လါယနူၤအါရံၤ(၁၂)သီ,၂၀၂၅နံၣ်
ဖဲလါဖ့ၤဘြူၤအါရံၤ(၁၂)အနံၤန့ၣ် ကလုာ်ဒူၣ်တၫ်ပၢၫ်ဆၢကရၢဒီးကမျၢၫ်ကရၢ(၉)ဖု ဘိးဘၣ်ရၤလီၤ၀ဲလၢ ကတီၫ်အံၤ စးထီၣ်လၢတၫ်ပၢၫ်ဆၢအကတီၫ်တုၤတၫ်ဆီတလဲအကတီၫ် တၫ်ကသူအီၤဒ် တၫ်ပၢတၫ်ပြးဂ့ၫ်၀ီလံာ်အသိးအဂီၫ် စးထီၣ်ကွဲးလီၤ၀ဲ “ဘၣ်ထွဲတၫ်ဆီတလဲအကတီၫ် ဖဲၣ်ဒရၢၣ်ဂ့ၫ်ခီၣ်ထံးသဲစးတၫ်ဘျၢ” လံန့ၣ်လီၤ.
တၫ်ပၢၫ်ဆၢဂံၫ်ဘါကရၢတကပၤ စးထီၣ်လၢတၫ်ပၢၫ်ဆၢ အကတီၫ်တုၤလၢခါဆူညါ လၢတၫ်သူၣ်ထီၣ် ဖဲၣ်ဒရၢၣ်ကီၫ်စၢဖှိၣ်အပူၤ တမ့ၫ်ကတူၫ်လိာ်သူ၀ဲ ဖဲၣ်ဒရၢၣ်သနူလၢလီၫ်ခၢၣ်သးတၫ်ဖီၣ်ပျံၤဘၣ်အမဲာ်ညါ ကက့ၤသူၣ်ထီၣ်ထံကီၫ် ခီဖျိတၫ်ဟံးန့ၫ်အခီၣ်တဃာ်လၢ “ကီၫ်စဲၣ်အဂံၫ်ဆူၣ်ဆူကီၫ်စၢဖှိၣ်အဂံၫ်ဆူၣ်” အဂ့ၫ်တဲ၀ဲလီၤ.
လီၫ်ခၢၣ်သးတၫ်ဖီၣ်ပျံၤသနူန့ၣ် ပဒိၣ်အစိၤတဖၣ်အစိၤ ထံရူၫ်ကီၫ်သဲးတၫ်သဘံၣ်သဘုၣ်လၢယံာ်တ့ၫ်အနံၣ်(၂၀)ဘျဲၣ်အံၤ ဘှါဆှဲ၀ဲတန့ၫ်ဘၣ်အမဲာ်ညါ ဒုးကဲထီၣ်အါထီၣ်တၫ်သဘံၣ်သဘုၣ်အဂၤတဖၣ်အဂ့ၫ်ပာ်ဖျါ၀ဲလီၤ.
လံာ်ဘိးဘၣ်ရၤလီၤ၀ဲအံၤ ကရ့ၣ်နံၣ်ဒီကလုာ်တၫ်လဲၤထီၣ်လဲၤထီပၣ်တံၣ်(KNPP), ကညီဒီကလုာ်စၢဖှိၣ်ကရၢ(KNU),ခၠီဒီကလုာ်သုး(CNF),တလၢၤကီၫ်သီပၣ်တံၣ်(တၫ်ထီဒါသုးမီၤစိရိၤ) (NMSP-AD),ကရ့ၣ်နံၣ်ကီၫ်စဲၣ်တၫ်ကူၣ်လိာ်တၢၣ်ပီၣ်ကီၣ်ကး(KSCC),ပအိးဒီကလုာ်ဖဲၣ်ဒရၢၣ်ကီၣ်ကး(PNFC),တလၢၤကီၫ်စဲၣ်ဖဲၣ်ဒရၢၣ်ကီၣ်ကး(MSFC),တအီထံရူၫ်ကီၫ်သဲးတၫ်ကူၣ်လိာ်တၢၣ်ပီၣ်ကမံးတံာ်(TPCC)ဒီး ပိာ်မုၣ်ကရၢခိၣ်ကျၢၫ်(ကီၫ် ပယီၤ)-WLBကရၢတဖၣ် ပာ်ဖှိၣ်ထုးထီၣ်သဃဲၤ၀ဲလီၤ.
ဒီကလုာ်ဃူဖိးပဒိၣ်(NUG)ပာ်ဃုာ် KNU,KNPP,CNFကရၢတဖၣ် ဖဲ၂၀၂၄နံၣ်,လါဒံၣ်စဲဘၢၣ်(၃၁)သီအနံၤန့ၣ် ပာ်ဖှိၣ်ထုးထီၣ်ဘိးဘၣ်ရၤလီၤ၀ဲ အတၫ်အိၣ်ဆၢထၢၣ်တပူၤဃီ တတီၤ၀ံၤ လၢတၫ်အိၣ်ဆၢထၢၣ်အံၤအဂီၫ် ကရၢလၢအဂၤတဖၣ်ကဟဲနုာ်လီၤပာ်ဃုာ်အဂီၫ် မၤဆူၣ်ထီၣ်၀ဲအဂ့ၫ်တဲ၀ဲလီၤ.
လၢတၫ်ပာ်ဖှိၣ်ထုးထီၣ်သဃဲၤ တၫ်အိၣ်ဆၢထၢၣ်တပူၤဃီအံၤအပူၤစ့ၫ်ကီး ဖဲၣ်ဒရၢၣ်ယူၣ်နံးပဒိၣ်တဖၣ်န့ၣ် တၫ်ကဒုးအိၣ်ထီၣ်အီၤလၢကီၫ်စဲၣ်တဘ့ၣ်ဘၣ်စုာ်စုာ် လၢတၫ်သဘျ့ပူၤအဂ့ၫ် ပာ်ဖျါဃာ်၀ဲလီၤ.
Photo: GSCN
