လါဖ့ၤဘြူၤအါရံၤ(၂၄)သီ,၂၀၂၅နံၣ်
၂၀၂၅နံၣ်, လါဖ့ၤဘြူၤအါရံၤ(၂၂)သီအနံၤ, ဂီၤ(၉း၃၀)နၣ်ရံၣ်အဆၢကတီၢ် သုးကီၣ်ကးကဘီယူၤ ဟဲခးလီၤတၢ်ဖဲ ခ့ၣ်အဲၣ်ယူၣ်-လၢၢ်ဒိၣ်ကီၢ်ဆၣ်ပူၤအဃိ လဲၤလီၤတဲၥ်ပိၢ်ဖးထီၣ်၀ဲဒၣ် ဖဲ၀ါခၠဲသ၀ီ သီခါဖၠၣ်ကရၢၢ်ပူၤ၀ံၤ ဘၣ်ဟးဂီၤကွံၥ်၀ဲ တၢ်ဘူၣ်တၢ်ဘါတၢ်သူၣ်ထီၣ်ခံဖျၢၣ်ဒီးတၢ်သူၣ်ထီၣ်တဖၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
ဒ်န့ၣ်အသိး ဖဲအပူၤကွံၥ် လါဖ့ၤဘြူၤအါရံၤ(၁၈)သီအနံၤန့ၣ်စ့ၢ်ကီး သုးကီၣ်ကးအသုး(ခလရ-၇၄)အံၤ ခးလီၤကျိဖးဒိၣ်(၂)ဖျၢၣ်ဆူ မူကီၢ်ဆၣ်ပူၤအဃိ ညီၣ်ပ့ၣ်သၣ်သ၀ီဖိ ဘၣ်ဒိ၀ဲသၢဂၤဒီး ဘၣ်ဟးဂီၤကွံၥ်၀ဲကမျၢၢ်အိၣ်ဟံၣ်(၂)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုးတဖၣ်အံၤ ပညိၣ်ဒုး၀ဲကမျၢၢ်အိၣ်ဆိးလီၢ်ကျဲ,ဖံးအီၣ်မၤအီၣ်လီၢ်ကျဲတဖၣ်ဒီး တၢ်ဘူၣ်တၢ်ဘါတၢ်သူၣ်ထီၣ်လီၢ်တဖၣ်လၢ ကဘီယူၤမ့ၢ်ဂ့ၤ, ဒြိတၢ်ဒုးမ့ၢ်ဂ့ၤဒီး ခးလီၤကျိဖးဒိၣ်တဖၣ် အိၣ်ထီၣ်၀ဲကိးမုၢ်နံၤန့ၣ်လီၤ.
သုးကီၣ်ကးအသုး အတၢ်မၤအၢမၤသီတဖၣ်အဃိ လီၢ်က၀ီၤကမျၢၢ်တဖၣ် ဘၣ်အိၣ်ဘၣ်ဆိး, ဘၣ်ဖံးအီၣ်မၤအီၣ်တၢ်လၢ တၢ်လီၤဘၣ်ယိၣ်, တၢ်ဘၣ်ယိၣ်ဘၣ်ဘှီအပူၤအဂ့ၢ် ပၥ်ဖျါဃၥ်၀ဲန့ၣ်လီၤ.
ဒ်န့ၣ်အသိး ဖဲအပူၤကွံၥ် လါယနူၤအါရံၤ(၁)လါအတီၢ်ပူၤ ခီဖျိသုးကီၣ်ကးအသုးမၤကမၣ်ပှၤဂ့ၢ်၀ီခွဲးယၥ်အကလုၥ်ကလုၥ်အပူၤ လီၢ်က၀ီၤကမျၢၢ်လၢတၢ်ကမၣ်တအိၣ် ဘၣ်သံ၀ဲ(၁၅)ဂၤ, ဘၣ်ဒိ၀ဲ(၄၂)ဂၤ၀ံၤ တၢ်သိၣ်လိကၠိဒီးတၢ်ဘူၣ်တၢ်ဘါတၢ်သူၣ်ထီၣ်တဖၣ်ပၥ်ဃုၥ် ကမျၢၢ်ဟံၣ်ဃီတၢ်သူၣ်ထီၣ်ခဲလၢၥ်ပၥ်ဖှိၣ် ဘၣ်ဟးဂီၤကွံၥ်၀ဲ(၄၆)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
