လါဖ့ၤဘြူၤအါရံၤ(၂၁)သီ,၂၀၂၅နံၣ်
၀းကီၫ်သွံၣ်စၢဖှိၣ် သုးမုၫ်ဒိၣ်(UWSA/ UWSP)န့ၣ် ဒ်သိးကမၤဆူၣ်ထီၣ် ထံဂုၤကီၫ်ဂၤတၫ်ရ့လိာ်ဘၣ်ထွဲအဂီၫ် ကသူ၀ဲ တရူး-ပယီၤ မုာ်ကျိၤ၀ဲၤကွာ်အကျဲ၀ံၤ ကမၤဂုၤထီၣ်ပသီထီၣ်မုာ်ကျိၤ၀ဲၤကွာ်ပာ်ဃုာ် တၫ်ဂ့ၫ်(၉)ထံၣ်န့ၣ် လၢတနံၣ်အံၤ ကဒုးအိၣ်ထီၣ်၀ဲအမိၫ်လံၤမိၫ်ပှၫ်အဂ့ၫ် Wa News Landလၢပာ်ဖျါ UWSAအတၫ်ကစီၣ်တဖၣ်အံၤ ဖဲလါဖ့ၤဘြူၤအါရံၤ (၁၉)သီအနံၤန့ၣ် ကွဲးဖျါ၀ဲလီၤ.
UWSAအ၂၀၂၄နံၣ် နံၣ်ကတၢၫ်တၫ်အိၣ်ဖှိၣ်န့ၣ် ဘၣ်တၫ်မၤ၀ဲဖဲ လီၫ်ခၢၣ်သး,၀့ၫ်ပၣ်ဆါအပူၤ ဖဲလါဖ့ၤဘြူၤအါရံၤ ခံနွံ တနွံအပူၤ ယံာ်(၅)သီ၀ံၤအလီၫ်ခံ ပာ်လီၤ၀ဲ၂၀၂၅နံၣ်အဂီၫ် ခါဆူညါတၫ်မၤကျဲသနူတဖၣ်အဂ့ၫ် တဲ၀ဲလီၤ.တၫ်အိၣ်ဖှိၣ် ၀ဲအံၤ UWSAသုးရိၣ်မဲခိၣ်ကျၢၫ် အူပီးယိၣ်ခၠါပာ်ဃုာ် ပတီၫ်ထီခိၣ်နၫ်တဖၣ် ဟဲထီၣ်၀ဲလီၤ.
လၢတနံၣ်အံၤ ကဒုးအိၣ်ထီၣ်၀ဲအမိၫ်လံၤမိၫ်ပှၫ်အဂီၫ် တၫ်ဂ့ၫ်(၉)ထံၣ်အပူၤ တၫ်ကက့ၤအိးထီၣ်ကဒါက့ၤ မၣ်ဆဲၣ်စၢၫ်ပူၤ ထးပူၤအဂီၫ်,တၫ်ကပၢဆှၢတၫ်ဖံးတၫ်မၤလၢတဖိးသဲစးတဖၣ်ဒီးကထုးထီၣ်အါထီၣ် လီမ့ၣ်အူအဂံၫ် ပာ်ဃုာ်စ့ၫ်ကီး၀ဲ လီၤ.
တၫ်ဆၢတဲာ်အံၤအဖီခိၣ် တၫ်ကူၣ်လဲၫ်မၤကၤအကျဲလၢ ကလုာ်ဒူၣ်ဖီၣ်စုက၀ဲၤပၢဆှၢဃာ်တဖၣ် ကအိးထီၣ်ကဒါက့ၤအ ဂီၫ် တၢၣ်ပီၣ်တဲသကိး၀ဲသ့အဂ့ၫ် ပှၤပဲာ်ထံနီၤဖးထံရူၫ်ကီၫ်သဲး အူသါစိနဲၣ် ပဲာ်ထံနီၤဖး၀ဲလီၤ.
“တရူးအမုာ်ကျိၤ၀ဲၤကွာ်တၫ်တိာ်ကျဲၤအကျါ တၫ်ကူၣ်လဲၫ်မၤကၤကျဲလၢအမ့ၫ် မူၣ်ဆဲၣ်-မါတလ့ကျဲမုၫ်ဖီခိၣ် ကလုာ်ဒူၣ် ဖီၣ်စုက၀ဲၤတဖၣ်ကရၢတနီၤဒီးသုးကီၣ်ကးန့ၣ် တၢၣ်ပီၣ်တဲသကိး၀ဲတန့ၫ်ဘၣ်.ကျဲတဖၣ်န့ၣ် ကအိးထီၣ်အဂီၫ် UWSA တၢၣ်ပီၣ်တဲသကိး၀ဲမ့ၫ်န့ၫ်န့ၣ် တရူးစ့ၫ်ကီးကတူၫ်လိာ်၀ဲလီၤ.တၫ်န့ၣ်အဃိ မုာ်ကျိၤ၀ဲၤကွာ်ကျဲတဖၣ်အံၤ UWSAမၤ၀ဲမ့ န့ၫ်န့ၣ် တၫ်ကူၣ်လဲၫ်မၤကၤအကျဲကအိးထီၣ်သ့လီၤ.”
၁၀၂၇ ဒုးယၤတၫ်ရဲၣ်တၫ်ကျဲၤအကတီၫ် ၂၀၂၄နံၣ်,လါယနူၤအါရံၤအပူၤ ယိၤဒိၣ်ကီၫ်စဲၣ်ကလံၤစိး ဟိၣ်ပၣ်ဒီး၀့ၫ်ပၣ်လိၣ် တဖၣ် ကလံၤစိးသိၣ်မှံၤ(၃)ဖု ထီၣ်ဒုးမၤန့ၫ်၀ဲ၀ံၤအလီၫ်ခံ ဟ့ၣ်လီၤက့ၤ၀ဲဆူ UWSAအစုပူၤန့ၣ်လီၤ.အလီၫ်ခံ ပာ်ဖှိၣ်ထီၣ် ၀ဲ ဟိၣ်ပၣ်,နးတံး,နၣ်၀ံ,၀့ၫ်ပၣ်လိၣ် လွံၫ်၀့ၫ်ဒီးဆီတလဲ၀ဲဒ် ဟိၣ်ပၣ်ကီၫ်ရ့ၣ်အသိး၀ံၤ UWSAန့ၣ် မၤလဲၫ်ထီၣ်အတၫ်ပၢ ဆှၢဟီၣ်က၀ီၤန့ၣ်လီၤ.
Ref: RFA
