လါဖ့ၤဘြူၤအါရံၤ(၂၂)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤ, ကီၢ်ရ့ၣ်ခံဘ့ၣ်ဒ်အမ့ၢ် ကီၢ်ရ့ၣ်ဒူပျၥ်ယၥ်ဒီး ကီၢ်ရ့ၣ်ဘျံးဒ၀ဲၢ်ဟီၣ်က၀ီၤတဖၣ်အပူၤ တၢ်ကရၢကရိတဖၣ် မ့ၢ်အဲၣ်နုၥ်လီၤမၤ တၢ်ဒိသူၣ်ဒိသးတၢ်မၤစၢၤတဖၣ်မ့ၢ်ဂ့ၤ, ကူၣ်သ့ဒီးတၢ်ဘူၣ်တၢ်ဘါတၢ်ဖံးတၢ်မၤတဖၣ်မ့ၢ်ဂ့ၤန့ၣ်ကဘၣ်ဒုးသ့ၣ်ညါထံၣ်လိၥ်တဲသကိးတၢ်ဒီးလီၢ်က၀ီၤပှၤဘၣ်မူဘၣ်ဒါတဖၣ်အဂ့ၢ် ကီၢ်ရ့ၣ်ပှၤဘၣ်မူဘၣ်ဒါတဖၣ် ထုးထီၣ်လံၥ်ဒုးသ့ၣ်ညါန့ၣ်လီၤ.
ကတီၢ်ခဲအံၤန့ၣ် ဒ်သိးကဒုးလီၤပှီၢ်ကွံၥ် သုးမီၤစိရိၤသနူအဂီၢ် ကဖီၣ်လိၥ်စုထီဒါသကိးအဂီၢ်ဒီး မ့မ့ၢ်လၢ ဂ့ၢ်ဂီၤအူတၢ်မၤစၢၤတဖၣ်အဖီခိၣ်တခီ ကထံၣ်လိၥ်တဲသကိးတၢ်ဒီး ခ့ၣ်အဲၣ်ယူၣ်-ပှၤဘၣ်မူဘၣ်ဒါတဖၣ်အဂီၢ် ကီၢ်ရ့ၣ်ဘျံးဒ၀ဲၢ် ပှၤဘၣ်မူဘၣ်ဒါတဖၣ် ဒုးသ့ၣ်ညါဃၥ်၀ဲန့ၣ်လီၤ.
ဒ်န့ၣ်အသိး ဒီကလုၥ်ဃူဖိးပဒိၣ်(NUG)စ့ၢ်ကီး တၢ်သုတမၤ ပၢပြးတၢ်ဖံးတၢ်မၤတဖၣ်လၢ ခ့ၣ်အဲၣ်ယူၣ်-ကီၢ်ရ့ၣ်ဘျံးဒ၀ဲၢ်, ကစၢၢ်ဒိၣ်ကီၢ်ဆၣ်ပူၤအဂီၢ် ဟ့ၣ်ပလီၢ်ဒုးသ့ၣ်ညါဃၥ်၀ဲန့ၣ်လီၤ.
ပှၤတ၀ၢကမျၢၢ်တၢ်ကရၢကရိတဖၣ်, ကမျၢၢ်သဘျ့ကရၢတဖၣ်, တၢ်ပၢၢ်ဆၢသိၣ်မှံကရၢတဖၣ်ဒီး တၢ်ဘူၣ်တၢ်ဘါတၢ်ကရၢကရိတဖၣ်လၢ နုၥ်လီၤဟူးဂဲၤမၤတၢ်လၢ ကီၢ်ရ့ၣ်ဒူပျၥ်ယၥ်တၢ်ပၢဟီၣ်က၀ီၤပူၤတဖၣ် မ့ၢ်အဲၣ်ဒိးမၤ ဘၣ်ထွဲတၢ်ကူၣ်ဘၣ်ကူၣ်သ့အသနၢၣ်တဖၣ်န့ၣ် ကဘၣ်ဒုးသ့ၣ်ညါ ကီၢ်ဆၣ်,ကီၢ်ရ့ၣ် ဘၣ်ထွဲ ကညီကူၣ်သ့ဆဲးလၤ၀ဲၤကျိၤအအိၣ်အဂ့ၢ် ကီၢ်ရ့ၣ်ဒူပျၥ်ယၥ်ပှၤဘၣ်မူဘၣ်ဒါတဖၣ် ဒုးသ့ၣ်ညါပၥ်ဖျါဃၥ်၀ဲဖဲ လါဖံၤဘြူၤအါရံၤ(၂၁)သီအနံၤ,၂၀၂၅နံၣ် န့ၣ်လီၤ.
