လါဒံၣ်စ့ဘၢၣ်(၁၆)သီ,၂၀၂၄နံၣ်
ကလုာ်ဒူၣ်ဖီၣ်စုက၀ဲၤကရၢတဖၣ် မ့ၫ်ဘှါဆှဲ၀ဲလၢထံရူၫ်ကီၫ်သဲးအကျဲမးဒီးတၫ်သဘံၣ်သဘုၣ်တဖၣ် ကဘၣ်လိာ်ဖိးဒ့၀ဲအဃိ တၫ်ကပာ်တ့ၫ်ကွံာ်တၫ်ဖီၣ်စုက၀ဲၤကျဲအဂီၫ် ဖဲလါဒံၣ်စ့ဘၢၣ်(၁၅)သီနံၤ လၢလီၤဘၣ်ရၢၫ်ခၢၣ်ကီၫ်စဲၣ်အမုၫ်နံၤန့ၣ် သုးကီၣ်ကးအခိၣ်မ့အီၣ်လဲၣ်အတၫ်ကတိၤလီၤအပူၤဖၢနုာ်တဲ၀ဲန့ၣ်လီၤ.
ခီဖျိလၢတၫ်ဖီၣ်စုက၀ဲၤအကျဲ တၫ်မိၫ်န့ၫ်သးလီတဖၣ် ဃ့၀ဲတမ့ၫ်ကန့ၫ်ဘၣ်အမဲာ်ညါ ယၢၤထီၣ်တၫ်ဂ့ၫ်လၢ ထံရူၫ်ကီၫ်သဲး၀ံၤ ဖီၣ်စုက၀ဲၤဒုးတၫ်န့ၣ် မ့ၫ်တၫ်မၤလၢကမၣ်အဂ့ၫ်စ့ၫ်ကီး သုးကီၣ်ကးအခိၣ်တဲ၀ဲလီၤ.
ကိကးသုး(MNDAA),တအါသုး(TNLA)ဒီးရၢၫ်ခၢၣ်သုး(AA)တဖၣ် အတၫ်ဖံးတၫ်မၤန့ၣ် မၤဘၣ်ဒိကလုာ်ဒူၣ်ထံဖိကီၫ်ဖိတဖၣ် အတၫ်အိၣ်မူအိၣ်ဂဲၤအဂ့ၫ် သုးကီၣ်ကးအခိၣ်တဲ၀ဲလီၤ.
လၢထံလီၫ်ကီၫ်ပူၤ စုက၀ဲၤတၫ်သဘံၣ်သဘုၣ်တဖၣ်အပူၤ သးစၫ်တဖၣ် တၫ်ကွဲန့ၫ်လွဲန့ၫ်အီၤလၢတၫ်မူၤတၫ်ဘှီး၀ံၤ တၫ်ဒုးနုာ်လီၤန့ၫ်ဆူၣ်အီၤလၢတၫ်ဒုးပူၤအဂ့ၫ်စ့ၫ်ကီး သုးကီၣ်ကးအခိၣ်တဲ၀ဲလီၤ.
ကိးကးသုး(MNDAA)ဒီးတအါသုး(TNLA)တဖၣ်အံၤ တရူးနုာ်လီၤကျဲၤဃူကျဲၤဖိးန့ၫ်၀ဲအဃိ ကမၤတၫ်ထံၣ်လိာ် တၢၣ်ပီၣ်တဲသကိးဒီးသုးကီၣ်အဂ့ၫ် ဖဲတယံာ်ဒံးဘၣ်န့ၣ် ဘိးဘၣ်ရၤလီၤ၀ဲဘၣ်ဆၣ် သုးကီၣ်ကးတခီတၫ်အံၤအဖီခိၣ် တတဲခီၣ်ဆၢက့ၤ၀ဲနီတမံၤဒံးဘၣ်.
တၫ်ဃုသ့ၣ်ညါကရၢသဘျ့တဖုလၢအမ့ၫ် BNI-Myanmar Peace Monitorန့ၣ် ဖဲလါဒံၣ်စ့ဘၢၣ်(၁)သီအနံၤန့ၣ် ဘိးဘၣ် ရၤလီၤ၀ဲလၢ ၁၀၂၇ ဒုးယၤတၫ်ရဲၣ်တၫ်ကျဲၤ စးထီၣ်၀ံၤအလီၫ်ခံ တနံၣ်ဘျဲၣ်အတီၫ်ပူၤ ရၢၫ်ခၢၣ်ကီၫ်စဲၣ်ဒီးယိၤဒိၣ်ကီၫ်စဲၣ် ပာ်ဃုာ် ကီၫ်ဆၣ်ဒီးကီၫ်ခီ(၇)ဘ့ၣ်အပူၤ ၀့ၫ်ခဲလၢာ်ပာ်ဖှိၣ်(၈၆)၀့ၫ်န့ၣ် ကလုာ်ဒူၣ်ဖီၣ်စုက၀ဲၤကရၢဒီး ကမျၢၫ်တၫ်ဒီသဒၢ သုး ပာ်ဖှိၣ်တဖၣ် ပၢဆှၢဃာ်၀ဲန့ၣ်လီၤ.
Ref: RFA
