ကျဲးစၢးဒီၣ်တဲၥ်ကွံၥ် သုးကီၣ်ကးသုးကျိၤတဖၣ် လၢဟဲထီၣ်ဆူ၀့ၢ်ရၤမတံအသိး သုးကီၣ်ကးတပၤစ့ၢ်ကီး ဒ်သိးကဒိၣ်စိက့ၤဟီၣ်က၀ီၤအဂ့ၢ် သူ၀ဲဒြိတဖၣ်ဒီးဟူးဂဲၤအါထီၣ်၀ဲသုးဂ့ၢ်၀ီတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
Ref: Salweenpress