တၢ်ကရၢကရိလၢထးတဖၣ်အံၤ ကမၤဖျါထီၣ် တၢ်ကူၣ်ဘၣ်ကူၣ်သ့တၢ်တိၥ်ကျဲၤအဂီၢ် နုၥ်လီၤထၢစရီတဖၣ်, တၢ်ဃုထံၣ်သ့ၣ်ညါတဖၣ်, တၢ်သံကွၢ်သံဒိးတၢ်လၢ ဒူသ၀ီတဖၣ်အပူၤန့ၣ် ကဘၣ်ဒုးသ့ၣ်ညါထံၣ်လိၥ်တဲသကိးတၢ်ဒီး ဘၣ်ထွဲဒူသ၀ီ,ကီၢ်ဆၣ်,ကီၢ်ရ့ၣ်ပှၤဘၣ်မူဘၣ်ဒါတဖၣ်အသိး မ့ၢ်ဘၣ်ထွဲဒီးကူၣ်သ့သနၢၣ်စ့ၢ်ကီးန့ၣ် ကဘၣ်ဒုးသ့ၣ်ညါဖီၣ်လိၥ်စုမၤသကိးတၢ်ဒီး ကီၢ်ဆၣ်,ကီၢ်ရ့ၣ် ကညီကူၣ်သ့ဆဲးလၤ၀ဲၤကျိၤပှၤဘၣ်မူဘၣ်ဒါတဖၣ်အဂ့ၢ် ပၥ်ဖျါဃၥ်၀ဲလၢ လံၥ်ဒုးသ့ၣ်ညါအပူၤန့ၣ်လီၤ.
တၢ်ဘူၣ်တၢ်ဘါတၢ်ကရၢကရိတဖၣ်စ့ၢ်ကီး မ့ၢ်အဲၣ်ဒိးမၤ ဘၣ်ထွဲတၢ်ဘူၣ်တၢ်ဘါတၢ်ဖံးတၢ်မၤတဖၣ်န့ၣ် ကဆဲးကျိးဒုးသ့ၣ်ညါဘၣ် လီၢ်က၀ီၤတၢ်ဘူၣ်တၢ်ဘါတၢ်ကရၢကရိပှၤဘၣ်မူဘၣ်ဒါတဖၣ်၀ံၤ မၤတၢ်လၢတၢ်သဘျ့ပူၤသ့ဘၣ်ဆၣ် မ့မ့ၢ်လၢကူၣ်သ့အသနၢၣ်တဖၣ်တခီ ကဟံးစုနဲၣ်ကျဲဖျိဖျဖျါဖျါဒီး သုတမၤဘံဘူစှၤသၢဒီးတၢ်ဘူၣ်တၢ်ဘါသနၢၣ်အဂီၢ် ဒုးသ့ၣ်ညါဃၥ်၀ဲန့ၣ်လီၤ.
တၢ်ဖံးတၢ်မၤတဖၣ်အဖီခိၣ် တၢ်ဟဲဒုးသ့ၣ်ညါထံၣ်လိၥ်တဲသကိးတၢ်မ့ၢ်တအိၣ်ဘၣ်ဒီး တၢ်ဂ့ၢ်လၢပိၥ်ထွဲထီၣ်သးတဖၣ်မ့ၢ်အိၣ်ထီၣ်န့ၣ် ကညီကူၣ်သ့ဆဲးလၤ၀ဲၤကျိၤတခီ တဟံးန့ၢ်မူဒါဘၣ်အဂ့ၢ် ကီၢ်ရ့ၣ်ဒူပျၥ်ယၥ် ဘၣ်မူဘၣ်ဒါတဖၣ် ဒုးသ့ၣ်ညါဃၥ်၀ဲန့ၣ်လီၤ.
